რაზეც ირაკლი კობახიძე გააფრთხილეს, მასთან ნათქვამი, ალბათ, ყველაზე მეტად ბიძინა ივანიშვილს ეხება, - ასე გამოეხმაურა ექსპერტი რამაზ საყვარელიძე იმ ფაქტს, რომ „ქართული ოცნების“ გუშინდელ ღონისძიებაზე, პარტიის საპატიო თავმჯდომარის, ბიძინა ივანიშვილის ტრიბუნა ტყვიაგაუმტარ მინებში იყო მოთავსებული.

როგორც საყვარელიძემ „ინტერპრესნიუსს“ განუცხადა, საფრთხის დონე გაზრდილია, ვინაიდან „რუსეთს, ჩინეთ-ევროპის სატრანსპორტო მაგისტრალის „გაფუჭება“ სურს და ამისათვის „სისხლს“ არ მოერიდება“. საყვარელიძემ ხაზი გაუსვა, რომ ბიძინა ივანიშვილმა ამგვარი თავდაცვა 2012 წელსაც გამოიყენა.

„შუშასთან დაკავშირებით გაჩენილ აჟიოტაჟს რაც შეეხება, აღსანიშნავია, რომ 2012 წელს, საარჩევნო კამპანიის დროსაც იდგა საკითხი, რომ შესაძლოა, მას საფრთხე შეჰქმნოდა. დღევანდელ დღეს, როცა ტრამპს „ყური გაუხვრიტეს“ და შემთხვევით გადარჩა, თან პოლიტიკოსებზე თავდასხმის რამდენიმე შემთხვევაც გვაქვს... აღსანიშნავია, რომ ამ ქარიშხლის ერთ-ერთი ძალა, ჩვენი ჩრდილოელი მეზობელიცაა, რომელიც, როცა სჭირდება სისხლს არ ერიდება. მას ჩინეთიდან წამოსული სატრანსპორტო ხაზის გაფუჭება სჭირდება და ამის ერთ-ერთი საშუალება, ნომერ პირველ პოლიტიკოსზე თავდასხმაა, რაზეც ირაკლი კობახიძეც გააფრთხილეს, მასთან ნათქვამი, ალბათ, ყველაზე მეტად ბიძინა ივანიშვილს ეხება“, - განაცხადა რამაზ საყვარელიძემ.

რაც შეეხება უშუალოდ ივანიშვილის გზავნილებს, მათ შორის იმასთან დაკავშირებით, რომ არჩევნებს რეფერენდუმის დატვირთვა აქვს, რამაზ საყვარელიძის განმარტებით, მმართველ პარტიას უნდა, რომ ევროპის კარები ისე შეაღოს, როგორც ღირსების მქონემ და ევროპაც უთანხმდებოდეს ამ თუ იმ ნაბიჯებზე და არა კარნახობდეს.

„დადებითი მოვლენაა, რომ ადამიანი, რომელსაც „ქართული ოცნების“ წიაღში მნიშვნელოვან და გადამწყვეტ პერსონად გულისხმობენ, თვითონ გამოდის და მოსახლეობას თავის პოზიციას აცნობს. თანაც იმ ფონზე, როდესაც პარტნიორები მუდმივად აპელირებენ, რომ ასეთმა საკვანძო ფიგურამ საზოგადოებას თვისი მოსაზრებები და მიზნები გააცნოს. მისი მხრიდან სწორედ ამგვარი ნაბიჯი გადაიგა...

წინა მოვლენებმა, ეს არჩევნები რეფერენდუმი გახადა. რეფერენდუმის ხსენებით, ფაქტობრივად, აქცენტი გაკეთდა იმაზე, ენდობა თუ არა საზოგადოება, „ქართულ ოცნებას“ - ევროპულ ორიენტაციაში. „უცხოური გავლენის გამჭვირვალობის შესახებ“ კანონმა დიდი ძვრები გამოიწვია, და, პრაქტიკულად, ფორმულა გააჩინა, რომ „ქართული ოცნება“ რუსეთისკენ მიდის.

ცხადია, „ქართული ოცნება“ ევროპისკენ მიდის, როგორც სხვა ყველა. მმართველ პარტიას უნდა, რომ ევროპის კარები ისე შეაღოს, როგორც ღირსების მქონემ და ევროპაც უთანხმდებოდეს ამ თუ იმ ნაბიჯებზე და არ კარნახობდეს. სურთ, რომ ევროპა მათ, როგორც პარტნიორს და არა როგორც სატელიტს ისე მოექცნენ. სწორედ ეს პრინციპია დღეს სარეფერენდუმო“, - განაცხადა რამაზ საყვარელიძემ.

გარდა ამისა, პოლიტოლოგი გამოეხმაურა გზავნილს წინა ხელისუფლების წარმომადგენლების პასუხისგების აუცილებლობის შესახებ, რაზეც ბიძინა ივანიშვილმა მცხეთაში შეხვედრისას, ასევე, აქცენტირებულად ისაუბრა.

მისი თქმით, ოპოზიციური ფიგურების ბრალეულობა მხოლოდ სასამართლომ შეიძლება გადაწყვიტოს და არა პოლიტიკურმა ჯგუფმა.

„წინა ხელისუფლების ჩადენილ დანაშაულებთან დაკავშირებით მათ გასამართლებას რაც შეეხება, ვისურვებდი, რომ მათ ამგვარ კითხვებზე, რომელიც საზოგადოებაში ჩნდება და ლოგიკურია, მოხსენების დროსვე გასცენ პასუხი. მახსოვს, 2012 წელს, როდესაც ბიძინა ივანიშვილი ქართულ პოლიტიკაში შემოვიდა და პრემიერ-მინისტრის ადგილი დაიკავა, სწორედ ანალოგიური განცხადებები გაკეთდა.

მაშინ ამგვარი საკითხი მოსამართლეებთან დაკავშირებითაც იდგა. სასამართლო სისტემაში კადრებს წლობით აღზრდა სჭირდებათ და მათი შეცვლა სწრაფად შეუძლებელია. ბიძინა ივანიშვილის მაშინ ჰქონდა გეგმა, რომ ამ ძველ კადრებს ახალ პოლიტიკაზე ემუშავათ და მან ეს ძველი სასამართლო კორპუსი დაიტოვა.

თუ ყველას მიმართ დაიწყება ანგარიშსწორება, მაშინ მოხდება ის, რაც საფრანგეთში რევოლუციონერებმა გააკეთეს, რომელიც მათი ისტორიის შავი ლაქა გახდა. თავის დროზე მმართველმა პარტიამ საკვანძო პოლიტიკური ფიგურების მიმართ დაიწყო ბრალდებების წაყენება, თუმცა იერარქიაში ვინც უფრო დაბლა იყო, მათ სისტემის ცვლილება არ შეხებიათ. ამ პრინციპმა რაღაც ხარისხით იმუშავა, თუმცა პრობლემურიც აღმოჩნდა.

როგორც აღმოჩნდა, გარკვეული პირების მხრიდან საქართველოს მისამართით ანტისახელმწიფოებრივი ნაბიჯები იდგმება. მოსამართლეებთან ვნახეთ, რომ პრობლემები არ არის და დავინახეთ, რომ სასამართლო სისტემის ხარისხი უარესად არ გამოიყურება, ვიდრე ადრე იყო. როდესაც ბლინკენი მოსამართლეებზე გვედავება, ეს პოლიტიკური ნაბიჯია. მას გარკვეული მოსაზრებები მიაწოდეს, რომ „ქართული ოცნების“ მართლმსაჯულება ვიღაცებს იფარავს, ვისაც არ უნდა იფარავდეს. ასეთი ბრძოლის ფრონტი რომ გაიხსნა მათი მხრიდან, მათ მიმართ სამართლებრივი დევნა არ განხორციელებულა, სწორედ ამ ადამიანებზეა საუბარი. „ქართული ოცნება“ იმ დასკვნამდე მიდის, რომ ვიღაცებს ბრალი უნდა ჰქონდეთ წაყენებული, რომელიც თავის დროზე დააშავეს. ასევე, ეს ყველაფერი მეორე ნაწილსაც ეხება, ადამიანებს, რომლებიც საქართველოს ხელს უშლიან ქვეყნის გარედან.

ახლა საქართველო ძალიან რთულ მდგომარეობაშია ჩინეთთან ურთიერთობების გაღრმავების გამო, აშშ-სა და ევროპის ქვეყნებს სურთ, რომ დესტაბილიზაციით სატრანსპორტო დერეფანს საფრთხე შეუქმნან. ეს წმინდა ქართული პროცესი არ არის, ეს უფრო რთულ პროცესში ქვეყნის გადარჩენის ამოცანაა, ჩვენ საერთაშორისო რთულ სიტუაციაში ვართ. აღსანიშნავია, რომ ოპოზიციური ფიგურების ბრალეულობა, მხოლოდ სასამართლომ შეიძლება გადაწყვიტოს და არა პოლიტიკურმა ჯგუფმა.

განცდა მაქვს, რომ თუ საკონსტიტუციო უმრავლესობას მოიპოვებენ, რაღაც ნაბიჯები გადაიდგმება იმ მიმართულებით, რაზეც ისაუბრეს. ვისურვებდი, რომ მმართველი პარტიის მხრიდან ეს პოლიტიკური რიტორიკა, რომელიც უდავოდ არის მშვიდობის გარანტი, იმ პოლიტიკის, რომელიც ამ ქარიშხალში საქართველოს უვნებლად გაყვანას ცდილობს და ვისურვებდი, რომ მომავალ გამოსვლებში იმ კითხვებზე პასუხი იყოს გაცემული, რომელიც საზოგადოებაში ჩნდება“, - განაცხადა რამაზ საყვარელიძემ.