მსოფლიო პრესა რუსეთის პრეზიდენტის ვლადიმერ პუტინის ინტერვიუს ამერიკელ ტელეწამყვან ტაკერ კარლსონთან აქტიურად განიხილავს.

თავად კარლსონი აცხადებს, რომ მან ეს ინტერვიუ გააკეთა ამერიკელების გულისთვის, რომლებიც, ნებით თუ უნებლიეთ, იხდიან უკრაინის ომს თავიანთი გადასახადებით და ამიტომ აქვთ უფლება, იცოდნენ სიმართლე. დასავლურ პრესას უფრო აინტერესებს კითხვა, რატომ დასჭირდა თავად პუტინს ინტერვიუს მიცემა, რადგან მსოფლიო მედია რუსეთის პრეზიდენტთან ინტერვიუს ჩაწერას დიდი ხანია უშედეგოდ ცდილობს.

მანიპულირება და პროპაგანდა

მაგალითად, CNN თვლის, რომ ეს ინტერვიუ აშკარად უსაფრთხო იყო პუტინისთვის. CNN-ის ანალიტიკოსი ოლივერ დარსი თავის ანალიზს ასე იწყებს: „ახლა გასაგებია, რატომ მისცა ვლადიმერ პუტინმა ინტერვიუ ტაკერ კარლსონს“. მისი თქმით, რაც ჩვენ ვნახეთ, „ინტერვიუსაც“ ვერ ვუწოდებთ.

„კარლსონი ყველანაირად გაურბოდა კითხვებს, რომლებიც შესაძლოა, რეალურად, აინტერესებდეს ამერიკელებს: რუსეთში ავტორიტარულ რეჟიმზე, უკრაინაში ომის დაწყებაზე, უდანაშაულო ადამიანების სიკვდილზე, ომის დანაშაულებზე დაბოლოს, ალექსეი ნავალნის პატიმრობაზე. ამის ნაცვლად, ჩვენ მოვისმინეთ გრძელვადიანი და ზოგჯერ არათანმიმდევრული მონოლოგი. კარლსონმა ავტოკრატს სრული თავისუფლება მისცა, მოეხდინა მანიპულირება საზოგადოებაში და ეთქვა ისტორიის თავისი ვერსია, რაც არასანდოა“, - წერს ოლივერ დარსი.

კარლსონის მცდელობა

ბრიტანული Independen თავისი პუბლიკაციების უმეტეს ნაწილს უთმობს ინტერვიუს იმ ეპიზოდს, სადაც კარლსონი პუტინს სთხოვს გაათავისუფლოს Wall Street Journal-ის ჟურნალისტი ევან გერშკოვიჩი, რომელიც რუსეთში ჯაშუშობის ბრალდებით გასული წლის მარტში დააკავეს. მაგრამ პუტინმა უპასუხა, რომ მისი კეთილგანწყობის რეზერვი დასავლეთთან ურთიერთობაში ამოწურულია. გარდა ამისა, Independent აღნიშნავს, რომ პუტინმა რამდენჯერმე წარმოთქვა სიტყვები „შპიონაჟი“ და „საიდუმლო ინფორმაცია“. ამავდროულად, პუტინმა მოულოდნელად დაიწყო მოთხრობა, თუ როგორ იჯდა „რუსეთის ნამდვილი პატრიოტი“ ციხეში ერთ-ერთ ევროპულ დედაქალაქში „ბანდიტის ლიკვიდაციისთვის, რომელმაც კავკასიაში რუსი ჯარისკაცები მოკლა“. პუტინმა სახელები არ დაასახელა, წერს Independent, მაგრამ ის, სავარაუდოდ, რუს ვადიმ კრასიკოვზე საუბრობს, რომელმაც 2019 წელს ბერლინში დღისით 40 წლის საქართველოს მოქალაქე და ეთნიკურად ჩეჩენი ზელიმხან (თორნიკე) ხანგოშვილი მოკლა.

სიცილი ცრემლებით

ევროპული გამოცემის Politico-ს მიხედვით, ამ ინტერვიუში სხვა რამ არის მნიშვნელოვანი: პუტინმა მიიღო შეუზღუდავი წვდომა უზარმაზარ ამერიკულ აუდიტორიაზე აშშ-ს არჩევნებამდე და არ გაუშვა ხელიდან შესაძლებლობა, დათესოს ეჭვები უკრაინის დახმარებასთან დაკავშირებით აშშ-ს პოლიტიკურ სისტემაში. აღმოცენდება თუ არა ეს თესლი, მოგვიანებით გაირკვევა, მაგრამ პროცესი დაწყებულია. „პუტინმა არ დააყოვნა, როგორ ვერ შეძლეს მოსკოვთან უსაფრთხოების ურთიერთობების დამყარება ამერიკის წარსულმა პრეზიდენტებმა, რომლებიც ერთმანეთს ენაცვლებოდნენ მაშინ, როცა ის თავად რჩებოდა კრემლში“, - წერს Politico და დასძენს: „შემდეგ მან მთლიანად უწოდა აშშ-ს პოლიტიკურ სისტემას ჭაობი, ხოლო ამერიკულ დემოკრატიას - ილუზია“.

მრავალი მოძრაობა ტაკერთან ერთად

ინტერვიუს მოლოდინში, რუსმა პოლიტიკოსმა და პუტინის ერთ-ერთმა ყველაზე ცნობილმა ოპონენტმა, მიხაილ ხოდორკოვსკიმ, დაწერა სვეტი ბრიტანული Telegraph-ისთვის, სადაც მან მაშინვე გააფრთხილა საზოგადოება, რომ პუტინის ნებისმიერი ნაბიჯი და ქმედება მხოლოდ ერთ რამეზეა მიმართული - ხელისუფლებაში დარჩენა. მისი თქმით, მსოფლიოს ყველა ლიდერიდან პუტინი ყველაზე მარტივი გასაანალიზებელია. მან დაარწმუნა მთელი ქვეყანა, რომ უკრაინაში რეალურად იბრძოდა ისეთი ძლიერი ოპონენტების წინააღმდეგ, როგორებიცაა ნატო და დასავლეთი.

„კოლექტიურ დასავლეთთან“ ომის მიუხედავად, პუტინს ნამდვილად სჭირდება აღიარება სწორედ ამ დასავლეთში. მთელი თავისი პოლიტიკური კარიერის განმავლობაში, ის სასოწარკვეთილი ცდილობდა ამ აღიარებას და ამ აღიარებით მან განიმტკიცა ლეგიტიმაცია რუსეთის შიგნით“, - თვლის მიხეილ ხოდორკოვსკი. მისი თქმით, ბოლო დროს, კრემლმა დაკარგა დასავლეთში მისი მრავალი ლოიალური პოლიტიკოსი და რუსეთის იმიჯი ძლიერ შეირყა. კარლსონი, რომელიც დაუღალავად იცავდა პუტინს უკრაინაში რუსეთის შემოჭრის შემდეგ და ომის პროვოცირებაში საკუთარ ქვეყანას, აშშ-ს ადანაშაულებდა. მიხეილ ხადორკოვსკის აზრით, რუსეთში მისი პოზიციის შელახვის მიზნით, დასავლეთმა, უბრალოდ, არ უნდა აღიაროს მისი პრეზიდენტად ხელახალი არჩევის ლეგიტიმაცია მიმდინარე წლის მარტში.

რუსული მედიის რეაქცია

ვლადიმერ პუტინის ინტერვიუ ტაკერ კარლსონთან რუსული სახელმწიფო არხების დილის საინფორმაციო გადაცემების მთავარი თემა გახდა. თითქმის ყველა ფედერალური სახელმწიფო არხი საუბრობდა პუტინის ინტერვიუზე, როგორც „მთავარ თემაზე, რომელიც, გადაჭარბების გარეშე, მთელ მსოფლიოში განიხილება“. რუსული არხები დილის გადაცემებში ოდნავ ნაკლებ ყურადღებას აქცევდნენ ინტერვიუს შინაარსს, ვიდრე მისი გამოქვეყნების გარემოებებს. „Rossiya 1“-ს ტელეწამყვანმა ნიკოლაი ზუსიკმა დილის საინფორმაციო გადაცემაში ყურადღება გაამახვილა პუტინის ციტატებზე ინტერვიუებიდან, რომელშიც რუსეთის ლიდერი ამტკიცებდა, რომ მოსკოვს „არასოდეს უთქვამს უარი უკრაინასთან მოლაპარაკებებზე“.

NTV-ზე ინტერვიუს იმავე ფრაგმენტზე გაამახვილეს ყურადღება, სადაც პუტინმა განაცხადა, რომ რუსეთმა ჯერ ვერ მიაღწია „სპეციალური სამხედრო ოპერაციის“ მიზნებს უკრაინის წინააღმდეგ.

გადაცემა „60 წუთის“ წამყვანები თვლიან, რომ კარლსონთან ინტერვიუში პუტინმა „გაფანტა მითი საშინელი და მზაკვრული რუსეთის შესახებ, რომელსაც მთელი ევროპის დაპყრობა სურს“.

ტელეგრამ არხის „მომავლის სურათი“ ამბობს, რომ პუტინის ინტერვიუ ჰგავს რუსეთის პრეზიდენტის მიმართვას დასავლური აუდიტორიისთვის. „აშკარაა, რომ ბევრი რამ, რაც ითქვა, მოვისმინეთ არა მხოლოდ ჩვენ, არამედ კრემლის თანამოსაუბრეებმა ვაშინგტონში და ლონდონში“, - ნათქვამია ტელეგრამის განცხადებაში.

დამოუკიდებელი ჟურნალისტი ფარიდა რუსტამოვა თავის Telegram-არხში აღნიშნავს, რომ ვლადიმერ პუტინმა ამერიკელ ჟურნალისტს მთელი ლექცია წაუკითხა, მაგრამ ახალი არაფერია, „რაც მოხდა ორი წლის წინ“ და რა პერსპექტივებით დასრულდება ომი, არ უთქვამს.