დასავლეთი სახიფათოდ მოქმედებს, როდესაც უკრაინას იარაღით ამარაგებს, - ამის შესახებ რუსეთის საგარეო საქმეთა მინისტრმა, სერგეი ლავროვმა ანტალიაში უკრაინელ კოლეგასთან, დმიტრო კულებასთან შეხვედრის შემდეგ განაცხადა.

„ევროკავშირი ვერ გვიპასუხებს, ვინ გააკონტროლებს მომავალში საზენიტო-სარაკეტო კომპლექსებს, რომლებიც უკრაინას მიეწოდება. ამიტომ დასავლეთი სახიფათოდ მოქმედებს, როდესაც უკრაინას იარაღით ამარაგებს. ისინი, ვინც უკრაინაში დაქირავებული მებრძოლების გაგზავნას ახალისებენ, ამაზე პასუხისმგებლობაც უნდა აიღონ“, - აცხადებს ლავროვი.

ის ასევე გამოეხმაურა რუსეთის წინააღმდეგ დაწესებულ ეკონომიკურ სანქციებს და აღნიშნა, რომ მოსკოვი ამ სანქციებს გაუმკლავდება.

„ჩვენს ეკონომიკაზე ნუ ინერვიულებთ, ამ მიმართულებით მიმდინარეობს მუშაობა და ჩვენ ამ რთულ პერიოდს გადავიტანთ, როგორც ეს ჩვენს ისტორიაში არაერთხელ მომხდარა. აღარ გვაქვს იმის ილუზია, რომ დასავლეთი შეიძლება რუსეთისთვის სანდო პარტნიორი იყოს“, - აღნიშნა რუსეთის პირველმა დიპლომატმა.

ანტალიაში მიმდინარე დიპლომატიური ფორუმის ფარგლებში რუსეთისა და უკრაინის საგარეო საქმეთა მინისტრების შეხვედრა 10 მარტს გაიმართა.