დღეს, საქართველოს ტერიტორიული მთლიანობისთვის ბრძოლებსა და საერთაშორისო მისიებში დაშავებულ 10 სამხედრო მოსამსახურეს დროებით სარგებლობაში საცხოვრებელი ბინები გადაეცა. გორში მდებარე სამხედრო დასახლებაში ბინების გადასაცემად საქართველოს პრემიერ-მინისტრი ირაკლი ღარიბაშვილი მივიდა.
საქართველოს მთავრობის მეთაურმა თავდაცვის მინისტრთან ირაკლი ალასანიასთან და გენერალური შტაბის უფროსთან, გენერალ-მაიორ ვახტანგ კაპანაძესთან ერთად, ადგილზე მოინახულა სამხედრო დასახლებაში დასრულებული სამი საცხოვრებელი კორპუსი და დაჭრილი სამხედროების ოჯახებს ადაპიტერებული ბინების გასაღები პირადად გადასცა.
„ჯარისკაცებს აქვთ ძალიან საპატიო პროფესია, მაგრამ ამავდროულად მათ აქვთ ძალიან რისკის შემცველი პროფესია. ეს მოითხოვს ძალიან დიდ თავდადებას, თავგანწირვას ქვეყნისთვის ერთგულებას. ისინი საკუთარი სიცოცხლის ფასად მუშაობენ, ემსახურებიან და იცავენ ჩვენს საქართველოს, ჩვენს სამშობლოს. ვიცით, რომ ძალიან ბევრი გმირი გვყავს, ვიცით რომ ძალიან ბევრი ადამიანი - ჩვენი გმირი ჯარისკაცი ღირსეულად დაიღუპა, გმირულად დაიღუპა თავისუფლებისთვის ბრძოლაში. როგორც ქვეყნის მთლიანობისთვის ბრძოლაში, ასევე საერთაშორისო მისიებში გვაქვს მონაწილეობა მიღებული. ჩვენ ძალიან დიდი ღვაწლი მიგვიძღვის საერთაშორისო მშვიდობის დამყარებაში. ასე რომ, ამას სჭირდება შესაბამისი აღნიშვნა. მე ყოველთვის მითქვამს და მინდა გავიმეორო - ქვეყნისა და ხელისუფლების იმიჯი განისაზღვრება იმით, თუ როგორ ვზრუნავთ ჩვენს ჯარისკაცებზე, ჩვენს დაჭრილ გმირებზე, ვეტერანებზე და ა.შ. მიმაჩნია, რასაც ჩვენ დღეს ვაკეთებთ - ეს არის ჩვენი პირველი ვალდებულება. ჩვენ მომავალშიც გავაგრძელებთ. მინდა ვუთხრა ჩვენს გმირ ჯარისკაცებს, რომ მათ ჰქონდეთ ჩვენი იმედი, ვინაიდან ჩვენ გვაქვს მათი იმედი“ - განაცხადა პრემიერ-მინისტრმა ირაკლი ღარიბაშვილმა.
„საქართველოს მთავრობა და თავდაცვის სამინისტრო ჩვენი სამხედროების მიმართ ვალდებულებას ასრულებს. დღეს, სამხედროებს 87 ბინა ჩაბარდათ. აქედან 15 ჩვენი დაჭრილი სამხედროებისთვისაა ადაპტირებული. ეს არის სამსახურეობრივი ბინები. დაჭრილებს თბილისში უკვე გადაეცათ ბინები, მაგრამ ისინი აგრძელებენ სამსახურს გორის აკადემიაში და სჭირდებოდათ ადაპტირებული ბინები. ჩვენ მომავალშიც გავაგრძელებთ იმ ვალდებულებებს, რომელიც ჩვენი სამხედროების წინაშე გვაქვს. იგეგმება ერთი კორპუსის მშენებლობა თბილისში. ასევე, ვფიქრობთ, რომ მნიშვნელოვანია დასავლეთ საქართველოში საბინაო ფონდი შეიქმნას. ჩვენი მთავარი ამოცანაა ჩვენ სამხედროებს ყველა საშუალება მივცეთ, რომ ოჯახები ჰყავდეთ გარანტირებული, ჰყავდეთ გვერდით და ისე ემსახურონ ჩვენ სამშობლოს. ეს, როგორც მთავრობის, ისე თავდაცვის სამინისტროს მთავარ მოვალეობად მიგვაჩნია“- აღნიშნა თავდაცვის მინისტრმა ირაკლი ალასანიამ.
ათივე სამხედრო მოსამსახურეს საკუთრებაში საცხოვრებელი ბინა თბილისში, ვარკეთილის სამხედრო ქალაქში უკვე აქვთ მიღებული. ვინაიდან ისინი ეროვნულ თავდაცვის აკადემიაში განაგრძობენ მუშაობას, სამსახურეობრივი საჭიროებიდან გამომდინარე მათ დროებით სარგებლობაში 10 გარემონტებული ბინა გადაეცათ.
სამხედრო დასახლებაში სამი საცხოვრებელი კორპუსის მშენებლობაა დასრულებული. 87 გარემონტებული ბინიდან 15 სპეციალურად მძიმედ დაშავებული (ამპუტირებული) სამხედრო მოსამსახურეებისთვისაა ადაპტირებული. საცხოვრებელი ბინები კეთილმოწყობილია და საყოფაცხოვრებო ტექნიკითა და ავეჯითაა აღჭურვილი.
გორში სამხედრო დასახლების მშენებლობა 2007 წლის თებერვალში დაიწყო. სამშენებლო სამუშაოები რუსეთ-საქართველოს ომის დროს 2008 წლის აგვისტოში გაჩერდა. მშენებლობა 2013 წლის სექტემბერიდან განახლდა. ბინები ასევე, სამსახურეობრივი საჭიროებიდან გამომდინარე გორის მეხუთე ქვეითი ბრიგადისა და ეროვნული თავდაცვის აკადემიის სამხედრო მოსამსახურეებს დროებით სარგებლობაში გადაეცემათ.
თავდაცვის სამინისტრო მთავრობის მხარდაჭერით ზრუნავს დაშავებულ სამხედრო მოსამსახურეებზე. მათ შორის არის მათი დასაქმება. დაჭრილი სამხედროები ისევ ბრუნდებიან შეიარაღებულ ძალებში და მიღებულ გამოცდილებას კვლავ სამშობლოს სამსახურს ახმარენ.
