ლაშანა ლინჩმა, რომელიც No Time To Die-ში ნომის როლს ასრულებს, დაადასტურა, რომ ის ჯეიმს ბონდისგან აგენტი 007-ის ტიტულს გადაიბარებს.
ლინჩი ბონდის 25-ე ოფიციალურ ფილმში გამოჩნდება, რომლის პრემიერაც 2021 წლის აპრილისთვისაა დაგეგმილი მას შემდეგ, რაც ის კორონავირუსის პანდემიის გამო ორჯერ გადაიდო. ფილმში ლინჩი სრულიად ახალი პერსონაჟის, ნომის, როლს შეასრულებს. No Time To Die-ში დენიელ კრეიგი ჯეიმს ბონდის როლს მეხუთედ და უკანასკნელად მოირგებს და კინემატოგრაფიის ერთ-ერთი ყველა საკულტო პერსონაჟის 15-წლიანი განსახიერების შემდეგ ამ პოსტს დატოვებს.
კერი ფუკუნაგას გადაღებულ No Time To Die-ში აგრეთვე მონაწილეობენ რამი მალეკი საფინის როლში — იდუმალი ბოროტმოქმედის, რომლის სახეც ნაიარავებითაა მოპირკეთებული — და ანა დე არმასი პალომას როლში — CIA-ს აგენტისა და ბონდის გოგოს, რომელსაც მსახიობი ძლიერსა და რეალისტურს უწოდებს. ფილმში აგრეთვე გამოჩნდებიან ლეა სეიდუ და კრისტოფ ვალცი, რომლებიც Spectre-ში შესრულებულ როლებს დაუბრუნდებიან, დრ. მედელინ სუონსა და ბლოფელდს, შესაბამისად.
ჯერ კიდევ 2019 წელს არსებობდა ჭორები, რომ ლინჩი ახალი აგენტი 007-ის როლს შეასრულებდა, თუმცა ახლა Harper's Bazaar-მა ეს უკვე დაადასტურა და თქვა, რომ ნომიმ ფილმების სამყაროში ჯეიმს ბონდი ჩაანაცვლა ამ უკანასკნელის მიერ სამსახურეობრივი მოვალეობების დასრულების შემდეგ.
ლინჩმა ფაქტის დადასტურებასთან ერთად იმაზეც ისაუბრა, თუ რამდენად დიდი პასუხისმგებლობაა ამ როლის მიღება. ის ამბობს, რომ მართალია, სოციალურ ქსელში მასზე შემოტევები ძალიან მტკივნეულია, რის გამოც დროებით გაუქმებულიც ჰქონდა ანგარიში, თუმცა მას ესმის, რომ ეს შემოტევები პირადად მას არ მიემართებოდა და შავკანიანი ქალისთვის აგენტი 007-ის მოსასხამის მორგება ბევრად უფრო დიდია, ვიდრე ერთი ადამიანი:
მე ერთი შავკანიანი ქალი ვარ — რომელიმე სხვა შავკანიანი ქალი რომ დაემტკიცებინათ როლზე, ზუსტად იგივე მოხდებოდა და მას იმავენაირად შეუტევდნენ და შეურაცხყოფდნენ. უბრალოდ, საკუთარ თავს უნდა შევახსენო, რომ ამაზე საუბარი მიდის და რომ რაღაც ისეთის ნაწილი ვარ, რაც ძალიან, ძალიან რევოლუციური იქნება.
ლინჩის ახალ 007-ად დადასტურება თანაეხვედრება იმას, რაც No Time To Die-ის ბოლო ტრეილერში ვნახეთ, რომელშიც ნომი კრეიგის ბონდის პერსონაჟის თანასწორია და მასთან ერთად მიდის მთავარ მისიაზე. რამდენად კარგად მოირგებს ლინჩის პერსონაჟი ახალ ტიტულს, სრულიად სხვა საკითხია, თანაც იმის გათვალისწინებით, რომ ტრეილერში იმაზეც იყო მინიშნებები, რომ ბონდს სხვა პერსონაჟი უღალატებს, რომელიც, შესაძლოა, ნომი აღმოჩნდეს, თუკი მოღალატე მედელინ სუონი ან პალომა არ იყო, როგორც უფრო მოსალოდნელია.
მიუხედავად ამისა, ძალიან აღმაფრთოვანებელია ის აზრი, რომ No Time To Die ბონდის ისეთი ფილმი იქნება, რომელშიც საიდუმლო აგენტი მხოლოდ მთავარ ბოროტმოქმედს კი არა, თავის მეწყვილე აგენტსაც დაუპირისპირდება, რომელიც მასავით მარჯვეა და რომელმაც, შესაძლოა, დაამტკიცოს, რომ 007-ის იმაზე უკეთესი ვერსია იქნება, ვიდრე კრეიგის ბონდი ოდესმე ყოფილა. იმედი ვიქონიოთ, რომ ლინჩი პერსონაჟს ღირსეულად განასახიერებს, და, პასუხისმგებლობაზე ნათქვამ მის კომენტარს თუ გავითვალისწინებთ, სავარაუდოდ, ასეც იქნება.
