ამ პუტინისტებს და რუსებს დედა უნდა ვუტიროთ, მაგას განახებთ როგორ, – ამის შესახებ „ნაციონალური მოძრაობის“ თავმჯდომარე ლევან ხაბეიშვილმა ჟურნალისტებს იურიდიულ საკითხთა კომიტეტის სხდომის დატოვების შემდეგ განუცხადა, რომელზეც ცოტა ხნის წინ ფიზიკური დაპირისპირება მოხდა.
როგორც ხაბეიშვილმა განაცხადა, იმ პირებიდან, რომლებმაც ოპოზიციონერი დეპუტატები დარბაზიდან გაიყვანეს, არც ერთი არ არის მანდატური.
„აქედან არც ერთი არ არის მანდატური. სუს-ის თანამშრომლები არიან. ამ ბიჭების უმრავლესობა ნაომარია რუსეთში რუსების წინააღმდეგ და დღეს დააყენეს პუტინის კანონის დასაცავად. როგორ დავიჯერო, რომ რომელიმეს ეს უხარია. ვერ დამაჯერებთ, მაგრამ დგანან ანრი ოხანაშვილისა და ირაკლი კობახიძის დასაცავად. ეს ტრაგედიაა. ეს ხალხი გასათავისუფლებელია. სასაცილოდ გაგდებენ. გავა დრო და ეს სახეები, რომ პუტინის კანონს იცავდით, დარჩება. უბედურებაა, თქვენი უბედურება“, – განაცხადა ლევან ხაბეიშვილმა.
ამასთან, კითხვაზე, რომ ხვალ კანონპროექტებზე მსჯელობა პლენარული სხდომის ფორმატში უნდა გაგრძელდეს, ხაბეიშვილმა განაცხადა:
„რა ხვალ. ამ პუტინისტებს დედა უნდა ვუტიროთ, ხალხო, რაზე მელაპარაკებით. დედა უნდა ვუტიროთ პუტინისტებს და რუსებს. როგორ და ხალხთან ერთად. მაგას განახებთ, როგორ“, – განაცხადა ლევან ხაბეიშვილმა.
