„ბიბისი" ქართველი მოჭადრაკის, ნონა გაფრინდაშვილის მიერ „ნეთფლიქსის" წინააღმდეგ სარჩელის შესახებ წერს.

მედიასაშუალების ინფორმაციით, 25-გვერდიან სარჩელში ნათქვამია, რომ „ნეთფლიქსმა" შეგნებულად მოიტყუა ქართველი მოჭადრაკის, ნონა გაფრინდაშვილის მიღწევების შესახებ ცინიკური და იაფფასიანი მიზნისთვის, რომ სერიალისთვის მეტი დრამატულობა შეეძინა. მედიის ცნობით, „ნეთფლიქსი" ეცადა, შეექმნა შთაბეჭდილება, რომ სერიალის მთავარმა გმირმა შეძლო, მიეღწია იმისთვის, რაც აქამდე არც ერთ ქალს არ მიუღწევია, მათ შორის გაფრინდაშვილს.

ამასთან, „ბიბისის" ცნობით, სარჩელში აღნიშნულია, რომ 1968 წლისთვის, რა დროსაც მოვლენები ფინალური ეპიზოდისას ვითარდება, ნონა გაფრინდაშვილს 59 მამაკაც მოჭადრაკესთან (ერთდროულად 28 მათგანთან) ჰქონდა ნათამაშები, მათ შორის 10 იმ დროისთვის დიდოსტატის სტატუსს ატარებდა. გარდა ამისა, „ბიბისის" ცნობით, სარჩელში აღნიშნულია, რომ იმის მტკიცება, რომ გაფრინდაშვილი არასოდეს დაპირისპირებია მამაკაც მოჭადრაკეს, ტყუილი, სექსიზმი და დამცირებაა.

როგორც „ბიბისი" წერს, ნონა გაფრინდაშვილი, რომელიც თბილისში ცხოვრობს და დღემდე იღებს მონაწილეობას საჭადრაკო ტურნირებში, „ნეთფლიქსისგან" 5 მილიონი დოლარის კომპენსაციას და სერიალიდან იმ განცხადების ამოღებას ითხოვს, რომელშიც აღნიშნულია, რომ მას არასოდეს უთამაშია მამაკაც მოჭადრაკესთან. ამასთან, „ბიბისის" ცნობით, „ნეთფლიქსში" აცხადებენ, რომ პატივს სცემენ ნონა გაფრინდაშვილის ბრწყინვალე კარიერას, თუმცა ბრალდებებს უსაფუძვლოს უწოდებენ და აღნიშნავენ, რომ თავს დაიცავენ სასამართლოში.

„ნეთფლიქსის" ცნობით, „ლაზიერის გამბიტის" გამოსვლიდან 28 დღეში სერიალი 68 მილიონმა ოჯახმა ნახა. სერიალმა ოქროს გლობუსის დაჯილდოებაზე ორ ნომინაციაში გაიმარჯვა და მიმდინარე წელს „ემის" დაჯილდოებაზე 18 ნომინაციაში არის დასახელებული.