ოჯახის წევრები ერთმანეთზე პასუხს აგებენ, მაგრამ არა პოლიტიკურად,- ასე ეხმიანება პარლამენტის ვიცე-სპიკერი დავით სერგეენკო ჟურნალისტებთან დმანისში მომხდარ ინციდენტს.
როგორც სერგეენკომ განაცხადა, "ქართული ოცნების" მაჟორიტარობის კანდიდატმა საკუთარი კანდიდატურა იმ შემთხვევაში უნდა მოხსნას, თუ ინციდენტში თავად იყო ჩართული, წინააღმდეგ შემთხვევაში, ეს უფრო მორალური პასუხისმგებლობის საკითხია.
„ძალადობას არ აქვს პარტიული და პოლიტიკური კუთვნილება და ნებისმიერ შემთხვევაში, მოძალადემ პასუხი უნდა აგოს გარდაუვლად კანონის წინაშე, რაც მოხდა კიდეც, რამდენადაც მე ვიცი, დააკავეს ადამიანი, ვინც დაზიანება მიაყენა სხვებს. რაც შეეხება პასუხისმგებლობას, პასუხისმგებლობა უკვე გამოიჩინა ქვეყნის სამართალდამცავმა სისტემამ სწრაფი რეაგირებით. მე არ მგონია, აქ პოლიტიკური ჩანართი იყოს დიდი დოზით. ეს არის ძალადობა. რაც შეეხება იმას, იყო თუ არა აქ წაქეზება პოლიტიკური ნიშნით, ვფიქრობ, სულ მალე, რამდენიმე დღეში უტყუარად გვეცოდინება. თუკი დადასტურდა, რომ „ქართული ოცნების“ კანდიდატი უშუალოდ მონაწილეობდა და ეს მისი ინიციატივით იყო, რა თქმა უნდა, უნდა მოხსნას კანდიდატურა. "ქართული ოცნების" იმიჯზე ამის ასახვა გამოიხატება საარჩევნო ხმების მიღებაში. რაც შეეხება იმას, რომ კანდიდატის შვილმა მიიღო ამაში მონაწილეობა, არ მინდა გაცვეთილი ტერმინი გამოვიყენო, კი, როგორ არა, ოჯახის წევრები ერთმანეთზე პასუხს აგებენ, მაგრამ არა პოლიტიკურად. ამიტომ თუ კანდიდატი თვითონ იყო ჩართული, ჩარეული ამ ძალადობაში, მაშინ მან უნდა მოხსნას კანდიდატურა, თუკი მისი შვილი იყო, ეს უფრო მორალური პასუხისმგებლობის საკითხია,"- განაცხადა სერგეენკომ.
ცნობისათვის, შინაგან საქმეთა სამინისტრომ დმანისის მუნიციპალიტეტში „ერთიანი ნაციონალური მოძრაობის“ მხარდამჭერების დაჭრის ფაქტზე „ქართული ოცნების“ მაჟორიტარობის კანდიდატის მიხეილ დაუთაშვილის შვილი დავით დაუთაშვილი დააკავა. როგორც უწყების ინფორმაციაშია აღნიშნული, ბრალდებულმა წინასაარჩევნო შეხვედრაზე მომხდარი სიტყვიერი და ფიზიკური დაპირისპირებისას, დანის გამოყენებით სახის არეში დაზიანებები მიაყენა პარტია “ერთიანი ნაციონალური მოძრაობის" მხარდამჭერებს.
