თამთა თოდაძის დედა ხათუნა ოქროპირიძე ამბობს, რომ თოდაძეები დეპუტატის ოჯახს დიდი ხანია იცნობს, თამთა „ქართული ოცნების“ კოორდინატორი იყო. ხათუნა ოქროპირიძე ამბობს, რომ მან ჯიშკარიანი გაიცნო, რათა სცოდნოდა, მისი შვილი ვისთან მუშაობდა.
„მივედი ილია ჯიშკარიანთან და გავიცანი, რათა მცოდნოდა, ჩემს შვილს ვისთან უნდა ემუშავა. მას შემდეგ რაც, მედიით ეს ინციდენტი გასაჯაროვდა, როგორც ცნობილია, მეზობელი, მამუკა ფეიქრიშვილი მოვიდა და მითხრა, ამხელა დავას, შეურიგდეთ და მოილაპარაკოთ ჯობიაო. მე რა თქმა უნდა, სასტიკი წინააღმდეგი ვარ, ჩემი შვილი გავყიდო? არანაირი მატერიალური ბენეფიტი ამად არ მიღირს. თავად მამუკას ჩემი შვილების ტოლი შვილები ჰყავს და მას რომ ვუთხარი, შენს ოჯახს რომ მსგავსი რამ შეემთხვეს შეურიგდები-მეთქი? მან მითხრა, ხელები ამიწევიაო და ასე დასრულდა ამ თემაზე ჩვენს შორის საუბარი.
თამთას სამსახურიდან არავინ გამოხმაურებია, რადგან ერთი ქალბატონი ჯიშკარიანის ცოლის ძველი მეგობარია, მეორე მეზობელი, მესამე ბიძაშვილის შვილი. მხოლოდ თამთა იყო დეპუტატის შორეული მეზობელი. ჯიშკარიანები ჩვენს მოპირდაპირედ ცხოვრობენ. ვიცნობთ მის ცოლსა და შვილს. არც ისინი გამოჩენილან, ბოდიშიც არავის მოუხდია.
ილიამ ალკოჰოლი დალია და ჩემი შვილი უნდა გაეუპატიურებინა? - ამ საზარელ და სამარცხვინო ფაქტს ვერ შევურიგდები. რომ არა მედია, გამოძიება დარწმუნებული ვარ იტყოდა, რომ „დანაშაულის ნიშნები ვერ აღმოაჩინეს“. ახლა, უფრო დიდი იმედი გვაქვს, რომ გამოძიება ობიექტური იქნება“ - ამბობს ხათუნა ოქროპირიძე.
პრაიმტაიმი
