CNN: ამერიკელი დიპლომატები მოუწოდებენ პომპეოს, ვაშინგტონში მომხდარ არეულობებში ტრამპის როლი დაგმოს

CNN: ამერიკელი დიპლომატები მოუწოდებენ პომპეოს, ვაშინგტონში მომხდარ არეულობებში ტრამპის როლი დაგმოს

ამერიკელი დიპლომატები მოუწოდებენ სახელმწიფო მდივან მაიკ პომპეოს, ვაშინგტონში მომხდარ არეულობებში პრეზიდენტ დონალდ ტრამპის როლი დაგმოს. ინფორმაციას ამის შესახებ საკუთარ წყაროზე დაყრდნობით ტელეკომპანია CNN-ი ავრცელებს.

ტელეკომპანიის ინფორმაციით, 100-მდე დიპლომატი პომპეოს სახელზე მიმართვას ამზადებს. ისინი აცხადებენ, რომ „სახელმწიფო დეპარტამენტმა აშშ-ის ხელისუფლებაზე განხორციელებულ თავდასხმაში პრეზიდენტის როლი უნდა დაგმოს“.

„ტრამპის განცხადებებს მოჰყვა ის, რაც კაპიტოლიუმში ვიხილეთ, მათ შორის 5 ადამიანის გარდაცვალება, არაერთი ადამიანის დაშავება, სახელმწიფო საკუთრების დაზიანება და ვანდალიზმი. საზღვარგარეთ აშშ-ის იმიჯს უდიდესი ზიანი მიადგა“, - აღნიშნულია მიმართვაში.

6 იანვარს ვითარება ვაშინგტონში მას შემდეგ დაიძაბა, რაც დონალდ ტრამპის მხარდამჭერები კაპიტოლიუმის შენობაში შეიჭრნენ, სადაც საპრეზიდენტო არჩევნების შედეგებს ამტკიცებდნენ. დემონსტრანტები ჯო ბაიდენის გამარჯვებას აპროტესტებდნენ. შენობიდან კონგრესმენთა ევაკუაცია განხორციელდა. არეულობის შედეგად 4 ადამიანი დაიღუპა. ვითარების კონტროლქვეშ აყვანას რამდენიმე საათი დასჭირდა, რის შემდეგაც კონგრესმა მუშაობა განაახლა და ჯო ბაიდენის პრეზიდენტის პოსტზე არჩევა დაამტკიცა.