დღეს რამდენიმე პაციენტთან განმეორებით ტესტზე უარყოფით პასუხს ველოდებით, რის შემდეგაც ისინი კლინიკიდან გაეწერებიან - ამის შესახებ თბილისი ინფექციური საავადმყოფოს ინფექციონისტმა „იმედის დილის“ ეთერში განაცხადა.

ალექსანდრე გოგინავას თქმით, ამ დროისთვის მათ ცენტრში 40 პაციენტს მკურნალობენ, მათგან სამი კი - რეანიმაციულ განყოფილებაშია.

„მათი მდგომარეობა კვლავ მძიმეა, თუმცა 2 მათგანის მდგომარეობა შედარებით სტაბილურია. ასევე გვყავს ახალი პაციენტები, მათ შესაბამისი კვლევები უტარდებათ და მათ ჯანმრთელობაზე დეტალები დღის განმავლობაში გახდება ცნობილი“, - განაცხადა ალექსანდრე გოგინავამ.

საქართველოში კორონავირუსი 296 ადამიანს დაუდასტურდა, მათგან 69 გამოჯანმრთელდა, 3 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში აგრძელებენ მკურნალობას.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა.