უკრაინის პრეზიდენტმა ვოლოდიმირ ზელენსკიმ თქვა, რომ რუსეთის პრეზიდენტმა ვლადიმერ პუტინმა უკრაინის წინააღმდეგ სრულმასშტაბიანი ომი შესაძლოა სხვა ქვეყნებთან ფარული შეთანხმებების მიღწევის შემდეგ წამოიწყო.

The New York Times-თან ინტერვიუში ზელენსკიმ გამოხატა თავისი სკეპტიციზმი და აღშფოთება უკრაინის უცხოელი პარტნიორების მხრიდან ასეთი ღალატის შესაძლებლობის გამო.

„პუტინი გადარეულია, რადგან გონიერ ადამიანს არ შეუძლია სრულმასშტაბიანი ომი სხვა სახელმწიფოს წინააღმდეგ. ის ან გიჟია, ან იცოდა, რომ ამის გამო არ დაისჯებოდა, რაც იმას ნიშნავს, რომ შეიძლებოდა რაიმე დიალოგი ყოფილიყო სხვა ქვეყნებთან. არც კი მინდა ამის წარმოდგენა, რადგან მაშინ ეს არ არის პარტნიორობა, ეს არის თამაში ჩვენს ზურგს უკან და სრული ღალატი“, - განაცხადა ზელენსკიმ.

მან ასევე გააკრიტიკა საერთაშორისო საზოგადოების მერყევი პოზიცია რუსეთის მიმართ და აღნიშნა: „რუსეთთან კარს ყველა ოდნავ ღიას ტოვებს, თუმცა არც ისე ღიას, როგორც 2014 წლის შემდეგ“.

მისი თქმით, ბევრმა ლიდერმა, რომლებიც არ არიან დარწმუნებულები იმაში თუ როგორ განვითარდება მოვლენები მომავალში, დაიტოვა ადგილი რუსეთთან პოტენციური შერიგებისთვის. „ბევრმა ლიდერმა დატოვა კარი ოდნავ ღია და ფიქრობენ: „რა იქნება ხვალ? ხვალინდელი დღის შანსი როგორმე უნდა ვიპოვოთ. რა მოხდება, თუ უკრაინა ომს წააგებს? ჩვენ არ უნდა დავუხუროთ კარი რუსეთს“, - განაცხადა პრეზიდენტმა.

ბირთვული საფრთხის განხილვისას ზელენსკიმ განაცხადა, რომ თუ პუტინი აპირებდა ბირთვული იარაღის გამოყენებას, ის ამას ომის საწყის ეტაპზე გააკეთებდა. ის სვამს კითხვას: „რა შეიძლება იყოს უფრო დიდი ესკალაცია, ვიდრე ხოცვა-ჟლეტა უკრაინაში?“.

ზელენსკი ვარაუდობს, რომ საერთაშორისო თანამეგობრობამ რუსეთის აგრესიასთან გასამკლავებლად თავის სტრატეგიებს უნდა გადახედოს.