ყველამ კარგად ვიცით, ამერიკაში, საფრანგეთში, გერმანიაში, ნებისმიერ დემოკრატიულ ქვეყანაში პოლიციელის მიმართ ხელის აღმართვა ისჯება სისხლის სამართლებრივი წესით, - განაცხადა „ხალხის ძალის“ აღმასრულებელმა მდივანმა, საპარლამენტო ოპოზიციის წევრმა გურამ მაჭარაშვილმა გამოცემა „ბათუმელების“ დირექტორის მზია ამაღლობელის საქმესთან დაკავშირებით.

„ნებისმიერი პირი, რომელიც იძალადებს პოლიციელის მიმართ, უნდა იყოს გამოძიების ობიექტი, დაპატიმრებული და გასამართლებული,“ - ეს არის შეერთებული შტატების ფედერალური საგამოძიებო სამსახურის, იგივე FBI-ის დირექტორის სიტყვები. ახლა გამობრძანდით და დაგმეთ FBI-ის დირექტორის სიტყვები და მერე გავაკეთებთ ჩვენ კომენტარს. ყველამ კარგად ვიცით, ამერიკაში, საფრანგეთში, გერმანიაში, ნებისმიერ დემოკრატიულ ქვეყანაში პოლიციელის მიმართ ხელის აღმართვა ისჯება სისხლის სამართლებრივი წესით“, - განაცხადა გურამ მაჭარაშვილმა.

პატიმრობაში მყოფი მზია ამაღლობელი შიმშილობს. მის გათავისუფლებას ითხოვენ პროტესტის მონაწილეები.

„ბათუმელების“ დამფუძნებლისა და დირექტორის მზია ამაღლობელის წინააღმდეგ გამოძიება სისხლის სამართლის კოდექსის 353-ე პრიმა მუხლით მიმდინარეობს, რაც პოლიციელზე თავდასხმას გულისხმობს და 4-დან 7 წლამდე ვადით თავისუფლების აღკვეთას ითვალისწინებს.