ფრენბურთის ბურთი ფილმიდან „გარიყული“ აუქციონზე 308 ათას დოლარად გაიყიდა. BBC-ის ცნობით, ტომ ჰენქსის მონაწილეობით 2000 წელს გადაღებულ ფილმში გამოყენებული ბურთი სააუქციონი სახლმა Prop Store-მა გაყიდა.
ბურთის სასტარტო ფასი 80 ათასი დოლარი იყო, მისმა ახალმა მფლობელმა ვინაობის დასახელება არ ისურვა.
რობერტ ზემეკისის ფილმის „გარიყული“ პრემიერა 2000 წელს შედგა. სიუჟეტის მიხედვით, მთავარი გმირი ჩაკ ნოლანდი (ტომ ჰენქსი) ავიაკატასტროფის შედეგად უკაცრიელ კუნძულზე აღმოჩნდება, სადაც მისი ერთადერთი „მეგობარი“ ფრენბურთის ბურთი „მისტერ უილსონი“ ხდება.
