მართალია, ჩვენი ქვეყნის მაღალჩინოსნები გვიმტკიცებენ, რომ საქართველოში კრიმინალმა იკლო, მაგრამ იმდენად ხშირად გვესმის ამა თუ იმ ძალადობის შესახებ, რთულია, იმ სტატისტიკას დაუჯერო, რაზეც ხელისუფლების წარმომადგენლები აპელირებენ. ყოველდღიურად გვესმის და ვკითხულობთ ძალადობრივი ფაქტების შესახებ.

საზოგადოების დიდი აღშფოთება მოჰყვა 25 ივნისს ჯერ სამეგრელოში, შემდეგ კი ქუთაისში, არასრულწლოვანზე სექსუალური ძალადობის ფაქტებს.

პროკურატურამ არასრულწლოვნის გაუპატიურების ფაქტზე ბ.გ-ს და ზ.გ-ს ბრალდება წარუდგინა, ხოლო ზ.გ.-ს ასევე წარედგინა ბრალდება არასრულწლოვნის მიმართ სექსუალური ხასიათის სხვაგვარი ქმედებისთვის.

აღსანიშნავია ისიც, რომ ადგილობრივმა მოსახლეობამ გაუპატიურებაში ბრალდებულ მამა-შვილს სახლი დაუწვა.

როგორც ირკვევა, დაკავებული მამა-შვილი არასრულწლოვანს 2 წლის განმავლობაში აუპატიურებდნენ. დაკავებულები 65 და 35 წლის მამაკაცები არიან. არასრულწლოვანი დაკავებულების მეზობელია.

ამასთან, ქუთაისში, მოზარდის გაუპატიურების მცდელობის ბრალდებით ერთი პირი დააკავეს. შინაგან საქმეთა სამინისტროს ინფორმაციით, მომხდართან დაკავშირებით გამოძიება 138-ე მუხლით მიმდინარეობს.

უფლებადამცველი და იურისტი ლია მუხაშავრია მიიჩნევს, რომ საქმე გვაქვს სისტემურ პრობლემასთან და მისი თქმით, აბსოლუტად, ყველა უწყება ჩართული უნდა იყოს არსებული მდგომარეობის გაუმჯობესებაში.

„ამას დიდი ისტორია აქვს, უბრალოდ, ახლა ამოიფრქვა. ჩვენ მოძალადე საზოგადოებაში ვცხოვრობთ, ეს უკვე აიხასა ბავშვებზეც. მკვეთრად გამოჩნდა, რომ მოძალადე საზოგადოება ბავშვებზეც ძალადობს. რადგან თქვენ, მედია ხართ ღია და გაინტერესებთ ეს საკითხები, ცნობილი ხდება ამ ფაქტების შესახებ. ეს არის მიზეზი, უბრალოდ, ჩვენ დიდი ხანი მოვდიოდით ამ გზაზე და ახლა მივაღწიეთ ზღვარს.

პრობლემის მოგვარება მხოლოდ კომპლექსურად შეიძლება, ამაში უნდა იყოს ჩართული არა მხოლოდ გამოძიება, სასამართლო და სამართალდამცავი ორგანოები, ასევე განათლების სისტემა, კულტურის უწყება, საზოგადოება და ყველა დაინტერესებული მხარე. ამ პრობლემის გადაჭრა იოლად და მალე ვერ მოხდება, თუნდაც დღეს გადავწყვიტოთ, რომ გვინდა ამას შევებრძოლოთ. სამწუხაროდ, არაფერი კეთდება იმ მიმართულებით, რომ მართლაც სავალალო მდგომარეობა შეიცვალოს და მადლობა მედიას, რომ ფაქტები მაინც ხდება ცნობილი, რაც იწვევს საზოგადოების რეაქციას. შეიძლება საზოგადოების ეს რეაქცია იყოს ისიც, რომ გააცნობიეროს ის ძალადობრივი ატმოსფერო, რომელშიც ვცხოვრობთ და მოუნდეს ამ გარემოს შეცვლა“, - თქვა ლია მუხაშავრიამ For.ge-სთან.

იურისტი ლევან ალაფიშვილი თვლის, რომ ახალი თაობა სწავლობს იმას, რასაც უყურებს. მისივე თქმით, პირველ რიგში, არსებული მდგომარეობა უნდა გავაცნობიეროთ, რომ ვითარება შევცვალოთ.

„სისტემურობაზე საუბარი რთულია, თუმცა ჩვენი სამოქალაქო საზოგადოების ავადობა წარმოაჩენს იმ დეპრესიულ მძიმე ფონს, რომელშიც ყველანი ვცხოვრობთ და ვზრდით მომავალ თაობას. რასაც ისინი უყურებენ, ბუნებრივია, ეს ხდება მათთვის, გარკვეულწილად, სამაგალითო.

ვისაც სად და როგორ შეგვიძლია, იმაზე ვძალადობთ, ხელისუფლებიდან დაწყებული, რიგითი მოქალაქით დამთავრებული. ყველამ ვიცით, რომ სადარბაზოს დანაგვიანება არ შეიძლება, თუმცა, მაინც ვანაგვიანებთ, ამით არა მხოლოდ ნაგავს ვყრით კონკრეტულ ლოკაციაზე, არამედ იქ მაცხოვრებლებზე, ჩვენს თანამოქალაქეებზე, მათ უფლებებზე ვძალადობთ.

ჩვენი საზოგადოების სენი არის ის, რომ ძალადობას არ ვემიჯნებით. უნდა მოვინდომოთ და გავაცნობიეროთ, რა არის ძალადობა, ის არ არის მხოლოდ ფიზიკური ცემა. ეს რთული პრობლემაა, აქ მხოლოდ ხელისუფლების იმედად ყოფნა არ გამოვა, წარუმატებელი იქნება, ეს მთელმა საზოგადოებამ უნდა ვთქვათ.

90-იანი წლებიდან დღემდე, 30 წელი ყოველთვის და ყველგან ძალადობა დომინირებს, ეს გარკვეულწილად აისახება საზოგადოების ცხოვრებაზე და მის ქმედებეზეც. თუმცა, მხოლოდ ეს არ არის, ამ ყველაფერს თუ არ გავაცნობიერეთ, ეს პრობლემა მუდმივად იარსებებს“, - თქვა ლევან ალაფიშვილმა For.ge-სთან.