რუმინეთის პრემიერ-მინისტრთან ერთად გამართულ ერთობლივ პრესკონფერენციაზე საქართველოს პრემიერ-მინისტრი ოკუპირებულ ტერიტორიებზე არსებულ მდგომარეობას შეეხო.
მამუკა ბახტაძემ განაცხადა, რომ მთავრობის სამშვიდობო ინიციატივის „ნაბიჯი უკეთესი მომავლისკენ“ მთავარი მიზანი ამ ჰუმანიტარული კატასტროფის შემცირებაა.
საქართველოს მთავრობის მეთაურმა რუმინეთს ევროკავშირის სადამკვირვებლო მისიაში ყველაზე დიდი კონტრიბუციისთვის მადლობა გადაუხადა.
„ვსარგებლობ შემთხვევით და მადლობას ვუხდი ჩვენს კოლეგებს საქართველოს სუვერენიტეტისა და ტერიტორიული მთლიანობის მტკიცე მხარდაჭერისთვის. შეხვედრებზე განვიხილეთ საქართველოში არსებული ძალიან მტკივნეული გამოწვევები. რუსეთის ფედერაცია აგრძელებს ჩვენი ტერიტორიების 20%-ის ოკუპაციას. ოკუპირებულ ტერიტორიებზე ადამიანის უფლებების დაცვის თვალსაზრისით სიტუაცია კატასტროფულია. შეიძლება ითქვას, რომ ოკუპირებულ ტერიტორიებზე ჩვენ გვაქვს ჰუმანიტარული კატასტროფა. ჩვენ, მეგობრებთან ერთად, მომზადებული გვაქვს სამშვიდობო ინიციატივა, რომლის მთავარი მიზანია, შევაჩეროთ ამ ტერიტორიებზე არსებული ჰუმანიტარული კატასტროფა. რუსეთი არ ასრულებს ნაკისრ ვალდებულებებს, რომელიც მან ჯერ კიდევ 2008 წელს აიღო, რომ გაიყვანოს ჯარები საქართველოს ტერიტორიიდან.
ჩვენ განუხრელად ვასრულებთ კონფლიქტის მშვიდობიანი მოგვარების პოლიტიკას და მადლობას ვუხდით საერთაშორისო საზოგადოებას ამ საქმეში გვერდში დგომისთვის.
მინდა, განსაკუთრებული მადლობა გადავუხადო ჩვენს რუმინელ მეგობრებს ევროკავშირის სადამკვირვებლო მისიაში ყველაზე დიდი კონტრიბუციისათვის,” – განაცხადა მამუკა ბახტაძემ.
