ჟურნალისტი ეკა კვესიტაძე საზოგადოებრივი მაუწყებლის განცხადებას ეხმაურება. როგორც ცნობილია, საზოგადოებრივი მაუწყებელი კვესიტაძის გადაცემა "აქცენტებში" გამოთქმული მოსაზრებებს გაემიჯნა.
"მალე დამგმობენ... მაინტერესებს ამ სიტყვების ავტორი ვინ არის. ვერ გავარკვიე ჯერ...
ეჭვი მაქვს ბაქრაძე და ჩართოლანი - სხვას არავის აქვს უფლებამოსილება ილაპარაკოს მაუწყებლის სახელით. ერთი მოვალეობის შემსულებელია, მეორე გენერალური პროდუსერი", - წერს კვესიტაძე.
საზოგადოებრივი მაუწყებლის" განცხადება მაუწყებლის ოფიციალურ ვებ-გვერდზე გავრცელდა:
"26 მარტს ეკა კვესიტაძის საავტორო გადაცემა "აქცენტების" პირველი ნაწილის თემა "რა როლი აქვს ეკლესიას სოციალურად დაუცველების დახმარებაში და რამდენად წარმატებულად ასრულებს ამ როლს" წარმოადგენს აქტუალურ საკითხს, თუმცა გადაცემაში დასმულმა შეკითხვებმა გამოიწვია საზოგადოების გარკვეული ნაწილის უკმაყოფილება და აღშფოთება.
"აქცენტები" წარმოადგენს ეკა კვესიტაძის საავტორო გადაცემას და "საზოგადოებრივი მაუწყებლის" ხელმძღვანელობა არ ერევა მის სარედაქციო დამოუკიდებლობაში.
შესაბამისად, გადაცემაში გამოთქმული მოსაზრებები არ წარმოადგენს მაუწყებლის სარედაქციო პოლიტიკის ნაწილს", - ნათქვამია განცხადებაში.