ყველამ უნდა ვისწავლოთ კრიტიკული აზრების მოსმენა და მშვიდი დისკუსია, – ამის შესახებ საქართველოს ექს-პრეზიდენტი მიხეილ სააკაშვილი “ფეისბუქის” პირად გვერდზე წერს.

„სოციალურ ქსელებში მიმდინარე ახალგაზრდების დისკუსიას ყურადღებით ვაკვირდები. მინდა იცოდეთ, თითოეული თქვენგანის აზრი, რაოდენ კრიტიკულიც არ უნდა იყოს ჩემს ან ჩემი გუნდის მიმართ, ჩემთვის მნიშვნელოვანი და ყურადსაღებია. თითოეული ახალგაზრდა, ვინც დღეს რუსთაველზე დგას, გულწრფელად ებრძვის უსამართლობას და იცავს საქართველოს თავისუფლებას, არის ძვირფასი ჩემთვის. თქვენ ჩემი შვილების თაობა ხართ, ჯანსაღი, კრიტიკულად მოაზროვნე, თავისუფლების მოყვარული თაობა, რომელიც ვარდების რევოლუციის თაობაცაა. ჩვენს ქვეყანას საერთო მტერი ჰყავს – რუსეთი, ივანიშვილი, მისი გარემოცვა და მის მიერ დაქირავებული ადამიანები. ჩვენ ყველა ამ ბრძოლაში ვართ. მე, როგორც ერთ-ერთი თქვენგანი – რიგითი ჯარისკაცი.

თქვენ შეიძლება ჩემი და ჩემი თანამოაზრეების ხედვები მოგწონდეთ, ან არა. შეიძლება ჩემს პოზიციას იზიარებდეთ, ან არა, ისევე, როგორც მე მაქვს უფლება, გამოვხატო საკუთარი მოსაზრებები, მით უფრო, რომ მე და ჩემს გუნდს ბევრი გაგვიკეთებია და ამ ქვეყნის შენების დიდი გამოცდილება გვაქვს. იყო შეცდომებიც, მაგრამ ჩვენ ვიყავით  ძალა, რომელმაც პირველად დაამკვიდრა პოლიტიკური პასუხისმგებლობის ტრადიცია, აღიარა არჩევნების შედეგები და მშვიდობიანად გადააბარა ხელისუფლება.

ამავე დროს, მე ქედს ვიხრი ჩვენი მხარდამჭერების წინაშე, ვისაც მხოლოდ საქართველოს გამარჯვება ამოძრავებს, ვინც გაუძლო მძიმე წნეხს და ზემოქმედებას, ვის თავზეც გაიარა უამრავმა ქარტეხილმა. ამ ადამიანებმა უდიდესი წვლილი შეიტანეს იმაში, რომ დღეს საქართველოში ცვლილებების მაღალი შანსი გაჩნდა. ისინი არ არიან „პარტაქტივი“, ისინი არიან თავისუფლების, წარმატებული საქართველოს იდეით შეპყრობილი პატრიოტი და მებრძოლი ადამიანები.

მინდა, ყველას ვთხოვო, ეს ენერგია მოვახმაროთ საერთო მტრის წინააღმდეგ ბრძოლას. ჩვენ ყველამ უნდა ვისწავლოთ კრიტიკული აზრების მოსმენა და მშვიდი დისკუსია. პარტიულ და პოლიტიკურ კამათს ყოველთვის მოვასწრებთ იმ არჩევნებში, რომელშიც თითოეულ მოქალაქეს თავისუფალი არჩევანის უფლება ექნება და ივანიშვილი ვეღარ გააყალბებს.

ყველაფერი კარგად იქნება. ძალა ერთობაშია!“, – დაწერა მიხეილ სააკაშვილმა სოციალურ ქსელში.

მიხეილ სააკაშვილის აღნიშნულ მოწოდებებს “ტაბულას” დამფუძნებელი, ჟურნალისტი თამარ ჩერგოლეიშვილი “ფეისბუქის” პირად გვერდზე გამოეხმაურა:

“ანუ აღარ ვართ მოსყიდულები და სასარგებლო იდიოტები ისინი, ვინც პროპორციული არჩევნებისთვის ვიბრძოლეთ და მივიღეთ?

გაწმინდა თავისივე გადაფურთხებული?

ასე გაწმენდ ყველაფერს – ძვირფასო მიშა, სანამ არ გააცნობიერებ რომ ქართველი ხალხის ბელადი არ ხარ და თუ პოლიტიკა გაინტერესებს, ისევე მოგიწევს ადამიანების გულების თავიდან მოგება, თანასწორად, თანაბარ კონკურენციაში – როგორც ნებისმიერ სხვას”,- დაწერა ჩერგოლეიშვილმა სოციალურ ქსელში.