ეროსი კიწმარიშვილის გარდაცვალებასთან დაკავშირებით გამოძიება მიმდინარეობს, გამოიკვეთა რამდენიმე ახალი დეტალიც, თუმცა ყოფილი ხელისუფლება კიწმარიშვილის გარდაცვალების გახმაურებისთანავე, ცდილობს, საზოგადოებაში „შეაგდოს“ ვერსია, რომლის თანახმადაც, კიწმარიშვილი ხელისუფლებამ „მოიშორა“.

განათლების ყოფილი მინისტრი, გია ნოდია, ფეისბუკის საკუთარ გვერდზე წერს: „არ ვიცი, როგორ მოკვდა ეროსი - აპრიორი ვერ გამოვრეიცხავ (თუმცა მიჭირს დაჯერება), რომ მართლა თავი მოიკლა. მაგრამ, საზოგადოების განწყობიდან გამომდინარეც და გარკვეული ირიბი ნიშნებითაც, გვაქვს ის ვითარება, როცა გამოძიებას მთავარი ეჭვმიტანილის ქვემდებარე უწყება აწარმოებს. თუნდაც ეს ეჭვი უსაფუძვლო აღმოჩნდეს, ან უწყებამ უნდა იცოდეს, რომ ამ ვითარებაშია. ამიტომ ძალიან, ძალიან დამაჯერებელი ვერსია თუ არ დადო, ეჭვი მისი პოლიტიკური პატრონის ბრალეულობის შესახებ სერიოზულად გამყარდება“.

„ერთიანი ნაციონალური მოძრაობის“ საგარეო ურთიერთობათა მდივნის გიგა ბოკერიას შეფასებით, ეროსი კიწმარიშვილის გარდაცვალების საქმეზე მთელ საზოგადოებას აქვს შეშფოთების და კითხვების დასმის საფუძველი.

„ოჯახის წევრების, მისი ახლობლების თვალსაზრისით, მისი საჯარო გამოსვლები არანაირ წინაპირობას არ იძლეოდა. თვითონ გარდაცვალების გარემოებები და სამართალდამცავი ორგანოების მიერ დაფიქსირებული პოზიციები კიდევ უფრო ბუნდოვანს ქმნის ვითარებას - ეს ეხება სათვალთვალო კამერას, იარაღის შესყიდვას და ა.შ. და ბოლოს, მისი საჯარო გამოსვლები ძალიან მნიშვნელოვან საკითხზე, ხელისუფლების მიერ „რუსთავი 2“-ის წინააღმდეგ წარმოებული კამპანიის კონტექსტში პირდაპირ უპირისპირდებოდა ივანიშვილის მთავრობის ამოცანებს. ეს ყველაფერი გვაძლევს შეშფოთების და კითხვების საფუძველს, თუმცა, მინდა, ხაზი გავუსვა იმას, რომ დაველოდებით გამოძიებას და გამოძიების პასუხს ყველა ამ კითხვაზე“, - განაცხადა ბოკერიამ.

საქართველოში „თავისუფლების ინსტიტუტის“ წარმომადგენელი, ლევან რამიშვილი ეროსი კიწმარიშვილის გარდაცვალებასთან ბიძინა ივანიშვილის კავშირზე ირიბად მიანიშნებს. როგორც რამიშვილი ამბობს, იკვეთება მისი ეჭვი, რომ ივანიშვილმა კიწმარიშვილი „რუსთავი-2“-ის ხელში ჩასაგდებად მოიშორა თავიდან.

„ბუნებრივია, რომ პოლიცია მხოლოდ თვითმკვლელობის ვერსიაზე მუშაობს, აბა ივანიშვილის მიერ „რუსთავი 2“-ის ხელში ჩასაგდებად გზის გაწმენდის ვერსიაზე ხომ არ იმუშავებენ? ის ბრძენი კაცი, ბატონი ბიძინა განა ამის მკადრებელია? ვინმეს მართლა ხომ არ ჰგონია, 90-იანი წლების რუსეთში ქონება ამ მეთოდებით დააგროვა?“, - წერს ლევან რამიშვილი.

ნაციონალებს ეთანხმება ლეიბორისტების ლიდერი შალვა ნათელაშვილიც: „ის, რაც ეროსი კიწმარიშვილის თავს მოხდა, 90-იან წლებში ივანიშვილის მიერ მილიარდების შოვნის ისტორიას ძალიან ჰგავს, რაც ვითომ თვითმკვლელობებით და, რა თქმა უნდა, ქილერთა მეშვეობით ხდებოდა... ივანიშვილის რეჟიმის მიზანია, „რუსთავი 2“ ხელში ისევე ჩაიგდოს, როგორც დანარჩენი სხვა ტელეკომპანიები. ამ გზაზე მას კიწმარიშვილი ხელს სერიოზულად უშლიდა“, - განაცხადა ნათელაშვილმა.

რამდენად ლოგიკურია „ნაციონალური მოძრაობის“ მიერ საზოგადოებისთვის შეთავაზებული ვერსია; რეალურად ვისთვის შეიძლებოდა, შეეშალა ხელი ეროსი კიწმარიშვილს; ხელისუფლებისთვის პოლიტიკურად წამგებიანია თუ მომგებიანი ეს ხმაურიანი საქმე; ამ თემებზე for.ge ექსპერტ ნანა დევდარიანს ესაუბრა, რომელიც აცხადებს, რომ იყო პერიოდი, როდესაც ბოკერიას და ნოდიას სიტყვები წყვეტდა ყველაფერს, მაგრამ დღეს ასე აღარ არის.

შესაძლოა, რამე თამაშის წამოწყებას ცდილობენ ნაციონალები, ხელისუფლების დისკრედიტირების მიზნით? როგორ ფიქრობთ, რაში სჭირდებათ ასეთი განცხადებები?

- დღეს ხომ არ გავიცანით ნაციონალები, ცნობილები არიან იმით, რომ შეუძლიათ, ცარიელ ადგილზე მოიფიქრონ ბრალდებები, რომ შემდეგ, აიძულონ ხელისუფლება, თავი იმართლოს.

რაც შეეხება განცხადებას, რომ ივანიშვილს აწყობდა, რაში უნდა აწყობდეს ეს ივანიშვილს, როცა გადაკვეთაც კი არ ჰქონია ეროსი კიწმარიშვილთან, რომელიც ყველა ძაფით იყო დაკავშირებული, „ნაციონალურ მოძრაობასთან“, განსაკუთრებით მას შემდეგ, რაც ჟვანია მოკლეს?

მათი მხრიდან მიზეზად სახელდება „მაესტრო“ და „რუსთავი2“, თითქოს ივანიშვილის ფონდიდან ფინანსდებოდა კიწმარიშვილი და ა.შ...

- არარსებულზე ნუ კი ვილაპარაკებთ, რაც საყოველთაოდ ცნობილია ის ვთქვათ. სააკაშვილის პირობებში ეროსი კიწმარიშვილი გახადეს იძულებული, რომ წასულიყო კომპანიის გაკოტრებაზე სასამართლოს წესით. ფაქტობრივად, ხელიდან წაართვეს კიწმარიშვილს „რუსთავი2“ და დღესაც არავინ არ იცის, სინამდვილეში ვისია - „პადსტავნოი“ ფიგურებზე არც დავიწყებ ლაპარაკს, არაფრის მქონებელი ხალხი უცებ რომ კომპანიის მფლობელად გამოგვიცხადეს.

როდესაც კიწმარიშვილმა თქვა, რომ ვიბრძოლებ, რომ დავიბრუნო „რუსთავი2“ და „მაესტრო“ მართვაშიო, პირველ რიგში ვისზე იფიქრებ? ყველა ამბობდა და იყო ამისი ირიბი მტკიცებულებები, რომ „რუსთავი2“-ის მართვის პაკეტი მიხეილ სააკაშვილის ხელში იყო. „რუსთავი2“-ისთვის ბრძოლა ვის დაემუქრებოდა პირველ რიგში? - ისევ და ისევ სააკაშვილს და ნაციონალებს - ყოფილი გენპროკურორის მოადგილე მართავს „რუსთავი 2“-ს და მთლიანად ნაციონალების სასარგებლო აგიტაციასა და პროპაგანდას ეწევა. ამიტომ, რაც ნაკლებს ილაპარაკებენ, ჯობია.

ახალი გარდაცვლილია ადამიანი და ამ თემაზე ლაპარაკს არ ვაპირებდი. მაგრამ რაკი არ ისვენებენ. პირდაპირ მიანიშნებს სწორედ მაგათკენ, რადგან სწორედ მათ ინტერესებს ემსახურება კიწმარიშვილისთვის წართმეული „რუსთავი2“ - დასკვნების გამოტანა ძალიან მარტივია.

„მაესტროს“ რაც შეეხება - ბიძინა ივანიშვილის ფონდიდან იმდენი რამე და იმდენი ვინმე ფინანსდებოდა, მაშინ გამოდის რომ უნდა ჩამოუაროს ივანიშვილმა და ნინელი ჭანკვეტაძიდან დაწყებული, გივი ბერიკაშვილით დამთავრებული, ყველას ლიკვიდაცია უნდა მოახდინოს, მაგ ლოგიკით, იმიტომ, რომ წლების მანძილზე აფინანსებდა - ეს რა სიკრეტინეა, ვინმემ ამიხსნას.

დღეს სულ სხვა მფლობელები ჰყავს „მაესტროს“ და არც ისინი არ გაუსწორდებოდნენ ფიზიკურად ეროსის, რადგან „რუსთავი2“-ისგან განსხვავებით, მისი პოზიციები „მაესტროში“ ძალიან მყიფე იყო და ბრძოლას ვერ მოიგებდა.

ასევე გაიჟღერა ვერსიამ, რომ ეროსი კიწმარიშვილი ფლობდა უამრავ ინფორმაციას, რამდენად შესაძლებლად გეჩვენებათ, რომ ამ ინფორმაციის გამოყენებით კიწმარიშვილს ვინმესთვის სერიოზული პრობლემები შეექმნა?

- ამას გამოვრიცხავ, რადგან ყველა ინფორმაცია, რაც კი ჰქონდა ეროსის, დიდი ხანია, გააჟღერა, მათ შორის, იგივე, გივი თარგამაძის ეპიზოდი გვახსოვს, ალბათ, როდესაც ყველაფერი თქვა, რაც კი შეიძლებოდა - იმის იქით აღარაფერი რჩებოდა უკვე.

რაკი ასე ლაპარაკობენ ეგენი, ეჭვი გამიჩნდა, რომ უფრო „რუსთავი2“-ს და სააკაშვილს უკავშირდება ეს ყველაფერი - ლიკვიდაცია რომ მათი ხელწერაა, ამაში არაერთხელ დავრწმუნდით.

უდიდესი ტრაგედია მოხდა და ოჯახს სამძიმრის გარდა არაფერი არ აინტერესებს, არც მინდოდა ამ თემაზე ლაპარაკი, მაგრამ მისივე ყოფილი თანამოაზრეები არ ჩუმდებიან. გუშინაც გააკეთა ოჯახმა განცხადება, რომ არ უნდათ ამ ყველაფრის მოსმენა. მეც არ ვიზიარებ, რომ ეს იყო თვითმკვლელობა და ვინც იცნობდა ეროსის, ნამდვილად ვერ დაიჯერებს, რომ თავი მოიკლა. მაგრამ ამას უნდა გამოძიება, თუმცა, არა ნოდიას და ლევან რამიშვილის დაკვეთით.

პოლიტიკურად ხელისუფლებას რამდენად აზარალებს ეს თემა?

- ხელისუფლებას ეს პირდაპირ აყენებს დარტყმას, თვითმკვლელობაც რომ იყოს, რადგან საჯარო ფიგურა იყო. თუ მკვლელობაა, მით უფრო, რადგან პასუხისმგებელია სიტუაციაზე, გამოძიებაზე და ა.შ. პასუხისმგებელია ხელისუფლება. ამდენად, არც ერთი ნორმალური ადამიანი ხელისუფლებაში მსგავს რამეს არ გააკეთებს, რადგან პირველ რიგში საკუთარ თავს აყენებს დარტყმას.

ეროსის ძალიან ბევრი არაკეთილმოსურნე ჰყავდა, ბევრ ადამიანს ჰქონდა მის მიმრთ სერიოზული პრეტენზია და შეიძლება, ძველი ანგარიშის გასწორებაც იყო. ყველაზე მთავარი კი ის იყო, რომ „რუსთავი2“-ის დასაბრუნებლად ბრძოლის დაწყებას აპირებდა.

ითქვა, რომ ახალი, საკაბელო ტელევიზიის გაკეთებას გეგმავდა, რამდენად შეიძლებოდა ყოფილიყო „რუსთავი2“-ის სერიოზული კონკურენტი? გვახსოვს, რომ თავის დროზე „რუსთავი2“-იც არაფრისგან შექმნა.

- ჯერ ერთი, არ შეუქმნია, თანაც დღეს ახალი ტელევიზიის შექმნა უფულოდ წარმოუდგენელია, თანაც ლიცენზიის მოპოვება. ის უფრო „რუსთავი2“-ის დასაბრუნებლად იბრძოლებდა. ახალს შექმნიდა თუ არა და თუ შექმნიდა, ის საფრთხეს შეუქმნიდა თუ არა „რუსთავი2“-ს, ეს მხოლოდ ვარაუდებია.

რაც შეეხება კიწმარიშვილის ბოლო პოლიტიკურ ნაბიჯებს? ჯერ თითქოს ნაციონალებს დაუჭირა მხარი მეორე ტურში, შემდეგ „რუსთავი2“-ს დავიბრუნებო, განაცხადა. რაღაც თამაშში ხომ არ ჩააბეს კიწმარიშვილი?

- ეროსი თვითონ იყო მოთამაშე, „ვარდების რევოლუციის“ წინაც და შემდეგაც. სწორედ ამან გამოიწვია, რომ ის საბოლოოდ, გარიყეს. ითხოვდა რაღაც პოლიტიკურ თანამდებობებს, მაგრამ რასაც სთავაზობდნენ, არ აკმაყოფილებდა. შემდეგ ელჩის სტატუსი მისცეს, ბოლოს იქიდანაც წავიდა და მერე დაარტყა ნაციონალებს. ეროსი არაერთაზროვანი და არაერთგვაროვანი ადამიანი იყო, საკმაოდ წინააღმდეგობრივი და საკმაოდ აზარტული მოთამაშე, რაც ეხება მედიას, პოლიტიკას და ასეთ აქტივობებს.

რაში ჩააბეს, ვერ გეტყვით, ის უფრო თვითონ გამოიჩენდა ინიციატივას. როგორც ჩანს, რაღაც სვლები ჰქონდა დაგეგმილი, იმიტომ, რომ ვერ გავიდა რუსთავის მერად და სხვა კანდიდატებთან ერთად ეს ნაბიჯი გადადგა. თუმცა ამაშიც უცნაური და გასაგიჟებელი არაფერი არ არის.

შეიძლებოდა, ამ ნაბიჯისთცვის ნაციონალებს რამე შეეთავაზებინათ?

- რისი შეთავაზება შეუძლიათ ნაციონალებს? მას უფრო გრძელვადიანი სტრატეგია ჰქონდა დაგეგმილი, როგორც ვხვდები, და ეს იქნებოდა უფრო მედიაში გააქტიურების თვალსაზრისით, რადგან კიდევ 2 წელი საქსრთველოში არჩევნები არ იქნება.

იყო თუ არა ეროსი ის ფიგურა, ვინმესთვის პოლიტიკური საფრთხე შეექმნა?

- პირდაპირ სასაცილოა, ამას რომ ამბობენ. ამ პერიოდში ეროსის არ ჰქონდა ის პოზიციები, ვინმესთვის საფრთხე რომ შეექმნა თუნდ მედიაში და თუნდ პოლიტიკაში.

ამიტომ, სულ ტყუილად ცდილობენ რაღაცის თითიდან გამოწოვას. ვფიქრობ, უფრო ძველი ანგარიშსწორების კვალი უნდა ეძებონ, ან თუ არადა, „რუსთავი2“-ისა და ნაცმოძრაობის ინტერესი სად გადაკვეთა მან - ვიცით, რომ თქვა, მე დავიბრუნებ „რუსთვი2“-ს.