ბიძინა ივანიშვილს თავისი რესურსი არასდროს გამოუყენებია თავისი ფუფუნებისათვის, ქვეყანას დაახარჯა და ახლაც საკმაოდ საინტერესო და საგანგებო მნიშვნელობის პროექტებს ახორციელებს, - განაცხადა საქართველოს პარლამენტის თავმჯდომარის პირველმა მოადგილემ, გიორგი ვოლსკიმ, რომელიც ლორდ დონ ტუიგის განცხადებას გამოეხმაურა.
„პოპულისტური განცხადებაა. ლორდთა პალატის წარმომადგენელს არ უხდება ასეთი განცხადება, რომელიც არ შეესაბამება იმ სტატუსს, რომელიც გააჩნია და არც თვითონ არის მთლად ღარიბი ადამიანი. ბიძინა ივანიშვილს თავისი რესურსი არასდროს გამოუყენებია თავისი ფუფუნებისათვის, ქვეყანას დაახარჯა და ახლაც საკმაოდ საინტერესო და საგანგებო მნიშვნელობის პროექტებს ახორციელებს. არასდროს ქვეყნისთვის არ დაუყვედრებია ის, რასაც აკეთებს. თავისი ქვეყნისთვის ბიძინა ივანიშვილი ყოველთვის იყო თავდადებული პატრიოტი. ამის თაობაზე ან არ იცის პატივცემულმა ლორდმა, ან იცის და საგანგებოდ ქმნის აი ასეთ გარკვეულ განწყობას, რომელიც კონკრეტული პოლიტიკური პარტიების კონკრეტული პოლიტიკური ესტებლიშმენტის ინტერესებში არის გათვალისწინებული“, - განაცხადა ვოლსკიმ.
მორიგ ანტიქართულ განცხადებად და ქვეყნის შიდა საქმეებში ჩარევად ფასდება ევროსაბჭოში ბრიტანეთის დელეგაციის ხელმძღვანელის განცხადება, რომელიც მან რადიო თავისუფლებასთან გააკეთა. მისი თქმით, „ყველაფერი უნდა გაკეთდეს თავისუფლი საზოგადოების დასაცავად, სადაც არსებობენ ადამიანები, რომლებსაც უზარმაზარი ქონება აქვთ, რომელსაც ბოროტად იყენებენ ქვეყნის გასაკონტროლებლად და ძალაუფლების ხელში ჩასაგდებად“. ლორდ დონ ტუიგმა განაცხადა, რომ ბიძინა ივანიშვილის ქონება უნდა ჩამოერთვას.
