„ის, რაც ჩვენ უკრაინაში ვნახეთ, საზარელია. სამწუხაროდ, საზარელთან ერთად, ქართველებისთვის არაა პირველი, როდესაც ჩვენ ასეთი სურათები ვნახეთ. ჩვენ ეს სურათები გვახსოვს 1990-იანი წლებიდან, 2008 წლიდან... ეს ჩვენთვის ნაცნობია და, რა თქმა უნდა, ამან ჩვენ მიერ საქართველოში ნანახი ტრაგედია გააღვიძა“, - განაცხადა პარლამენტის თავმჯდომარემ ჟურნალისტებთან საუბრისას.

მისივე თქმით, უკრაინაში ახლა მნიშვნელოვანია ყველაფრის სამართლებრივი დოკუმენტირება.

„ახლა მთავარია არა განცხადებები, კომენტარები, პოლიტიკური შეფასებები, არამედ - სამართლებრივი შეფასებები. სწორედ ამიტომ, უკრაინელ კოლეგასთანაც მქონდა ამაზე საუბარი - ჰააგის სასამართლო არის ის ინსტანცია, სადაც უნდა მოხდეს ყველა ამ დოკუმენტაციის დამაგრება და გადაწყვეტილების მიღება. ვიდრე ჩვენ ჩავიდოდით, ჰააგის საერთაშორისო სისხლის სამართლის სასამართლოს პროკურორი იყო ჩასული. იცით, რომ ჩვენ გვაქვს ჰააგის სასამართლოსთან ურთიერთობის გამოცდილება და ყველანაირად შეგვიძლია დავეხმაროთ. რა თქმა უნდა, რასაც ჩვენ იქ ვხედავდით, ომის დანაშაულის ნიშნებს შეიცავს და ფაქტია, რაც ჩვენ იქ ვნახეთ - დაზიანებული სამოქალაქო შენობები, ადამიანური მსხვერპლი... ეს ყველაფერი სამართლებრივ შეფასებებს საჭიროებს“, - აღნიშნა შალვა პაპუაშვილმა.

საქართველოს საპარლამენტო დელეგაცია უკრაინიდან 17 აპრილს დაბრუნდა. დელეგაცია ბუჩასა და ირპენში იმყოფებოდა. შალვა პაპუაშვილის ხელმძღვანელობით, საპარლამენტო დელეგაციის შემადგენლობაში იყვნენ: პარლამენტის ვიცე-სპიკერები დავით სერგეენკო, არჩილ თალაკვაძე, ბექა ოდიშარია და ლევან იოსელიანი. ასევე, „ლელოს“ წევრი ანა ნაცვლიშვილი, „გირჩის“ წევრი ვახტანგ მეგრელიშვილი, „რესპუბლიკელი“ ხათუნა სამნიძე და პარტია „საქართველოსთვის“ წევრი გიორგი ხოჯევანიშვილი. უკრაინაში ვიზიტის დროს, ჯგუფის შემადგენლობაში არ იყვნენ „ნაცმოძრაობისა“ და „ევროპელი სოციალისტების“ წარმომადგენლები.xloes-istoriaSi-ruseTTan-sami-omi-aqvs-gamovlili-da-gansakuTrebuli-mgrZnobeloba-gvaqvs.html