„ხალხის ძალის“ გენერალური მდივანი „უცხოური გავლენის გამჭვირვალობის შესახებ“ კანონპროექტთან დაკავშირებით რადიკალური ოპოზიციის და არასამთავრობო სექტორის ნაწილის მიერ წარმოებულ კამპანიას ეხმიანება. დეპუტატი აცხადებს, რომ ისინი შეგნებულად ავრცელებენ ცრუ ინფორმაციებს კანონპროექტთან დაკავშირებით, სინამდვილეში კი კანონი მხოლოდ ორგანიზაციებს შეეხება და არავითარ შემთხვევაში არ შეეხება ფიზიკურ პირებს, მათ შორის შშმ პირებს.
„ამ კანონპროექტთან დაკავშირებით დეზინფორმაციული კამპანია, რა თქმა უნდა, გაგრძელდება და საზოგადოების შეცდომაში შეყვანის ძალიან ბევრი მცდელობა იქნება, მაგრამ ერთი რამ უნდა ვიცოდეთ, რომ არავითარი აკრძალვა და შეზღუდვა ამ კანონში არ არის. მდიდარ „ენჯეოებს“ ეშინიათ, რომ მათ მოუწევთ შავი ფულის დეკლარირება, რომელსაც მოიხმარენ არა კარგი საქმისთვის, არამედ ქართულ პოლიტიკაში სხვადასხვა დამკვეთის ინტერესების გასატარებლად. ეს არავითარ შემხებლობაში არ არის საზოგადოების კონკრეტულ წარმომადგენლებთან, მით უმეტეს შშმ პირებს არ ეხებათ და ვერც შეეხება. საუბარია, რომ შავი ფულის დეკლარირებასა და მიზნობრიობის განსაზღვრაზე იყოს ცნობილი საზოგადოებისთვის, მათ შორის შშმ პირებისთვისაც“, - განაცხადა ხუნდაძემ.
