რთული გეოპოლიტიკური ვითარების პირობებში, დიდი მნიშვნელობა ენიჭება მშვიდობას, აქედან გამომდინარე, აზერბიჯანში ვიზიტის ფარგლებში, საქართველოს მთავრობის მეთაური მხარეებს სამმხრივი თანამშრომლობის ინიციატივას სთავაზობს, რომელიც ითვალისწინებს სამხრეთ კავკასიის სამივე ქვეყნის ჩართულობას. როგორც ირაკლი კობახიძემ აღნიშნა, საქართველო გულწრფელად არის დაინტერესებული, განახორციელოს კონკრეტული პრაქტიკული ნაბიჯები და ხელი შეუწყოს თანამშრომლობას რეგიონში.

„რეგიონსა და მსოფლიოში სწრაფად ცვალებადი და რთული გეოპოლიტიკური ვითარების პირობებში, კიდევ უფრო დიდი მნიშვნელობა ენიჭება მშვიდობასა და სტაბილურობას, როგორც საკვანძო მოცემულობას რეგიონული განვითარებისა და მდგრადი კეთილდღეობისათვის. დარწმუნებული ვარ, რომ ერთობლივი ძალისხმევით არა თუ გადავლახავთ ყველა გამოწვევას, არამედ გამოვიყენებთ არსებულ შესაძლებლობებს კიდევ უფრო ეფექტიანი თანამშრომლობისათვის.

ჩვენ გულწრფელად ვართ დაინტერესებული განვახორციელოთ კონკრეტული პრაქტიკული ნაბიჯები და ხელი შევუწყოთ თანამშრომლობას რეგიონში. საქართველო მხარეებს სთავაზობს სამმხრივი თანამშრომლობის ინიციატივას, რომელიც ითვალისწინებს სამხრეთ კავკასიის სამივე ქვეყნის ჩართულობას სხვადასხვა სფეროების მიმართულებით“, - აღნიშნა ირაკლი კობახიძემ.

თავის მხრივ, აზერბაიჯანის პირველმა პირმა ილჰამ ალიევმა მთავრობის მეთაურს მადლობა უთხრა იმასთან დაკავშირებით, რომ საპარლამენტო არჩევნების შემდეგ, პირველი უცხოური ვიზიტი აზერბაიჯანში დაგეგმა და როგორც პრეზიდენტმა აღნიშნა, ეს არის სიმბოლო, რომ უმაღლესი დონის ურთიერთობები აქვს აზერბაიჯანსა და საქართველოს.

„ეს ვიზიტი განსაკუთრებული მნიშვნელობის არის იმდენად, რამდენადაც საპარლამენტო არჩევნების შემდეგ თქვენი პირველი უცხოური ვიზიტია. ვიყენებ შესაძლებლობას და მოგილოცავთ „ქართულ ოცნებას“ გამარჯვებას. გისურვებთ თქვენ და თქვენს გუნდს წარმატებას.

პირისპირ შეხვედრაზე ვისაუბრეთ დაკავშირებადობაზე, „შუა დერეფნის“ პროექტზე. ჩვენი ქვეყნები მჭიდროდ თანამშრომლობენ. ჩვენი ჩართულობა რეგულარულია. დარწმუნებული ვარ, ეს პროექტი წარმატებული იქნება. ამ პროექტში მჭიდრო კავშირი უნდა შევინარჩუნოთ სამეზობლოში სხვა ქვეყნებთან. აზერბაიჯანი და საქართველო იქნება ის კავშირი და ხიდი, რომელიც დამყარდება ევროპასა და აზიას შორის. ჩვენ წარმატებულად ვახორციელებთ ამას. ვიცით, რომ ტრანსპორტის ინფრასტრუქტურა საქართველოშიც ფართოვდება, როგორც აზერბაიჯანში. ეს განსაკუთრებით შეეხება სატრანსპორტო ინფრასტრუქტურის გაციფროვნებას. ეს ძალისხმევა მიმდინარეობს ორივე ქვეყანაში, იმ ერების საკეთილდღეოდ, რომელსაც წარმოვადგენთ.

ჩვენ ვართ უცილობელი პარტნიორები და ძალიან ფასეული სერვისები შეგვიძლია შევთავაზოთ სხვებსაც. ძალიან ბევრის მიღწევა მოვახერხეთ, დეტალებში არ შევალ, ამას გაფართოებულ ფორმატში განვიხილავთ. მინდა დავამატო, რომ თქვენი პარტიის წარმატება უზრუნველყოფს იმ ფაქტს, რომ სამხრეთ კავკასიაში იქნება სტაბილურობა“, - აღნიშნა ილჰამ ალიევმა.

რაც შეეხება სამხრეთ კავკასიური სამეულის გაერთიანებას, ეს არის პოლიტიკის მეცნიერებათა დოქტორის, პოლიტოლოგის ირაკლი გოგავას ფავორიტი სცენარი საქართველოსთვის, რომლის შეფასებით, სწორედ ეს არის სამხრეთ კავკასიური სამეულის ზომიერი ეკონომიკური ინტეგრაცია, სადაც სომხეთი, აზერბაიჯანი და საქართველო საერთო ეკონომიკურ ბაზარს ქმნიან და სადაც განვითარების გაცილებით მეტი შესაძლებლობებია.

ირაკლი გოგავას განცხადებით, თუკი კარგად დავთვლით საქართველოს, სომხეთის და აზერბაიჯანის მიერ ერთიანი ეკონომიკური სივრცის პერსპექტივას, მივიღებთ, რომ ეს რეგიონი მსოფლიოს ერთ-ერთი უმდიდრესი და სწრაფად განვითარებადი სივრცე გახდება. პოლიტოლოგმა ასეთი მოდელირება გააკეთა თანამოაზრეებთან ერთად.

„საქართველოს გეოსტრატეგიული მდებარეობა შავ ზღვაზე და მსოფლიო ოკეანეზე გასასვლელი, ბაქოს ენერგეტიკული რესურსები, სომხეთის უძლიერესი დიასპორა, რომელსაც ბევრ სახელმწიფოზე გავლენები აქვს, ერთ საქმეს რომ მოემსახუროს, ასეთ ერთობას დიდი პერსპექტივა და ძალა ექნება. გეოპოლიტიკური ინტერესები კარნახობს ერთ რამეს - მხოლოდ ერთობაში არის სწორი გზა და განვითარების მართებული ვექტორი. ერთობა არ ნიშნავს იმას, რომ ერთი სახელმწიფო ჩამოვაყალიბოთ. არა, რა თქმა უნდა. ის, რასაც პრემიერი საკმაოდ ზომიერად ამბობს, მე, ჩემს გამოსვლებში უფრო მკაფიოდ ვამბობ - საჭიროა სამხრეთ კავკასიაში სამმა სახელმწიფომ შექმნას საერთო ბაზარი. ეს ნიშნავს იმას, რომ ხდება შრომის დანაწილება, იმ სფეროების განსაზღვა, რომელი ქვეყანა რას აწარმოებს და შემდეგ უკვე ერთმანეთისთვის უზრუნველვყოფთ ამის რეალიზაციის ბაზარს. ზომიერი პროტექციონისტული პოლიტიკა, რომ ამ საერთო ბაზარზე, რომელიც 17 მილიონიანია, დავიცვათ საკუთარი მწარმოებლები, ზომიერი საიმპორტო ბაჟით. ეს ნიშნავს, რომ შეიქმნება უამრავი სამუშაო ადგილი მაღალი ხელფასებით, საიდანაც სოციალური ანარიცხები წავა ბიუჯეტში და დარიგდება უფრო მაღალი პენსიები და სოციალური შემწეობები. ამის უზრუნველყოფა ერთად ყოფნაში შეუძლია ამ სამ სახელმწიფოს. ამაზე საუბრობს საქართველოს პრემიერ-მინისტრი აზერბაიჯანში“, - აღნიშნა for.ge-სთან საუბრისას ირაკლი გოგავამ.

პოლიტოლოგის განცხადებით, აზერბაიჯანი-საქართველოს ურთიერთობები გრძელდება, ღრმავდება. ორ ქვეყანას შორის არსებობს სტრატეგიული პარტნიორობა და საქართველოს პრემიერის აზერბაიჯანში ვიზიტი ამის ერთ-ერთი გამოხატულებაა.

„სამხრეთ კავკასიას რაც შეეხება, ჩვენ გვაქვს სამი სახელმწიფო -აზერბაიჯანი, საქართველო, სომხეთი და ყველას აქვს თავისი განვითარების ვექტორი. რაც დამოუკიდებლობა მივიღეთ უნიკალური გზა გაიარეს ამ ქვეყნებმა. საქართველომ სამოქალაქო ომი, ასევე სამოქალაქო ომი აფხაზეთში და ცხინვალის რეგიონეში, რუსეთთან ომი და ბოლოს ეს დასავლური ვექტორი იქნა არჩეული, ნატოსკენ და ევროკავშირისკენ სვლა, თუმცა წლებმა გაიარა და მივხვდით, რომ არც ნატო და არც ევროკავშირი ჩვენს მიღებას არ აპირებს და ეს არის სატყუარა იმისთვის, რომ გაგვაკეთებინონ ის, რაც მათ სჭირდებათ და ასეთი მოდელი დაგვილაგეს.

აზერბაიჯანი, სხვა მოდელით წავიდა. გახდა მიუმხრობელი ქვეყანა - არც ნატოსკენ და არც ევროკავშირისკენ არ ისწრაფვის და ეს თავიდანვე განაცხადეს. ფაქტობრივად, მან შეინარჩუნა ნეიტრალიტეტი, არ არის არც ერთი სამხედრო ბლოკის წევრი. არის დსთ-ს წევრი, არ შევიდა საბაჟო კავშირში - რუსეთის ეკონომიკურ განვითარებაში და შეძლო მაქსიმალური - აიღო სუვერენიტეტი, მიუხედავად იმისა, რომ ეს არ იყო იოლი. აზერბაიჯანს ძალიან ებრძოდნენ. ჰეიდარ ალიევს რამდენჯერმე გადატრიალება მოუწყვეს, იყო თავდასხმის მცდელობაც, მაგრამ დაიცვეს სუვერენიტეტი. მე-5 კოლონა არ გააჭაჭანეს და შედეგად მიიღეს ის, რომ აზერბაიჯანი ვითრდება სუვერენული აზერბაიჯანის გეგმით და აღადგინა ტერიტორიული მთლიანობა.

რაც შეეხება სომხეთს, მთელი ეს წლები იყო რუსეთის ორბიტაზე და რუსეთის მხარდაჭერით ახერხებდა მთიანი ყარაბაღის შენარჩუნებას. ეკონომიკას თუ გადავხედავთ, სომხეთს საქართველოზე ნაკლები მაჩვენებელი აქვს, მაგარამ სომხეთს არ აქვს ტურიზმი, ზღვაზე გასასველი, არ აქვს ტრანზიტული ფუნქციები და მიუხედავად ამისა, თითქმის ჩვენნაირი მონაცემები აქვს, რაც ნიშნავს იმას, რომ სტრუქტურულად სწორი ეკონომიკა აქვს ჩვენთან შედარებით“, - აცხადებს for.ge-სთან საუბრისას ირაკლი გოგავა.