„ოპოზიციას არ სჯერა ამ არჩევნების გაყალბების, უბრალოდ ცდილობენ, ეს დააჯერონ საზოგადოებას“, - ამის შესახებ „ქართული ოცნების“ ერთ-ერთმა ლიდერმა, მამუკა მდინარაძემ პარტიის ოფისში გამართულ ბრიფიგზე განაცხადა.
„გუშინ, მთელი დღის განმავლობაში პარტიული ტელევიზიები აქცენტების სხვა მიმართულებით გადატანას ცდილობდნენ, რაც იმაში მდგომარეობდა, რომ მთავარი საკითხი გამოტოვეს. მთავარი საკითხი იყო ის, რომ ჩვენ ვთქვით, რომ ერთი პროცენტის ჩვენს სასარგებლოდ გადახრის შემთხვევაში, თუ ასეთს აღმოაჩენს საგამოძიებო კომისიის ფარგლებში ვინმე, მზად ვართ, დავნიშნოთ, რიგგარეშე არჩევნები. ამის გარდა ილაპარაკეს ყველაფერზე - დაფინანსებაზე, მუქარაზე, მაგრამ არა მთავარ საკითხზე. გამოდის, რომ თუ ამაზე არ თანხმდები და ამას მუქარად აღიქვამ, არ გჯერა იმის, რასაც ლაპარაკობ. დიახ, მათ არ სჯერათ ამ არჩევნების გაყალბების, უბრალოდ ცდილობენ, ეს დააჯერონ საზოგადოებას“, - აღნიშნა მამუკა მდინარაძემ.
„ქართულ ოცნებასა“ და ოპოზიციას შორის მოლაპარაკებების მეხუთე რაუნდი დღეს აღარ გაიმართება.
მმართველი გუნდი იმედოვნებს, რომ მიუხედავად ზოგიერთი ოპოზიციონერის მცდელობისა, ჩაშალონ მოლაპარაკებები, მხარეები შეთანხმდებიან.
ოპოზიცია კი მოთხოვნებს არ ცვლის. ისინი, მოთხოვნების შეუსრულებლობის შემთხვევაში, პარლამენტში შესვლას გამორიცხავენ. მოლაპარაკების ჩაშლისა და საბოტაჟის სურვილში ამხილა ალეკო ელისაშვილმა „ევროპული საქართველო“.
