უელსში 8 წლის წინ დაკარგული ში-ცუს ჯიშის ძაღლი პატრონს დაუბრუნეს. ამის შესახებ New York Post-ი წერს.
გამოცემის ინფორმაციით, როქსი 2013 წელს დაიკარგა, როცა მისი პატრონი - მაგდალენა კლუბჩუკი სამსახურში იყო. ქალი ცხოველს რამდენიმე კვირის განმავლობაში უშედეგოდ ეძებდა და გადაწყვიტა, რომ ის მანქანამ გაიტანა ან ვინმემ მოიპარა.
რამდენიმე დღის წინ კი ძაღლი ქალაქ ბაკლის ქუჩებში შენიშნეს. ის ცხოველთა გადარჩენის ადგილობრივ თავშესაფარში მიიყვანეს, სადაც გაირკვა, რომ ის ჩიპირებულია. ჩიპის მეშვეობით თავშესაფრის თანამშრომლები მაგდალენას დაუკავშირდნენ. როქსი და მისი პატრონი მეორე დღეს შეხვდნენ ერთმანეთს.
„ძალიან ემოციური შეხვედრა იყო. ვიგრძენი, რომ მიცნო“, - განუცხადა კლუბჩუკმა ჟურნალისტებს.
