ტრამპს მის წინააღმდეგ დაწერილი საჩივრის ავტორთან შეხვედრა სურს

ტრამპს მის წინააღმდეგ დაწერილი საჩივრის ავტორთან შეხვედრა სურს

აშშ-ის პრეზიდენტმა დონალდ ტრამპმა განაცხადა, რომ სურს შეხვდეს დაზვერვის თანამშრომელს, რომელმაც მასზე ანონიმური საჩივარი დაწერა. ამის შესახებ თეთრი სახლის ლიდერმა Twitter-ზე დაწერა.

„როგორც ნებისმიერი სხვა ამერიკელი, მეც ვიმსახურებ იმას, რომ შევხვდე ადამიანს, რომელიც ვინც მე დამადანაშაულა. განსაკუთრებით იმიტომ, რომ მან უცხოელ ლიდერთან იდეალურ საუბარს არასწორი ინტერპრეტაცია მისცა“, - წერს ტრამპი.

ის ასევე გამოეხმაურა დემოკრატი კონგრესმენის ადამ შიფის განცხადებებს და აღნიშნა, რომ შიფი „შესაძლო თაღლითობის და სახელმწიფო ღალატის გამო ყველაზე მაღალ დონეზე უნდა დაიკითხოს“.

29 სექტემბერს ადამ შიფმა განახცადა, რომ კონგრესში წარმოდგენილი დემოკრატები შეეცდებიან გაარკვიონ, ხომ არ მალავს ტრამპი სხვა უცხოელ ლიდერებთან, მათ შორის ვლადიმერ პუტინთან და საუდის არაბეთის მემკვიდრე პრინც მუჰამედ ბინ სალმანთან თავისი საუბრების შინაარსს, რითაც ეროვნული უსაფრთხოების ინტერესებს აზარალებს.

გარდა ამისა, ტრამპმა გამოთქვა სურვილი შეხვდეს არა მხოლოდ დაზვერვის თანამშრომელს, არამედ ინფორმატორს, რომელმაც ინფორმატორს მისი და ზელენსკის საუბრის შინაარსი გადასცა.

ამის შემდეგ დაზვერვის თანამშრომლის ადვოკატებმა სენატის სადაზვერვო საკითხთა კომიტეტს წერილით მიმართეს, რომელშიც აღნიშნავენ, რომ მათ კლიენტს სერიოზული საფრთხე ემუქრება.

აშშ-ის დაზვერვის თანამშრომელმა დონალდ ტრამპის წინააღმდეგ საჩივარი დაწერა, რომელიც მისი და ერთ-ერთი უცხოელი ლიდერის საუბარს ეხებოდა. მოგვიანებით აღმოჩნდა, რომ ეს ლიდერი უკრაინის პრეზიდენტი ვოლოდიმერ ზელენსკი იყო.

ჩანაწერის თანახმად, ტრამპმა სატელეფონო საუბრის დროს აშშ-ის ყოფილი ვიცეპრეზიდენტის, ჯო ბაიდენისა და მისი შვილის საკითხი განიხილა. აშშ-ის კონგრესის დემოკრატმა წევრებმა კი გამოთქვეს ვარაუდი, რომ კორუფციასთან ბრძოლის საფარქვეშ ტრამპი უკრაინის ხელისუფლებას თავისი ოპონენტების წინააღმდეგ სისხლის სამართლებრივი დევნის დაწყებას აიძულებდა.

ამის შემდეგ თეთრმა სახლმა პრეზიდენტ დონალდ ტრამპსა და უკრაინის ლიდერ ვოლოდიმერ ზელენსკის შორის 25 სექტემბერს შემდგარი სატელეფონო საუბრის სტენოგრამა გამოქვეყნა. მანამდე კი თავად ზელენსკიმაც დაადასტურა, რომ სატელეფონო საუბრისას ტრამპი მას ბაიდენზე ზემოქმედებისკენ არ უბიძგებდა.

მიუხედავად ამისა, აშშ-ის წარმომადგენელთა პალატის ნაწილმა დონალდ ტრამპის წინააღმდეგ იმპიჩმენტის ფორმალური პროცედურა დაიწყო. აშშ-ის წარმომადგენელთა პალატის გადაწყვეტილებას იმპიჩმენტის შესახებ ამერიკელების 47% მხარს უჭერს.