შვეიცარიის ალპებში ააშენეს მსოფლიოში ყველაზე გრძელი გვირაბი, სახელწოდებით გოტარდი, რომელიც ალპებში გადის. მისი სიგრძე 57 კილომეტრს შეადგენს. გვირაბს ორივე მხრიდან თხრიდნენ 14 წლის განმავლობაში. უნდა აღინიშნოს, რომ მასში მოძრაობა მხოლოდ 2017 წელს გაიხსნება.

შვეიცარიისთვის ამ მეტად მნიშვნელოვან ობიექტზე უკვე 10,3 მილიარდი დოლარი დაიხარჯა, მშენებლობაში მონაწილეობა მიიღო 2 500-მა მუშამ. მშენებლობას არ ჩაუვლია უმსხვერპლოდ – რვა ადამიანი დაიღუპა.

გოტარდს დღეში 300 რკინიგზის შემადგენლობა საათში 250 კილომეტრის სიჩქარით გაივლის და მილანსა და ციურიხს შორის გავლის დრო ერთი საათით შემცირდება.

გვირაბის მშენებლობა გამოწვეული იყო, უპირველეს ყოვლისა, იმით, რომ შვეიცარიელებს სურდათ შეემცირებინათ სატვირთო მანქანების ნაკადის მიერ ალპებზე გავლისას გამოწვეული ეკოლოგიური ზიანი. საქმე ისაა, რომ ამ ქვეყანაზე გადის ტვირთების ტრანზიტის ჩრდილოეთ და სამხრეთ ევროპის დამაკავშირებელი ერთ-ერთი ძირითადი მარშრუტი. შვეიცარიელები ცდილობენ, ავტოტრანსპორტით ტვირთების გადაზიდვა რკინიგზის ტრანსპორტით შეცვალონ, რისთვისაც 2007 წელს სარკინიგზო 34-კილომეტრიანი გვირაბი გაიხსნა.

აქამდე ყველაზე გრძელი სარკინიგზო გვირაბი სეიკანი იყო, რომელიც ერთმანეთთან კუნძულებს – ჰონსიუსა და ჰოკაიდოს აკავშირებს. მისი სიგრძე 53,8 კილომეტრია. მეორე ადგილი ლა-მანშის ქვეშ, დიდ ბრიტანეთსა და საფრანგეთს შორის გამავალ გვირაბს ეკავა, რომლის სიგრძე 50 კილომეტრია.