ინფექციური საავადმყოფოს სამედიცინო დირექტორის, მარინა ეზუგბაიას განცხადებით, ახალი 13 კოვიდინფიცირებულიდან 12-ის წყარო ცნობილია, ერთთან დაკავშირებით კი, კვლევა გრძელდება.

„ინფიცირებულთაგან 3-ის წყარო ლილოს ბაზრობაა, 1-ის გაჩიანი, 5 შემოტანილი შემთხვევაა და მათგან 4 სატვირთო ავტომობილის მძღოლია, 1 დადასტურებულ შემთხვევასთან კონტაქტი, 2 სამედიცინო პერსონალია. ერთ პაციენტთან დაკავშირებით, კვლევა გრძელდება“ - განაცხადა მარინა ეზუგბაიამ.

მარინა ეზუგბაიას განცხადებით, მათ ცენტრში 39 ინფიცირებული მკურნალობს. მათგან 2-ის მდგომარეობა მძიმეა, თუმცა პროგრესირება არ შეინიშნება.

ამ დროისთვის საქართველოში კორონავირუსის 1117 შემთხვევაა დადასტურებული, გამოჯანმრთელებულია 917 ადამიანი, 16 პაციენტი კი გარდაიცვალა.

კარანტინის რეჟიმში 5936 ადამიანი რჩება, სტაციონარში მეთვალყურეობის ქვეშ - 268, უცხოეთიდან სამკურნალოდ გადმოყვანილია საქართველოს 41 მოქალაქე.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი - საყოველთაო კარანტინის რეჟიმი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.