„მკაცრად იქნება აღკვეთილი თავისუფალ მედიასაშუალებებზე ზეწოლისა და მუქარის განხორციელების ნებისმიერი ფაქტი,“- ეს არის ციტატა განცხადებიდან, რომლითაც მთავარი პროკურატურა TV3-ის საგანგებო განცხადებას გამოეხმაურა. ტელეკომპანია „ნაციონალური მოძრაობის“ წარმომადგენლებს ზეწოლასა და შანტაჟში ადანაშაულებს და პარტიის წინააღმდეგ სამართლებრივ ბრძოლას იწყებს.

რატომ გაუჩნდათ „ნაციონალური მოძრაობის“ წარმომადგენლებს TV3-ის კონტროლის სურვილი და არღვევს თუ არა ტელეარხის ხელმძღვანელი „მაუწყებლის შესახებ“ კანონს?- ამ და სხვა აქტუალურ კითხვებზე For.ge-სთან TV3-ის გენერალური დირექტორი კახა ბაინდურაშვილი საუბრობს.

ბატონო კახა, პროკურატურა უკვე გამოეხმაურა TV3-ის საგანგებო განცხადებას და საკითხის შესწავლის სურვილიც გამოთქვა. როდის გეგმავთ სამართალდამცველი ორგანოებისთვის კონკრეტული ფაქტების მიწოდებას?

- მოთხოვნების შესაბამისად მოვიქცევით. ვფიქრობთ, რომ ამ გზით პრობლემის მოგვარება მართებული იქნება, რადგან ბოლო პერიოდში ტელევიზიაზე ზეწოლამ კამპანიური ხასიათი მიიღო. ფაქტობრივი მტკიცებულება გაგვაჩნია და დაინტერესებულები ვართ, მას სახელი დაერქვას სამართლებრივ ენაზეც. ასევე გვსურს, ამ ქმედებებს სახელი დაერქვას მორალის კუთხითაც. გაირკვეს, რამდენად მორალურია, როდესაც პარტია, რომელსაც „დემოკრატიის შუქურად“ მოაქვს თავი და დემოკრატიის მორალს უკითხავს საზოგადოებას, ტელევიზიის დამფუძნებლების გვარს 24 საათის განმავლობაში ატრიალებს და ცილს სწამებს.

როცა გივი თარგამაძე ვინმეს უწოდებს „კრიმინალური ჯგუფის წევრს“ მისთვის ეს ჩვეულებრივი მოვლენაა, მაგრამ კონკრეტული ადამიანისთვის ეს არის ღირსების შემლახველი განცხადება. მათ მოუწევთ სასამართლოსთვის კონკრეტული მტკიცებულებების წარდგენა და თუ ვერ წარადგენენ, შესაძლოა, ფინანსური სანქცია დაეკისროთ - მინიმუმ, ბოდიშის მოხდა მოუწევთ.

ჩვენ ნებისმერ დროს მზად ვართ ჩვენ ხელთ არსებული ფაქტობრივი მასალები გადავცეთ სამართალდამცველებს.

რა ტიპის ფაქტებზეა საუბარი და თუ აპირებთ ამ ფაქტების გასაჯაროებას?

- რაც შეეხება ფაქტების გასაჯაროებას - მედია არ შეიძლება შედიოდეს რომელიმე კონკრეტულ პარტიასთან პოლემიკაში. ეს არ იქნება მართებული. შესაბამისად, არ ვაპირებთ ერთგვარი ცირკის მონაწილეები გავხდეთ. დავიცავთ პროცედურებს და მივყვებით ცივილურ, სამართლებრივ გზას.

სიჩუმეს სულ უფრო მეტი თავდასხმა მოჰყვა. სწორედ, ამიტომ ჩავაყენეთ საზოგადოება საქმის კურსში. კონკრეტულ ზეწოლასა და შანტაჟზეა საუბარი. მაგალითად, ერთ-ერთი მოთხოვნა იყო, რომ არ უნდა გასულიყო ეთერში გადაცემა „ანატომია“.

ჩვენი ინფორმაციით, ტელევიზიის ხელმძღვანელებმა „ნაციონალური მოძრაობის“ წარმომადგენლებისგან ასევე მიიღეს მითითება, რომ საინფორმაციო გამოშვებაში გიგი უგულავას შესახებ არ მომზადებულიყო სიუჟეტები. ადასტურებთ ამ ინფორმაციას?

- თავს შევიკავებ მეტ დეტალებზე საუბრისგან. ეს უკვე სამართლებრივი შეფასების საკითხია. ვითანამშრომლებთ სამართლადამცველებთან და გასაჯაროვდება ის ფაქტები, რასაც სამართალდამცავი უწყებები მიიჩნევენ საჭიროდ.

ტელევიზიის მიერ გავრცელებული საგანგებო განცხადების ადრესატები არასამთავრობო ორგანიზაციები და დიპლომატიური კორპუსის წარმომადგენლებიც იყვნენ. თუ შეხვდით მათ უკვე?

- არასამთავრობოებს შევხვდით. კონკრეტულ არასამთავრობოებთან კვლავ გვექნება ინდივიდუალური შეხვედრა. დავუკავშირდით დიპლომატიურ კორპუსსაც, მაგრამ კათოლიკური შობის დღესასწაულის გამო დიპლომატიური წარმომადგენლობის უმეტესობა შეზღუდულ რეჟიმში მუშაობს. უახლოეს დღეებში ვხვდები ევროკავშირის ელჩს ფილიპ დიმიტროვს, ასევე შევხვდები აშშ-ის, ბრიტანეთის, საფრანგეთის, გერმანიის და სხვა ქვეყნების ელჩებს.

პრაქტიკიდან გამომდინარე, მედიის კონტროლის ცდუნება, როგორც წესი, ხელისუფლებას აქვს ხოლმე. რატომ გაუჩნდათ TV3-ის კონტროლის სურვილი „ნაციონალური მოძრაობის“ წარმომადგენლებს და არა, ვთქვათ, „ლეიბორისტულ პარტიის“ ლიდერებს?

- არ ვიცი, ეს მათ უნდა ჰკითხოთ. ეჭვის დონეზე, შესაძლოა, ვიფიქროთ, რომ ამგვარი სურვილი უკავშირდება საგამოძიებო ჟურნალისტიკას. სხვა არხზე, ამ ეტაპზე, მსგავსი გადაცემები არ გადის.

ბატონო კახა, თქვენ „ნაციონალური მოძრაობის“ ხელისუფლებაში ყოფნის დროს ფინანსთა მინისტრი იყავით და პარტიის ბევრ წარმომადგენელს საკმაოდ კარგად იცნობთ. ამის გამოც ხომ არ აქვთ მოთხოვნები და „პრეტენზიები“ „ნაციონალური მოძრაობის“ წევრებს თქვენი ტელევიზიის მიმართ?

- ვერ გეტყვით, რა მოტივაცია გაუჩნდათ და რატომ. არ მინდა სპეკულაცია, თორემ, ეჭვი, შესაძლოა, ძალიან ბევრი გამაჩნდეს. ეჭვებზე საუბარი კი უმართებულოდ მიმაჩნია.

უშუალოდ ტელევიზიის შესახებაც გკითხავთ - TV3-ს დღემდე არ აქვს სტუდიური საინფორმაციო გამოშვება, თუ იგეგემება, ამ მხრივ, რამე სიახლე და როდიდან?

- სტუდიური საინფორმაციო გამოშვებები ჩვენ გვქონდა ერთი პერიოდი, როცა ეკონომიკური მიმართულება გვქონდა, შემდეგ პოლიტიკური მიმართულება დავამატეთ და გადაიდო ეს საკითხი. ვფიქრობთ, სტუდიური საინფორმაციო გამოშვებები ძველი ახალი წლის შემდეგ კვლავ გავუშვათ ეთერში.

მედიასაშუალებებით გავრცელდა ინფორმაცია, რომ იანვრიდან TV3-დან მიდის თოქშოუ „დიდი პოლიტიკის“ წამყვანი ინგა გრიგოლია. ეს ფაქტი, ალბათ, ტელევიზიის რეიტინგზე მნიშვნელოვნად იმოქმედებს.

- არ ვიცი ტოვებს თუ არა ტელევიზიას. მას გააჩნია კონტრაქტი TV3-თან და კონტრაქტის მიხედვით გააჩნია კონკრეტული ვალდებულებები. თუ გადაწყვეტს კონტრაქტის მოშლას და შეწყვეტას, ეს საკითხი წესისამებრ განსაზღვრული პროცედურებით დარეგულირდება. ისე კი, ტელევიზიიდან ჟურნალისტის წასვლა ჩვეულებრივი პროცესია, ბორკილს არავის ვადებთ.

თუ გრიგოლია წავა თქვენი არხიდან, თოქშოუ „დიდ პოლიტიკა“ დაიხურება, თუ სხვა წამყვანი შეირჩევა?

- გასულ წელთან შედარებით პოლიტიკური თოქშოუების მიმართ საზოგადოების ინტერესი, ზოგადად, შემცირებულია. რეიტინგებს თუ გადავხედავთ, არცერთ თოქშოუს არ აქვს მაღალი რეიტინგი. საარჩევნო წელთან შედარებით მნიშვნელოვნად დაეცა რეიტინგები. იანვარ-თებერვალი კი პოლიტიკური თვალსაზრისით აქტიური თვეები ისეც არ არის. წმინდა კომერციული და რეინტიგულობის თვალსაზრისით რომ გითხრათ, გადაცემის შეჩერება კატასტროფა იქნება-თქო, მოგატყუებთ.

ერთი თვის წინ არასამთავრობო ორგანიზაციების ნაწილმა „მაუწყებლის კანონის“ დარღვევაში დაგადანაშაულათ. მათი განცხადებით, თქვენ ფლობთ ადმინისტრაციულ თანამდებობას, რადგან ხართ სავაჭრო-სამრეწველო პალატის პრეზიდენტი. არასამთავრობოების მტკიცებით, როგორც ადმინისტრაციული თანამდებობის პირს ტელევიზიის დირექტორობის უფლება არ გაქვთ, ადასტურებთ თუ არა, რომ მართლაც ირღვევა კანონი და თუ აპირებთ ერთი ან მეორე თანამდებობის დატოვებას?

- არანაირ ადმინისტრაციულ თანამდებობას არ ვფლობ და ძალიან გთხოვთ, რამდენიმე კონკრეტული პირის მიერ გაცხადებულ აბსოლუტურად მტკნარ სიცრუეს და ფაქტობრივ შეცდომას ნუ გაიმეორებთ. არასამთავრობო ორგანიზაციების წარმომადგენლებს გუშინაც ვთხოვე, კეთილი ინებონ და მოისმინონ ჩვენი პოზიცია ამ საკითხზე. ნამდვილად არ ვაპირებ, რომ ვიღაცის ნათქვამი მივიღო, როგორც აპრიორი სიმართლე.

11 არასამთავრობო ორგანიზაცია აწერს ხელს შესაბამის განცხადებას.

- ხვალვე შემიძლია გავხნსა 11 არასამთავრობო ორგანიზაცია და 11-ვე მოაწერს ხელს უარზე. კარგად ვიცი, რამდენი არასამთავრობო ორგანიზაციაა საქართველოში. ჩვენი ბიზნესი გვაქვს, ჩვენი საქმე გვაქვს. რა ადმინისტრაციულ ორგანოზეა საუბარი. რომელიმე ქვეყანაში ვინმეს გაუგია, პალატა და ბიზნესგაერთიანება ადმინისტრაციული ორგანო იყოს?! აბსურდის თემაა ეს. გუშინ შეხვედრაზეც ვუთხარი არასამთავრობოების წარმომადგენლებს, რომ საკითხით სათანადოდ თავის დროზეც უნდა დაინტერესებულიყვნენ. არცერთ მათგანს თავში აზრადაც კი არ მოსვლია, რომ ერთხელ მაინც ეკითხათ რამე - იქნებ, ჩვენც ვიზიარებდით მათ პოზიციას, ან იქნებ ჩვენ გვქონდა ისეთი არგუმენტები, რომ თავად გაეზიარებინათ ჩვენი პოზიცია. არ შეიძლება ასე ცალსახა მიდგომა.

გვითხარით, რა არის თქვენი მთავარი არგუმენტი? რით ასაბუთებთ, რომ „მაუწყებლის შესახებ“ კანონი არ ირღვევა?

- მე ვერ ვნახე მათი არგუმენტი, რომლითაც ჩემთვის წაყენებულ ბრალდებას დაასაბუთებდნენ. შესაბამისად, არ ვაპირებ, მოპასუხის როლში ჩავიყენო თავი. ჩვენი პოზიცია არის სამართლებრივად გამყარებული და ის ოფიციალურად გადავუგზავნეთ მარეგულირებელ კომისიას. გაგაზავნილ დოკუმენტში ჩამოთვლილია ყველა ის მუხლი და სამართლებრივი აქტი, რომელის მიხედვითაც ვფიქრობთ, რომ კანონს არ ვარღვევთ.