„დიდი შვიდეულის“ ლიდერებმა განაცხადეს, რომ პანდემიის დამარცხებას 2022 წელს გეგმავენ

„დიდი შვიდეულის“ ლიდერებმა განაცხადეს, რომ პანდემიის დამარცხებას 2022 წელს გეგმავენ

„დიდი შვიდეული“ ქვეყნების ლიდერები კორონავირუსის პანდემიის დამარცხებას 2022 წელს გეგმავენ. ამის შესახებ ბრიტანეთში გამართული G7-ის სამიტის შემდეგ გამოქვეყნებულ კომუნიკეშია ნათქვამი.

ლიდერები შეთანხმდნენ, რომ ამ მიზნის მისაღწევად მომავალ წელს სხვადასხვა ქვეყანას კოვიდვაქცინების მილიარდ დოზას მიაწვდიან.

„ვაღიარებთ, რომ 2022 წელს პანდემიის დასასრულებლად მსოფლიოს მოსახლეობით სულ მცირე 60% უნდა აიცრას, ამიტომ, სიცოცხლის გადასარჩენად ჩვენს ქმედებებს ვააქტიურებთ“,- ნათქვამია განცხადებაში.

G7-ის ლიდერებმა ასევე აღნიშნეს, რომ რუსეთთან „სტაბილური და პროგნოზირებადი“ ურთიერთობების დამყარება სურთ და მოსკოვს „დესტაბილიზაციური ქმედებების“ შეწყვეტისკენ მოუწოდეს.

„დიდი შვიდეულის“ სახელმწიფოების ლიდერები ასევე შეთანხმდნენ, რომ 2050 წლისთვის CO2-ის გამოყოფას შეწყვეტენ, ჩინეთს ადამიანის უფლებების პატივისცემისკენ მოუწოდებენ და ტოკიოში ოლიმპიური და პარაოლიმპიური თამაშების ჩატარებას დაუჭერენ მხარს.

G7-ის სამიტი 11-13 ივნისს ინგლისში, ქალაქ კარბის-ბეიში ჩატარდა. „დიდი შვიდეულის“ ლიდერები ბოლო 2 წლის განმავლობაში ერთმანეთს პირადად პირველად შეხვდნენ, რადგან შარშან სამიტი პანდემიის გამო გაუქმდა.