თბილისის ინფექციურ საავადმყოფოში კორონავირუსზე პირველად უარყოფითი ტესტირების შედეგი რამდენიმე პაციენტზე დაფიქსირდა. ამის შესახებ თბილისის ინფექციური საავადმყოფოს ინფექციონისტმა ეკა ნაფეტვარიძემ „დილის შოუს“ და „ანატომიის“ გაერთიანებულ ეთერში განაცხადა.

„დღეს-დღეობით ველოდებით 3-4 პაციენტის გამოჯანმრთელების პასუხს. გვაქვს უკვე პირველადი უარყოფითი პასუხი და კარგი ამბები გვაქვს. იმედი ვიქონიოთ, რომ მომდევნო დღეებში გამოჯანმრთელებული პაციენტების რაოდენობა კიდევ დაგვემატება“, - აღნიშნა ნაფეტვარიძემ.

ექიმმა კორონავირუსისთვის დამახასიათებელი სიმპტომებიც განმარტა

„ჩვენს კლინიკაში პაციენტების დაახლოებით 10-12%-ს აღენიშნებათ გემოს დაქვეითება, ყნოსვის სრული დაკარგვა. ასევე მათ ნაწილს, 3-4%-ს აღენიშნება დიარეა. ზოგიერთი მათგანი აღნიშნავს გულმკერდში სიმწვავის შეგრძნებას, ტკივილს გულმკერდის არეში. მხოლოდ 2 პაციენტი აღნიშნავს გულმკერდშ ტკივილს. უფრო გავრცელებული არის ცხელება, ტემპერატურა, ხველა და საერთო სისუსტე თითქმის ყველა მათგანს აქვს გამოხატული, - განაცხადა ექიმმა.