პოპის დედოფალმა მადონამ დევიდ გეტასთან ალბომის ჩაწერაზე უარი მისი ზოდიაქოს ნიშნის გამო თქვა. ამის შესახებ ფრანგმა დიჯეიმ You Tube-არხ McFly et Carlito-სთან ინტერვიუში განაცხადა.

მან მუსიკოსთან შეხვედრა დეტალურად გაიხსენა:

„მითხრა, რომ ჩემი რემიქსი მოეწონა და მისი მომავალი ალბომის პროდიუსერობა შემომთავაზა. ლანჩზე მივედი მასთან. ყველაფერზე ვილაპარაკეთ - მუსიკაზე, იმაზე, თუ რა უნდა გააკეთოს ამ ალბომში. ძალიან სასიამოვნო იყო. მხოლოდ ორნი ვიყავით. ძალიან მოდუნებული და კარგი გარემო. ლანჩი გვაქვს, ეს მართლა ხდება. და უკვე ვიწყებ ფიქრს იმაზე, თუ როდის დავიწყებთ ერთად მუშაობას“, - ამბობს გეტა.

ამის შემდეგ 52 წლის დიჯეიმ თქვა რომ ზოდიაქოთი მორიელია.

„უცებ სახე შეეცვალა და მეუბნება: „ბოდიში, ერთად ვერ ვიმუშავებთ. ძალიან სასიამოვნო იყო შენი გაცნობა. კარგად“, - იხსენებს დიჯეი.

თვითონ მადონა ზოდიაქოთი ლომია.