არასამთავრობო ორგანიზაციის წარმომადგენლის ლევან ცუცქირიძის „თავისუფლების მოედანის“ წევრები „ლელოში“ გაწევრიანდნენ, თუმცა „ქრონიკის“ ინფორმაციით, პოლიტიკურ ორგანიზაციას „თავისუფლების მოედანს“, რომელიც შეუერთდა „ლელოს“ და „ლელოს“ სიით აპირებს არჩევნებში მონაწილეობას, ოფიციალურად არც პარტიის და არც ორგანიზაციის სტატუსი არ აქვს.

საჯარო რეესტრის ოფიციალური მონაცემების თანახმად, ლევან ცუცქირიძე არის არასამთავრობო ორგანიზაციის ხელმძღვანელი, თუმცა თავად ამას უარყოფს და ამბობს, რომ ორგანიზაციაში მხოლოდ დამფუძნებლის სტატუსი დაიტოვა.

„დამფუძნებელი არ ნიშნავს ხელმძღვანელობას და მენეჯმენტს. მართვის მოვალეობები გადაბარებული აქვთ ჩემს თანამშრომლებს. ჩვენ გვაქვს ჩვენი დღის წესრიგი, რომელსაც მივყვებით და როდესაც მივიღებთ გადაწყვეტილებებს, ყველაფერი იქნება ისე, როგორც კანონი და ჩვენი პოლიტიკური გეგმა მოითხოვს. „თავისუფლების მოედანი“ ასევე არის რეგისტრირებული“, - აღნიშნა ცუცქირიძემ.