მას შემდეგ, რაც ბატონმა ბიძინა ივანიშვილმა დისტანცირება მოახდინა ხელისუფლებისგან და ვფიქრობ, ძალიან სწორი ნაბიჯი გადადგა, ამ გუნდმა უფრო მეტად ირწმუნა საკუთარი ძალისა, საკუთარი თავის და გაართვა თავი იმ ურთულეს პრობლემატიკას, რასაც ქვეყნის მართვა ჰქვია, - ამის შესახებ პოეტმა, დათო მაღრაძემ გადაცემაში „იმედი LIVE“ განაცხადა.

მისი თქმით, „ქართულმა ოცნებამ“ დაიბრუნა მართვის სადავეები, სწორი ნაბიჯი გადადგა და ვექტორი გადახარა დამოუკიდებლობისკენ.

„ირაკლი ღარიბაშვილის ხელმძღვანელობით გუნდმა თავი გაართვა გამოწვევებს და დღეს სახეზე გვაქვს რომ ეს გუნდი ძალიან დიდ გამოწვევებს, ართმევს თავს, როგორც საგარეოს, ისე - საშინაოს. ვთვლი, რომ ვექტორი დამოუკიდებლობისკენ გადაიხარა. ითქვა, რომ ვექტორი ჩრდილოეთისკენ გადაიხარა, როდესაც შარლ მიშელის დოკუმენტიდან გავიდა „ქართული ოცნება“ და უნდა გასულიყო, რადგან არ შეიძლება შენ მუდმივად ცალმხრივად იყო ჩართული რომელიმე ხელშეკრულებაში, სესხზე უარის თქმა, ეს ჩრდილოეთისკენ კი არ, დამოუკიდებლობისკენ გადახრილი ვექტორია. „ქართული ოცნების“ გუნდმა დაიბრუნა მართვის სადავეები. არ შეიძლება მუდმივად ევროსტრუქტურებსა და დიპლომატიურ კორპუსს გადააბარო ქვეყნის მართვა, ეს ანომალიაა, დაიბრუნა და სწორადაც მოიქცა ამას ვგულისხმობ, როდესაც ვამბობ, რომ მართვას გაართვა თავი. დაიბრუნა მართვის სადავეები, სწორი ნაბიჯი გადადგა და ვექტორი გადახარა დამოუკიდებლობისკენ“, - განაცხადა დათო მაღრაძემ.