ცხოვრების ბევრ ეტაპზე მეგობრობა გზისა და ხიდის როლს ნამდვილად ასრულებს, მაგრამ როგორც ალბათ არაერთხელ წაგიკითხავთ ფეისბუქის თქვენს კედელზე, კარგი მეგობარი ახლა სანთლით საძებარია. ცოტა უფრო დიდი სანთელი დაგჭირდებათ, თუკი შოუბიზნესში ხართ და ამავე სივრცეში ეძებთ ტოლს და სწორს. თუმცა, ცოტაოდენი მონდომება, რამდენიმე წვეულებაზე მისვლა და ერთგულ მეგობარს იპოვით, რომელიც პაპარაცებს, ინსტაგრამზე აფეთქებულ შეტყობინებებს და სიმდიდრეს თქვენთან ერთად გაუმკლავდება.
აი, მაგალითად, როგორც...
ჰარი სტაილსი და ლიზო
2019 წელს One Direction-ის ვარსკვლავმა ლიზოს სიმღერის, Juice-ის ქავერი ჩაწერა. ერთი თვის შემდეგ, მათ უკვე ერთად იმღერეს Super Bowl-ის კონცერტზე მაიამიში. 2021 წლის მარტში კი ისინი უკვე გრემის დაჯილდოებაზეც ერთად გამოჩნდნენ.
ედ შირანი და კორტნი კოქსი
ერთი შეხედვით, 30 წლის ბრიტანელ მუსიკოსსა და 57 წლის ამერიკელ მსახიობს ბევრი არაფერი უნდა ჰქონდეთ საერთო, თუმცა, შირანი და კოქსი მაინც ახლო მეგობრები არიან. ჯეიმს კორდენის შოუში შირანმა თქვა, რომ კოქსი თავისმა მეგობარმა გააცნო, როცა იგი მსახიობის სახლში მოწყობილ წვეულებაზე დაპატიჟა.
"მან მითხრა, როცა კი დარჩენა მოგინდეს, შემატყობინეო. მას შემდეგ, ყოველთვის, როცა ლოს-ანჯელესში ვბრუნდებოდი, იქ ვრჩებოდი".
კრის ჯენერი და ჯენიფერ ლოურენსი
კრის ჯენერი, რომელიც ძალიან დაკავებული მენეჯერი და ექვსი ერთიმეორეზე წარმატებული შვილის დედაა, ზოგჯერ გართობისთვისაც იცლის. გართობისათვის კი ოსკაროსან ჯენიფერ ლოურენსზე უკეთესს ვის ნახავდა?! ჯენერის თქმით, ყველაფერი მაშინ დაიწყო, როცა ლოურენსი "გოგოების საღამოზე" მიიწვია.
"მას ცოტა ხნით ეცალა, ამიტომ სადილად მოვიწვიე. რამდენიმე კოქტეილი დავლიეთ და კარგად ვიმხიარულეთ", — იხსენებს ჯენერი, — "მერე კი, როგორც მაშინ ხდება ხოლმე, როცა გოგოები ერთად იკრიბებიან, ჩემს კარადაში აღმოვჩნდით; ტანსაცმელს ვათვალიერებდით, შემდეგ მან რამდენიმე მოისინჯა".
მერილ სტრიპი და 50 Cent
ლეგენდარული მსახიობი და ასეთივე ლეგენდარული რეპერი არა მხოლოდ შესანიშნავი მეგობრები არიან, წარმოუდგენლად საყვარელი გაცნობის ისტორიაც აქვთ. ჯიმი კიმელთან 50 Cent-მა გაიხსენა, რომ 2014 წელს იგი სტრიპის გვერდით იჯდა კალათბურთის მატჩზე. ეს პირველი თამაში იყო, რომელსაც მერილი ესწრებოდა, ამიტომ რეპერს მისთვის ყველაფრის ახსნა მოუწია.
კეტი პერი და ნილ დეგრას ტაისონი
ვის მეგობრობას არ წარმოვიდგენდით, თუმცა, პოპვარსკვლავსა და ასტროფიზიკოსს შორის ახლო ურთიერთობამ 2017 წელს ყველა გააოცა. ამ წელს პერი დეგრას ტაისონიმა თავის გადაცემაში, StarTalk-ში მიიწვია, სადაც უცხოპლანეტელებიდან კოსმოსურ მოგზაურობამდე ყველაფერზე ისაუბრეს. მომღერალმა მეცნიერს უამრავი შეკითხვა დაუსვა მეცნიერებაზე, მათემატიკასა და სამყაროზე და მართალია, ბევრ რამეზე ვერ შეთანხმდნენ, საერთო მაინც იმაზე მეტი აღმოაჩნდათ, ვიდრე ეგონათ.
კიმ კარდაშიანი და სერენა უილიამსი
კარდაშიანისა და უილიამსის გზები ჯერ კიდევ მაშინ გადაიკვეთა, როცა კიმი სხვადასხვა ცნობილი ადამიანის პირად ასისტენტად მუშაობდა. თანამშრომლობის შემდეგ ისინი მეგობრებად დარჩნენ, კარდაშიანს კი ყოფილი უფროსის მოსაგონრად კარგის მეტი არაფერი დარჩა.
"ერთხელ მახსოვს, სან-ფრანცისკოში საქველმოქმედო ღონისძიებამდე ვვახშმობდით. სერენამ, ობამამ და კანიემ იმღერეს. საოცრება იყო", — იხსენებს კიმი, — "იგი საკუთარ თავს ხშირად ჩუქნის ასეთ მომენტებს — ერთგვარი განტვირთვის საშუალებაა მისთვის. სერენა ის გოგოა, რომელსაც შეგიძლია დაურეკო და ყველაფერს მოუყვე. შენთვის ყოველთვის მოიცლის, თუმცა, არასდროს განგსჯის. ჰო, და კიდევ საიდუმლოს შენახვა იცის".
ელტონ ჯონი და ემინემი
მიუხედავად იმისა, რომ შემოქმედებითი თვალსაზრისით ორ ძალიან ცნობილ მუსიკოსს საერთო არაფერი აქვს, მათი გზები მაინც გადაიკვეთა 2001 წლის გრემის დაჯილდოებაზე და ისინი ისე დამეგობრდნენ, რომ ემინემი ნარკოტიკულ საშუალებებზე უარის თქმაში დახმარებასაც კი ჯონს უმადლის.
"როცა პირველად მომინდა, რომ ფხიზელი ვყოფილიყავი, ელტონს დავურეკე და ამაზე ველაპარაკე", — იხსენებს ემინემი, — "ის ამ საქმესა და ცხოვრების მსგავს წესში ჩახედულია და იცის, რამდენად შეიძლება სიტუაცია დაიძაბოს. მას კარგად ესმის ის წნეხი და ნებისმიერი მიზეზიც, რის გამოც ნარკოტიკებს შეიძლება გაეკარო".
ჯენიფერ ენისტონი და სელენა გომესი
ესეც კიდევ ერთი მეგობრობა, რომელშიც დიდი ასაკობრივი სხვაობაა — მთელი 33 წელი. ამის მიუხედავად, ენისტონსა და გომესს ერთმანეთთან მაინც განსაკუთრებული ურთიერთობა აკავშირებთ. გზების გადაკვეთის მიზეზი კი ალინ კეშიშიანია, რომელიც ორივე მათგანის მენეჯერია.
"პატარა ანგელოზია, რომელზე ზრუნვაც მინდება", — განაცხადა ენისტონმა გომესზე საუბრისას, — "იგი ყოველთვის საოცარი იყო და მხარს მიჭერდა".
პიტბული და ჯონ ტრავოლტა
ისინი დიდი ხანია, უკვე ისე მეგობრობენ, რომ ტრავოლტა მუსიკოსის ვიდეოკლიპებსა და სცენებზეც გამოჩნდა და პიტბულზე ჰოლივუდში საკუთარი ხელის ანაბეჭდის დატოვებისას სიტყვით გამოსვლის დროს ილაპარაკა.
"არმანდოს ერთხელ ვუთხარი, რომ ცხოვრების ბოლომდე მასთან მსურდა მეგობრობა", — აღნიშნა მან სიტყვით გამოსვლისას, — "თუმცა, ძნელად თუ წარმოვიდგენდი, რომ აქ ერთად ვიქნებოდით უკვდავყოფილები".
მართა სტიუარტი და სნუპ დოგი
როცა სტიუარტისა და სნუპ დოგის ერთობლივი კულინარიული შოუ დაანონსდა, ბევრს გაუკვირდა, თუმცა, სიმართლე ითქვას, გასაოცარი არც არაფერი იყო. რეპერი და ანტრეპრენერი ერთმანეთს პირველად 2009 წელს შეხვდნენ, როცა სნუპ დოგი სტიუარტის გადაცემაში იყო მიწვეული. რამდენიმე წლის შემდეგ მათ უკვე ერთობლივი საქმე დაიწყეს და კიდევ უფრო დაახლოვდნენ.
