ვთქვით, რომ დროებითი საგამოძიებო კომისია შეიქმნას და რიგგარეშე არჩევნები მხოლოდ იმ შემთხვევაში ჩავატაროთ, თუ ერთპროცენტიანი გადახრა იქნება-თქო. ეს მათთვის მთავარი დარტყმა იყო, - ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.
მისი თქმით, მმართველ გუნდს არ უთქვამს, რომ მოლაპარაკების მაგიდასთან არ დაჯდება და მოლაპარაკებას აზრი არ აქვს.
„მოლაპარაკებას აზრი ყოველთვის აქვს და ამისთვის მზად ვართ. ჩვენ სხვადასხვა საკითხი გავახმოვანეთ და ვერც ერთ პუნქტს ვერ დამისახელებთ, რომელიც იყო არასამართლიანი და სახელმწიფო ინტერესებიდან არ გამომდინარეობს. მთავარი პირობა მათთვის მთავარი დარტყმა იყო – რიგგარეშე არჩევნებს ითხოვდნენ? ვთქვით, რომ დროებითი საგამოძიებო კომისია შეიქმნას და რიგგარეშე არჩევნები მხოლოდ იმ შემთხვევაში ჩავატაროთ, თუ ერთპროცენტიანი გადახრა იქნება-თქო. ეს მათთვის მთავარი დარტყმა იყო. ეს მათთვის იყო მინიმუმ ნოკაუტი, რადგან წარმოუდგენლად მიაჩნიათ, გამოძიებამ დაადგინოს, რომ „ქართულმა ოცნებამ“ ერთპროცენტიანი პრივილეგია მიიღო არჩევნების შედეგებში“, - განაცხადა მამუკა მდინარაძემ.
