ოქტომბრის საპარლამენტო არჩევნების შემდეგ, ხელისუფლების ოპონენტები ყველაზე ხშირად ახსენებენ დავით ჩხატარაშვილს, რომ ის იყო ხუხაშვილისა და ნაცვლიშვილის მარჯვენა ხელი. ჩხატარაშვილი, რომელიც სააკაშვილის ხელისუფლებაში ერთ-ერთი გავლენიანი ფიგურა იყო, ფლობდა ინფორმაციას სხვადასხვა ფინანსურ თუ ბიზნეს საქმეების შესახებ. სულ ბოლოს ჩხატარაშვილის გვარმა სამეგრელოს სამალავებთან დაკავშირებით გაიჟღერა. ერთ-ერთი ვერსიით, შსს-ს სწორედ, კუდ-ის ყოფილმა უფროსმა ლევან ქარდავამ და დავით ჩხატარაშვილმა მიაწოდეს ინფორმაცია სამეგრელოს სამალავების შესახებ.

ყოფილი პრემიერ-მინისტრის, აწ უკვე ყოფილი მრჩეველი გია ხუხაშვილი ადასტურებს ჩხატარაშვილთან შეხვედრის დეტალებს. რატომ ხვდებოდა ის ჩხატარაშვილს და რატომ თვლის მას სისტემის მსხვერპლად, ამ საკითხებზე for.ge. გია ხუხაშვილს ესაუბრა.

ბატონო გია, რა ურთიერთობა გაქვთ კუდ-ის ყოფილ მაღალჩინოსნებთან, ლევან ქარდავასთან და დავით ჩხატარაშვილთან, სისტემური კომუნიკაცია გქონდათ მათთან?

გია ხუხაშვილი: ლევან ქარდავა საერთოდ ნანახი არ მყავს. რაც შეეხება ჩხატარაშვილს, გიდასტურებთ, რომ ბევრჯერ მქონდა მასთან კომუნიკაცია. მე მას შევხვდი არჩევნების შემდეგ. მანამდე მისი არსებობის შესახებაც არც ვიცოდი. სააკაშვილი მაშინ აკეთებდა კომენტარს ზუსტად ქურდს კუდი ეწვის პრინციპით. მისი დანაშაულებრივი ბრძანების ერთ-ერთი შემსრულებელი იყო ჩხატარაშვილი და ჰქონდა შიში, რომ ჩხატარაშვილს რაიმე წამოცდებოდა მის დავალებებზე. რა თქმა უნდა, ჩხატარაშვილი დამნაშავე იყო და ბუნებრივია, დასასჯელია, მაგარამ მისი დამკვეთი არის მიხელი სააკაშვილი. უსამართლობაა ის, რომ დამკვეთი სააკაშვილი ფაქტობრივად ცდილობს, რომ ისევ პოლიტიკაში დარჩეს,ხოლო შემსრულებელი ციხეში იჯდება.

შემსრულებელი არ უნდა დაისაჯოს ბატონო გია?

- რა თქმა უნდა, უნდა დაისაჯოს, მაგრამ ჩვენ რას ვფიქრობთ დამკვეთის დასჯაზე, აი ეს არის პრობლემა. ჩხატარაშვილისგან მე თვითონ ვარ დაზარალებული.

რა კუთხით ხართ თქვენ ჩხატარაშვილსგან დაზარალებული?

- ყველა ის ბრალდება, რაც იმ პერიოდში ჩემი მისამართით ისმოდა, ამას ფუთავდა ჩხატარაშვილი. რაც შეეხება მისი დაკავება არ დაკავების საკითხს, ეს გამოძიების კომპეტენცია იყო და მე ამაში ვერ ჩავერეოდი. მე ვიცოდი, რომ სისტემა აგებული იყო კრიმინალზე. იყვნენ დამნაშავეები, იყვნენ ამ დანაშაულის შემფუთავები, ანუ ე.წ. მწმენდავები და ჩხატარაშვილი იყო ერთ-ერთი მწენდავი, რომელიც ფუთავდა სააკაშვილის დანაშაულებებს.

ბატონო გია, თუ თქვენთვის ცნობილი იყო, რომ ჩხატარაშვილი იყო ერთ-ერთი ღერძი ამ უსამართლობის, მაშინ რატომ ურთიერთობდით მასთან?

- მე მასთან სულ რამდენიმე შეხვედრა მქონდა. ის არ იყო ჯერ დაკავებული და მე ვსარგებლობდი ამით. ის დადიოდა ჩვეულებრივად და მაინტერესებდა რაღაცეები, რამე დანაშაულია ამაში? იმ პერიოდში იმ რეჟიმის სხვა წარმომადგენელსაც შევხვდი, მათ შორის ჩემს წინაშე დანაშაულის ჩამდენ პირებს, ვცდილობდი მათგან მიმეღო ინფორმაცია იმ ყველაფერზე, რაც ხდებოდა იმ პერიოდში, ეს იყო და ეს.

რამდენად ღირებული ინფორმაცია მიიღეთ მათგან?

- ფაქტობრივად არაფერი ახალი არ უთქვამთ. ჩხატარაშვილმა დამიდასტურა ის, რაც ისედაც ვიცოდი, რომ სააკაშვილის მთელი რეჟიმი კრიმინალზე იყო აწყობილი. მუშაობდა მაფიის პრინციპით, თავისი დამკვეთებით, შემსრულებლებით, მწმენდავებით და ა.შ. ჩხატარაშვილმა თავისი საუბრებით ეს დამიდასტურა.

კონკრეტული პირები დაასახელა?

- არა, ის არ ასახელებდა არავის. ეს არც იყო ჩემი კომპეტენცია, რომ კონკრეტულად დანაშაულში ვინმეს თანამონაწილეობაზე მესაუბრა მასთან. ეს გამოძიების კომპეტენციაა და იმ პერიოდში გამოძიება კითხავდა მას, ეს საქმე ერთი წელია რაც გამოძიებაშია. ჩემს კომპეტენციას სცილდებოდა ვინმეზე და რამეზე კონკრეტულად ლაპარაკი. მე უფრო მინდოდა სისტემა დამენახა და რეჟიმის დანაშაულის ანატომია დამენახა და არა ის, კონკრეტულად რომელი პიროვნება რას აკეთებდა. მე არ ვარ გამომძიებელი და ამას დაკითხვის სახეს, ბუნებრივია, ვერ მივცემდი.

ბატონო გია თქვენ ერთ-ერთ გამოსვლაში აღნიშნეთ, რომ ახალაიები სისტემის მსხვერპლნი იყვნენო. ეს დასკვნა ჩხტარაშვილთან ურთიერთობის შემდეგ გააკეთეთ?

- როდესაც ეს ახალაიებზე ვთქვი, იქვე ვთქვი, რომ ისინი არიან დამნაშავეები, მაგარამ ფართო გაგებით, ისინი არიან მსხვერპლნი. ჩხატარაშვილიც ფართო გაგებით არის სისტემის მსხვერპლი. ჩემთვის მთავარი დამნაშავე ყოველთვის არის დამკვეთი, რასაც უკვეთავ შემსრულებელს, რომელიც მონური აღსრულებით არის დაკავებული, ბუნებრივია იმას ასრულებს. შესაბამისად, თუ არ არსებობს დაკვეთა, არ არსებობს დანაშაული.

ჩხატარაშვილს აქვს გარკევული ინტელექტუალური პოტენციალი, რომლის გამოყენება ქვეყნის სასიკეთოდ შეეძლო პოზიტიურ ხელისფლებას. ნაცვლად ამისა, ის დამნაშავე გახადეს დამკვეთებმა. პარადოქსია, დამკვეთები ზიან პარლამენტში და თავიანთი დაკვეთით ვიღაცა დამნაშავესთან მიმართებაში ცდილობენ, რომ ჩემსკენ გამოიშვირონ ხელი, ეს არის  დღევანდელი სიტუაციის წარმოუდგენელი პარადოქსი, ამასაც ფილოსოფიურად ვუყურებ.

ჩვენ თუ ვლაპარაკობთ სამართალზე, თუნდაც ეს კონკრეტული საქმე, რის გამოც ჩხატარაშვილი არის დაპატიმრებული, არის პოლიტიკური დაკვეთით შესრულებული საქმე. პოლიტიკა იყო დამკეთი. წინასაარჩევნოდ პოლიტიკური ხელმძღვანელობისგან პრევენციის სახით, ჩხატარაშვილმა მიიღო დავალება.

კონკრეტულად ვისგან მიიღო ეს დაველება?

- სააკაშვილის და ადეიშვილისგან, რომ შეეფუთა მათი დანაშული და მან შეასრულა ეს დავალება. ჩაიდინა დანაშაული და პასუხს აგებს, მაგრამ დამკვეთი, ვინც ეს დანაშაული ჩაადენინა, დღეს რომ გამოდის და მთავარ ოპოზიციურ ძალად ასაღებს თავის თავს, ეს სამართლიანობაა?!

ალბათ წარმოუდგენელია არ სცოდნოდა ქვეყნის მთავარ პროკურორს, რას აკეთებდა მისი მოადგილე, ვგულისხმობ მურთაზ ზოდელავას...

- ის, რომ მურთაზ ზოდელავას გარეშე ხდებოდა ეს ყველაფერი, ამას ბავშვიც არ დაიჯერებს. სამართლიანობის თემა, დიდი თემაა. საპრეზიდენტო არჩევნებამდე ამასთან დაკავშირებით იყო ობიექტური პრობლემები, იმიტომ, რომ „ნაციონალური მოძრაობის“ ბუნებიდან და მათი შესაძლებლობიდან გამომდინარე, მაღალი რისკი იყო, რომ საარჩევნო პროცესის დისკრედიტაცია მომხდარიყო მათი მხრიდან.

მანამდე სირთულეები იყო, ეს გასაგებია, ახლაც არის სირთულეები, მაგრამ, ადრე თუ გვიან, ჩვენ ეს პროცესი უნდა დავიწყოთ. ჩვენ უნდა ვთქვათ ვინ იყო ამ პოლიტიკური დანაშაულის დამკევთი და ის უნდა დაისაჯოს. არა ციხეში დაჭერით, არამედ, ჩემი აზრით, საზოგადოებამ პოლიტიკური ვერდიქტი უნდა გამოუტანოს ამ კოლექტიურ დამნაშავეს - „ნაციონალურ მოძრაობას“.

თქვენ ბრძანეთ, რომ ერთ-ერთი დაზარალებული ხართ ჩხატარაშვილის მხრიდან, მიმართეთ გამოძიებას?

- კვერცხის თემა, მათ შორის ჩემი პირადი საუბრების ტირაჟირება, სად ხდებოდა ეს ყველაფერი იცით? ეს ხალხი აკეთებდა ამას და იყენებდა პოლიტიკური მიზნებისთვის. მე ჩემი პირადი ამ თემაში ნაკლებად მაინტერესებს, მათი დანაშაულის მასშტაბებზე ცოცხალი ადგილი არაა დარჩენილი და შესაბამისად, არ მიმაჩნია, რომ ჩემი პირადი საქმე რაიმე ტიპის დამატებით როლს ითამაშებს. კი, ბატონო, მე შემიძლია ჩვენება მოვცე რაიმე საქმეზე, მაგრამ ის, რომ მე პირადად დავიწყო ჩივილი... ისედაც ხომ ყველასთვის ყველაფერი კარგად გასაგებია?! მე ამას არ გავაკეთებ, იმიტომ, რომ აზრი არ აქვს. ეს მარტო ჩემს მიმართ კი არ ხდებოდა, ტოტალურად ხდებოდა, სისტემა მუშაობდა.

ძალიან ბევრს საუბრობენ ჩხატარაშვილის და ლაშა ნაცვლიშვილის ურთიერთობაზეც. ჩვენს ხელთ არსებული ინფორმაციით, ჩხატარაშვილი კარდების ლობირებასაც კი ახდენდა პროკურატურაში და რეკომენდაციას უწევდა ლაშა ნაცვლიშვილთან...

- გავლენასთან დაკავშირებით როდესაც არის საუბარი, ჩემი არჩევანი იყო ძალაუფლების დატოვება. ჩემი ნება იყო, რომ ჩამოვშორებოდი. ვინმეს ჰგონია, რომ გავლენა რეალურ ფასეულობას წარმოადგენს? არაფერი ფასეული ამაში არაა, დამერწმუნეთ, თავის ტკივილის მეტი არაფერია. ბედნიერი ვარ, რომ ეს მოვახერხე და მთლიანად გავერიდე სიტუაციას.

რაც შეეხება ნაცვლიშვილს, მის ნაცვლად მე ვერ ვილაპარაკებ რა ხდბეოდა ამასთან დაკავშირებით, მაგრამ ამ თემას აქვს ორი ასპექტი - მორალური და პროფესიონალური. ადამიანები ერთნაირები არ არიან, ზოგი პროფესიულ ნიშანს ანიჭენს უპირატესობას, ზოგი კი მორალურს. ამის გამო არავინ არ უნდა განიკითხო. ის, რომ რჩევა მოისმინო ვინმესგან, მე ამაში დანაშაულს ვერ ვხედავ.

ის, რომ ჩხატარაშვილი იყო ნაცვლიშვილის პროტეჟე, ეს მიამიტობაა. ჩხატარაშვილი, დიდი გაგებით, იყო ჩვენი მტერი. საარჩევნო პროცესში დილას სახლიდან რომ გავდიოდი, საღამოს თუ ცოცხალი შევიდოდი არ ვიცოდი. ფრონტის ხაზის იქით ჩხატარაშვილი იყო, მაგრამ მას შემდეგ, რაც ბრძოლა დამთავრდა, შურისძიების რეჟიმი არ მიმაჩნია სწორად. ფართო გაგებით, მე დღესაც ვთვლი, რომ ჩხატარაშვილი იყო კრიმინალური რეჟიმის მსხვერპლი. თუ ის დასასჯელია, მიდის ძიება და ის დაისჯება. მე არც იმას მოვითხოვ, რომ ის დაიჭირონ და არც იმას, რომ ხელი დავაფაროთ.

ლაშა ნაცვლიშვილის ამბავი ჩემთვის სულ ერთი არაა. მე ვთვლი, რომ ჩვენ ბევრი რამ გვაკავშირებს და გული შემტკივა მასზე. ჩვენ ყველა, ვინც ვიყავით „ქართულ ოცნებაში“, ვიყავით ერთი გუნდი. ყველა ერთ საქმეს ვაკეთებდით, მეც, ლაშაც, ღარიბაშვილიც და ყველა ერთად. არანაირი ჯგუფები არ ყოფილა.

თქვენ ახსენეთ ღარიბაშვილი და უნდა გკითხოთ, ჩხატარაშვილის დაკავება ადასტურებს თუ არა, რომ გია ხუხაშვილმა და ლაშა ნაცვლიშვილმა ძალაუფლება და გავლენა დაკარგეს ამ ხელისუფლებაში?

- გასაგებია, რომ ადამაინები ასე არიან მოწყობილები და ასე ფიქრობენ. მე მესმის კარგად და არ ვაპირებ ახლა ამაზე ლაპარაკს, მაგრამ ერთი რამე უნდა ვთქვა, რომ მე ძალაუფლება ნებაყოფლობით დავთმე და ეს იცის ყველამ. არც არასოდეს არ მქონია პრეტენზია გავლენაზე. ახლა ლაპარაკი იმაზე, რომ დავკარგე გავლენა, კი ბატონო ნიშნავს ამას, მაგრამ ეს ჩემი გადაწყვეტილება იყო და ძალიან ბედნიერი ვარ. რა თქმა უნდა, ამ ხელისუფლებაში ჩემი გავლენა არაა და ეს ჩემი სურვილია. არც ივანიშვილის ხელისუფლებაში იყო ჩემი გავლენა, როგორც ამას ამბობდნენ.