ჯონ ტოლკინის ნაწარმოებების ეკრანიზაციებში მონაწილე მსახიობებმა მწერლის სახლის გამოსასყიდად კრაუდფანდინგის კამპანია წამოიწყეს. ამის შესახებ The Guardian-ი წერს.

გამოცემის ინფორმაციით, საუბარია ოქსფორდში მდებარე სახლზე, რომელშიც მწერალი 1930-1947 წლებში ცხოვრობდა. სწორედ აქ დაწერა მან ლეგენდარული „ჰობიტი“ და ტრილოგია „ბეჭდების მბრძანებელი“. კამპანიაში ჩართულები არიან მსახიობები: იენ მაკკელენი (გენდალფი, „ბეჭდების მბრძანებელი“, „ჰობიტი“), ჯონ რის-დევისი (გიმლი, „ბეჭდების მბრძანებელი“) და მარტინ ფრიმენი (ბილბო ბეგინსი, „ჰობიტი“). მათ ტოლკინის შემოქმედების მოყვარულებთან ერთად 6 მილიონი დოლარის შესაგროვებლად 3 თვე აქვთ.

მსახიობების ცნობით, სახლის ყიდვის შემდეგ მასში ჯონ ტოლკინის სახელობის ლიტერატურული ცენტრი მოეწყობა. მასში რეგულარულად ჩატარდება სხვადასხვა შეხვედრა, კონკურსი და სხვა სახის ღონისძიებები.