თანამედროვე უკრაინელი მწერალი, სერჰი ჟადანი, პოლონეთის მეცნიერებათა აკადემიამ ნობელის პრემიაზე წარადგინა ლიტერატურის დარგში. ინფორმაცია ამის შესახებ აკადემიის ლიტერატურულ მეცნიერებათა კომიტეტმა გაავრცელა.

"ჟადანი ერთ-ერთი ყველაზე გამორჩეული უკრაინელი პოეტი და უბადლო პროზის ავტორია", — წერია კომიტეტის განცხადებაში, — "მისი შემოქმედება ითარგმნა უამრავ ენაზე, მან კი მთელ მსოფლიოში არაერთი ჯილდო დაიმსახურა. ჩვენ მიგვაჩნია, რომ ის ნობელის პრემიის შესაფერისი მწერალია. მისი პოეტური ხმა უკრაინელებისთვის წლების განმავლობაში განსაკუთრებით მნიშვნელოვანი იყო. თავისუფალი უკრაინა დიდწილად ჟადანის სიტყვებით საუბრობს, ფიქრობს და ყურადღებით უსმენს მათ. დღეს კი პოეტი ხარკოვშია და იბრძვის".

ამავე განცხადებაში აკადემია გმობს რუსეთის შეიარაღებულ თავდასხმას უკრაინაზე.

"კრემლის აგრესიულ ქმედებებს უკრაინელი ხალხისა და უკრაინული სახელმწიფოს წინააღმდეგ გამართლება არ აქვს", — აღნიშნავენ პოლონელი მწერლები, რომლებიც მეზობელი ქვეყნის დასახმარებლად მზადყოფნას გამოთქვამენ.

მათი თქმით, პოლონეთში ისეთი სივრცის შექმნა სურთ, სადაც უკრაინელი მეცნიერები დროებით მაინც შეძლებენ თავიანთი საქმიანობის გაგრძელებას.

"ჩვენი აზრით, ამ სივრცის შექმნაში პოლონეთის უნივერსიტეტები უნდა დაგვეხმარონ", — წერია განცხადებაში.

რაც შეეხება სერჰი ჟადანს, 1974 წელს დაბადებული მწერალი, შემოქმედებით საქმიანობასთან ერთად, აქტიურადაა დაკავებული საზოგადოებრივი მოღვაწეობითაც. სტუდენტობიდან მოყოლებული იგი სხვადასხვა პოლიტიკური მოძრაობის წევრი იყო, ახალი საუკუნის დასაწყისში კი, ნარინჯისფერ რევოლუციაშიც მიიღო მონაწილეობა. 2013 წელს დაწყებული ევრომაიდნის დემონსტრაციების დროს ჟადანი ხარკოვის საკოორდინაციო საბჭოს წევრი გახლდათ, 2014 წელს, რუსი სეპარატისტების წამოწყებული კონფლიქტის შემდეგ კი, საქველმოქმედო ფონდიც დააფუძნა დაზარალებულებისთვის ჰუმანიტარული დახმარების გასაწევად. 24 თებერვალს რუსეთის უკრაინაში შეჭრიდან დღემდე იგი კონფლიქტის ერთ-ერთ ყველაზე ცხელ ზონაში, ხარკოვში, რჩება და კვლავ ჩართულია ჰუმანიტარული დახმარების გაწევის პროცესში.

აღსანიშნავია, რომ ლიტერატურის დარგში ნობელის პრემიის მიღების შემთხვევაში ის პირველი უკრაინელი იქნება, ვინც ეს პრესტიჟული ჯილდო მოიპოვა. აქამდე პოსტსაბჭოთა ქვეყნებიდან ერთადერთი ნობელიანტი ბელარუსი სვეტლანა ალექსიევიჩია, რომელმაც ტოტალიტარული რეჟიმის მიერ დაღდასმულ რეალურ ადამიანებზე ზეპირი ისტორიებით მოჰყვა.