ეს არის ანტიამერიკული კამპანიის ნაწილი. სასაცილოც არის, სანიმუშო ქვეყანაა შვეიცარია თავისი საბანკო და სასამართლო სისტემით. ბედნიერები ვიქნებით, თუ ოდესმე მივაღწევთ იმ დონეს, რაც ახლა შვეიცარიაშია და ეს სასამართლოა გამოყვანილი, როგორც აშშ-ის მიერ კონტროლირებადი და ჩვენ, თურმე დამოუკიდებელი სასამართლო გვაქვს, რომლის დაპყრობასაც ცდილობენ ამერიკელები, - თქვა „გირჩის“ წევრმა, სანდრო რაქვიაშვილმა რითაც გამოეხმაურა ფილოსოფოს ზაზა შათირიშვილის განცხადებას, რომელიც შვეიცარიის სასამართლოს, საბანკო სისტემას და მედიას, ბიძინა ივანიშვილის წინააღმდეგ ერთობლივ შანტაჟში ადანაშაულებს.

„რომც წარმოვიდგინოთ, რომ ამერიკელები აკონტროლებენ მთელს შვეიცარიულ სასამართლოს და ა.შ., ეს ხომ არ შეიძლება, რომ ვიღაც ერთმა ადამიანმა იცოდეს, როგორც საიდუმლო. სავარაუდოდ, ეს იმდენად ცხადი იქნებოდა, რომ ბევრი წყაროდან გვეცოდინებოდა და შვეიცარია აღარ იქნებოდა შვეიცარია. რომ აღმოჩნდეს, რომ შვეიცარია ასე ებრძვის ივანიშვილს, რომც არ იყოს ივანიშვილი და იყოს ნებისმიერი ჩვენი მოქალაქე და გავიგოთ, რომ ასეთი მასშტაბური შეტევაა ამერიკის ან შვეიცარიის მხრიდან, ეს ხომ დიპლომატიური სკანდალი იქნებოდა? მე არ მგონია, რომ ამის უკან რაიმე მნიშვნელოვანი არგუმენტი არსებობს. ჩემი აზრით ეს ჩვეულებრივი ანტიამერიკული კამპანიის ნაწილია. ამ შეფასებაში არ არის ისეთი არგუმენტი წარმოდგენილი, რომელიც შეიძლება განხილვის საკითხი ყოფილიყო“, - აცხადებს რაქვიაშვილი.