„ქართული ოცნების“ საპატიო თავმჯდომარე ბიძინა ივანიშვილი აშშ-ის სახაზინო დეპარტამენტმა დაასანქცირა. აშშ-ის სახაზინო დეპარტამენტის უცხოური აქტივების კონტროლის ოფისი (OFAC) ავრცელებს განცხადებას, რომლის თანახმადაც, „როგორც რუსეთთან დაკავშირებულ პირზე, ბიძინა ივანიშვილზე და მის მიერ კონტროლირებულ კომპანიებზე სანქციების შედეგად რიგი შეზღუდვები წესდება. შეზღუდვები ვრცელდება ყველა ტრანზაქციაში, რომელშიც ივანიშვილის მფლობელობაში მყოფი ნებისმიერი კომპანია მიიღებს მონაწილეობას, მიუხედავად იმისა ის მას პირდაპირ თუ არაპირდაპირ აკონტროლებს, ინდივიდუალურად თუ ჯგუფურად, 50%-ს თუ მეტს“.

აშშ-ის სახელმწიფო მდივნის, ენტონი ბლინკენის თქმით, აშშ ასანქცირებს ბიძინა ივანიშვილს, რუსეთის ფედერაციის სასარგებლოდ საქართველოს დემოკრატიისა და ევროატლანტიკური მომავლის ძირის გამოთხრისთვის. მისივე განმარტებით, ივანიშვილისა და „ქართული ოცნების“ ქმედებებმა ჩამოშალა დემოკრატიული ინსტიტუტები, ხელი შეუწყო ადამიანის უფლებების შელახვას და აღკვეთა ფუნდამენტური თავისუფლებებით სარგებლობის უფლება საქართველოში.

აღნიშნულს გამოეხმაურნენ საქართველოშიც. პრემიერ-მინისტრ ირაკლი კობახიძის შეფასებით, ბიძინა ივანიშვილის ფორმალური დასანქცირებით არაფერი შეცვლილა, რადგან დე ფაქტო ისედაც დასანქცირებულია. მისივე შეფასებით, ეს არის რეალურად ჯილდო ჩვენი ქვეყნის ეროვნული ინტერესების დაცვისთვის.

„ბატონი ბიძინა ივანიშვილი აქამდეც იყო დე ფაქტო სანქციების ქვეშ და მას აშანტაჟებდნენ მთელი სამი წლის განმავლობაში თითქმის ფორმალური სანქციებით. ახლა ეს შანტაჟის საფუძველიც გამოეცალათ ხელიდან. რაღა ეშველება ოპოზიციას, არ ვიცი. ეს არაფორმალური სანქციები მოქმედებდა ერთადერთი რამის გამო - ამ ადამიანმა არ დათმო ამ ქვეყნის ეროვნული ინტერესები.

თქვენ იცით, რა იყო ჩვენი ქვეყნის გამოწვევები 2022 წელს, რას ითხოვდნენ გუნდისგან, რას ითხოვდნენ კონკრეტულად ბატონი ბიძინა ივანიშვილისგან და სწორედ იმის გამო, რომ ის არ დაუპირისპირდა ჩვენი ქვეყნის ძირეულ, საკვანძო ინტერესებს, ამის გამო ჯერ აამოქმედეს დე ფაქტო სანქციები და ახლა უკვე, საბოლოო ჯამში, მიიღეს ისეთი გადაწყვეტილება, რასაც არ აქვს არავითარი არსებითი დატვირთვა. პირიქით, ამ გადაწყვეტილებით საბოლოო ჯამში გამოიცალეს მათ ხელიდან შანტაჟის ინსტრუმენტი. მე მაქვს ძალიან დიდი იმედი, რომ ყველაფერი სხვა მიმართულებით შეიცვლება. მე მქონდა საუბარი ახლახან ბატონ ბიძინა ივანიშვილთან და მისი პოზიციაც არის ზუსტად იგივე - არაფერი განსაკუთრებული, რეალურად ეს არის ჯილდო ჩვენი ქვეყნის ეროვნული ინტერესების დაცვისთვის“, - განაცხადა პრემიერმა.

ანალიტიკოსი ედიშერ გვენეტაძე მიიჩნევს, რომ ბიძინა ივანიშვილმა იცოდა თუ რაზე მიდიოდა, რადგან „ის ცარიელ ნიადაგზე არ აკეთებს იმას, რასაც აკეთებს“.

„ამ წუთებში ბედნიერი და დაუმარცხებელია ის, ვისაც სამშობლოსთვის უძგერს გული - ბიძინა ივანიშვილს სამშობლოს სიყვარულისთვის ვიღაც გადამთიელები ასანქცირებენ, რომლებმაც ვერაფერი მოახერხეს, რა მეხუთე კოლონები არ შექმნეს - ამდენ ხანს ქურდს თუ არ მოუჩანდა მამლის კუდი, ახლა გამოჩნდა ეს კუდი და ეს არის ამერიკის შეერთებული შტაბები, ბაიდენი და მისი სანაგვეზე მიმავალი სამარცხვინო ადმინისტრაცია, რომლის მსგავსი ამერიკას არ ახსოვს. ბიძინა ივანიშვილმა იცოდა რაზე მიდიოდა - ის ცარიელ ნიადაგზე არ აკეთებს იმას, რასაც აკეთებს. ბიძინა ივანიშვილი აკეთებს იმას, რასაც ჰქვია ჩვენი ქვეყნის თავისუფლება, დამოუკიდებლობა და წინსვლა“, - განაცხადა გვენეტაძემ.

ედიშერ გვენეტაძის თქმითვე, ამერიკის შეერთებულმა შტატებმა დღევანდელ დღემდე საქართველოს წინააღმდეგ ყველაფერი გააკეთა, ახლა მათი მხრიდან მხოლოდ ომის გამოცხადებაღა დარჩა.

„მანამდე ძალიან ფერმკრთალი იყო ოპოზიცია და ამ სანქციებით ოდნავ ფერი მიეცემათ, მაგრამ რა უნდა გააკეთონ? ვერაფერსაც ვერ გააკეთებენ. მიხეილ ყაველაშვილი არჩეულია პრეზიდენტად და ჩატარდება მისი ინაუგურაცია. ჩვენ ვართ სახელმწიფო და ვინმეს ხელი არ წაუცდეს სახელმწიფოს წინააღმდეგ, თორემ ის მიიღებს იმას, რაც მისაღებია.

20 იანვრამდე ბევრი დრო არ დარჩა - რა თქმა უნდა, აშშ-საქართველოს ურთიერთობები გადაიტვირთება, მაგრამ ამერიკის შეერთებულ შტატებს დარჩა ერთადერთი რამ საქართველოს მიმართ, ეს არის ომის გამოცხადება, დანარჩენი მან ყველაფერი გააკეთა დღევანდელი დღის ჩათვლით“, - დასძინა ედიშერ გვენეტაძემ For.ge-სთან ინტერვიუში.

თბილისის მერმა, კახა კალაძემ იმედი გამოთქვა, რომ აშშ-ს ახალი ადმინისტრაციის ფარგლებში მთლიანად გადაიტვირთება ურთიერთობა და ყველაფერი დალაგდება. ბიძინა ივანიშვილის დასანქცირების საკითხს ასევე გამოეხმაურა „ქართული ოცნების“ ერთ-ერთი ლიდერი მამუკა მდინარაძე. მისი თქმით, ოპოზიცია სხვაგან დამარცხებულების უსუსურ და უშედეგო კუდის ქნევას ზეიმობს.

„კიდევ ერთი მთავარი განსხვავება ჩვენსა და აგენტურულ ოპოზიციას შორის: ჩვენ ქართველი ხალხის გადაწყვეტილებები გვიხარია და გვეზეიმება-ხოლმე და მათ - უცხოელების. ამიტომაც ვართ დაუმარცხებლები! ისე, რა საცოდავ დღეში არიან, სხვაგან დამარცხებულების უსუსურ და უშედეგო კუდის ქნევას რომ ზეიმობენ“, - დაწერა მდინარაძემ.