ამერიკელი რეპერი DMX 50 წლის ასაკში გარდაიცვალა. არტისტი ნარკოტიკული საშუალების ზედოზირებით გამოწვეული გულის შეტევით კლინიკაში 6 დღის წინ, 3 აპრილს გადაიყვანეს.
დიემექსმა შემოქმედებითი კარიერა 1991 წელს დაიწყო. 1998 წელს კი სადებიუტო ჩანაწერი It's Dark and Hell Is Hot გამოუშვა, რომლის 250 ათასზე მეტი ეგზემპლარი პირველივე კვირაში გაიყიდა. 1999 წელს გამოდის რეპერის ყველაზე წარმატებული ნამუშევარი ... And Then There Was X, რომელშიც ჰიტი Party Up (Up in Here) შევიდა. დღემდე მუსიკოსმა 8 სტუდიური ალბომის გამოცემა და ისეთ არტისტებთან თანამშრომლობა მოასწრო, როგორებიც არიან: Jay-Z, Nas, Method Man და Swizz Beatz. სხვადასხვა დროს რეპერი გრემის სამ ნომინაციაზე იყო წარდგენილი. მუსიკოსი რიგით მერვე ალბომზე აქტიურად მუშაობდა.
