ნინო ქათამაძე წუხს, რომ რუსეთში კონცერტი გამართა, რუსები კი ცინიკურად უთვლიან ქართველ მომღერალს, „დაე, იჯდეს საქართველოში და იქ იგასტროლიოროს“.

სწორედ ასეთი სიტყვებით გამოეხმაურა პროდიუსერი იოსიფ პრიგოჟინი ნინო ქათამაძის სინანულს ამ რამდენიმე დღის წინ რუსეთში გამართული კონცერტის გამო და ქათამაძის ნათქვამს მომიტინგეთა წინაშე: „ბოდიშს ვიხდი, ეს ჩემი ბოლო კონცერტი იყო რუსეთში“.

პრიგოჟინის თქმით, როცა ადამიანები ასეთ განცხადებებს აკეთებენ, ამისთვის პასუხს უნდა აგებდნენ. მისი აზრით, ნებისმიერი დიდი სახელმწიფო ყოველთვის იდომინირებს პატარა სახელმწიფოზე, მაგრამ მეზობლებთან ადამიანურად უნდა იცხოვრო.

„ისინი რა, ყველანი ჭკუიდან გადავიდნენ? ეს რაღაც უგუნურებაა. ეს რა, კარის გაჯახუნებაა?“ - აინტერესებს პრიგოჟინს.

სავარაუდოდ, მხოლოდ ნინო ქათამაძეს გაუჩნდა მონანიების სურვილი რუსეთში გამართული კონცერტის გამო, სხვაგვარად ფიქრობენ ქართული წარმომავლობის პრიმადონები. პარლამენტის ვიცე-სპიკერი გია ვოლსკი გაერთიანებული ოპოზიციის ლიდერების რუსეთთან კავშირზე ამახვილებს ყურადღებას და აცხადებს, რომ გრიგოლ ვაშაძის ცოლი კრემლში აღმოჩნდა. საუბარია 18 ივნისს მოსკოვში კრემლის სახელმწიფო სასახლეში გამართულ ყოველწლიურ ღონისძიებაზე, სადაც მსოფლიოს ცნობილი ბალერინები და ბალერონები იკრიბებიან. მათ შორის, არც ნინო ანანიაშვილი გამოკლებია ამ ღონისძიებას.

უნდა გამოვუცხადოთ თუ არა ოკუპანტს პროტესტი კულტურულ ღონისძიებებზე რუსეთში ჩაუსვლელობით?

ანალიტიკოსი დავით ზარდიაშვილი For.ge-სთან საუბრისას იხსენებს გერმანელი სოციოლოგის - მაქს ვებერის ნათქვამს, არსებობს მიზანმიმართული რაციონალური ქცევა, რაც ძირითადად პოლიტიკაში უნდა გამოიყენებოდეს, არსებობს მიზანმიმართული ქცევა, რომელიც რაციონალურად ვერ არის კარგად დაგეგმილი და არსებობს მესამე, ყველაზე უბედური რაც არის - აფექტი. ანალიტიკოსის აზრით, ჩვენ უკვე აფექტში ვართ და არ შეიძლება, პოლიტიკაში ვინმე აფექტებით ხელმძღვანელობდეს. აფექტით კისერს მოვიტეხთ, თანაც, საქართველო იმხელა გამოწვევების წინაშეა, რომ შეცდომის უფლება აღარ გვაქვს. ყველა შეცდომა უბედურებად გვექცევა ხოლმე. ამიტომაცაა, რომ ჩვენი მხრიდან რუსეთში კონცერტების გამართვისგან თავშეკავება უცხოელებს არ ესმით ხოლმე.

„შორიდან ძალიან ცუდად ჩანს ეს ამბავი. საზღვარგარეთ მეგობრები მყავს და ისინი ქართულად ახირებულ პოზიციას ხედავენ ამაში. ისინი ფიქრობენ, რომ არ შეიძლება დიდი ისტერიკის ატეხვა. ცხადია, ჩვენ გვაქვს უზარმაზარი პრობლემა - ტერიტორიული მთლიანობის სახით, რომელიც რუსეთმა დაარღვია, მაგრამ ამას ცივი გონებით უნდა მივუდგეთ, რაციონალურად უნდა ვიაზროვნოთ. არ შეიძლება, ისე მოვიქცეთ, რომ ერთი რუსი ჩამოვიდა და ლამის ქვეყანა დაიქცა. საკუთარი თავის პატივისმცემელი არც ერთი ქვეყანა აქამდე საქმეს არ მიიყვანს. მაშინ ერთხელ და სამუდამოდ უნდა ვთქვათ, რომ რუსეთი აღარ არსებობს ჩვენთვის და ყველა გზა უნდა ჩავკეტოთ, რაც სისულელეა. ეს უფრო მეტ ზიანს მოგვაყენებს. ეს იმას ჰგავს, 90-იანებში სამტრედიის რკინიგზა რომ გადავკეტეთ რუსეთისთვის ზიანის მისაყენებლად და ისევ ჩვენ მივიღეთ ზიანი. იმ მასშტაბის ქვეყანა საქართველო არ არის, რომელსაც შეუძლია რუსეთის წინააღმდეგ დემარში მოაწყოს. ამას შედეგი არ ექნება. ეს იგივეა, სპილოს რომ ბუზმა უკბინოს“, - აცხადებს დავით ზარდიაშვილი.

მისი აზრით, ქართველებს არ გვაქვს უფლება, ემოციის დონეზე ვიმოქმედოთ. ჩვენ უნდა ვიცოდეთ, რომ გეოპოლიტიკური დაპირისპირება დასავლეთსა და რუსეთს შორისაა და არა საქართველოსა და რუსეთს შორის. უბრალოდ, საქართველო დასავლური სამყაროს ნაწილია, ყოველ შემთხვევაში, ასე გვინდა, რომ იყოს, მაგრამ, როცა თვითონ დასავლეთი რუსეთთან პოლიტიკას პრაგმატულად უყურებს, როცა ევროსაბჭოში ხმის უფლებას აძლევენ რუსეთს ყირიმის ანექსიის, საქართველოს ოკუპაციის მიუხედავად, ეს ნიშნავს, რომ დასავლეთს ბევრ რამეში სჭირდება რუსეთი.

ილიას სახელმწიფო უნივერსიტეტის ლექტორი, ტურიზმის ექსპერტი გიორგი ქემერტელიძე For.ge-სთან საუბრისას აცხადებს, რომ რუსეთში ჩასატარებელ კონცერტებზე უარის თქმა შესაძლოა, ემოციურ ფონს უკავშირდებოდეს, მაგრამ რუსეთის ოკუპანტი მთავრობის წინააღმდეგ მოწოდებები აუცილებლად უნდა გაკეთდეს. ჩვენ მხოლოდ 20 ივნისს არ გაგვიგია, რომ რუსეთი ოკუპანტია, ეს მანამდეც კარგად ვიცოდით. უბრალოდ, 20 ივნისს კიდევ ერთი მიზეზი გაგვიჩნდა, რუსეთის ოკუპაცია გაგვეპროტესტებინა.

„მილიონამდე ქართველი ცხოვრობს რუსეთში, რომელიღაც ქართველი სპორტშია ჩართული, ძალიან ბევრი ქართველი ექიმია რუსეთში, არიან უბრალო რიგითი ადამიანები, რომლებიც რაღაც სამუშაოს ასრულებენ ამ ქვეყანაში. გამოდის, ამ ქართველების წინააღმდეგაც უნდა გამოვიდეთ, რატომ ხართ რუსეთში და აუცილებლად ჩამოდით საქართველოში. ამ თემებით შეიძლება სპეკულირება, ამის შესახებ ყველას თავისი აზრი აქვს, მაგრამ, ჩემი აზრით, აქ ოკუპანტი სახელმწიფოს თემაა გასაპროტესტებელი და არა უბრალო ხალხის“, - აღნიშნა გიორგი ქემერტელიძემ.