"ყველანი აქ ვართ, გარდა "პატრიოტთა ალიანსისა" - ოპოზიცია ივანიშვილის წინააღმდეგ ერთიან ფრონტს ქმნისთითქმის მთელი ოპოზიციური სპექტრი საპარლამენტო არჩევნების პროპორციული სისტემით ჩატარების მოთხოვნით ერთიანდება და ქვეყნის მასშტაბით მილიონი ხელმოწერის შეგროვებას იწყებს.
"წამყვანი პარტიებიდან თითქმის ყველა აქ არის, გარდა "ქართული ოცნებისა". ეს არც პარტიული გაერთიანებაა და არც საარჩევნო, ეს არის შეთანხმება იმ საკითხზე, რომ ვიბრძოლებთ პროპორციული სიის დამტკიცებისთვის. "პატრიოტთა ალიანსი" არ მოსულა, მაგრამ იმედი მაქვს, რომ შემოუერთდება ამ გაერთიანებას," - ამბობს გუბაზ სანიკიძე.
"გაერთიანება მოხდა პროპორციული არჩევნების დანიშვნის, კონსტიტუციის ცვლილებებისა და მაჟორიტარული სისტემის გაუქმების მოთხოვნით. ამ მოთხოვნის შესასრულებლად, კონსტიტუციიდან გამომდინარე, 200 ათას ხელმოწერას ვაგროვებთ. პარტიები სწორედ ხელმოწერების ორგანიზებისათვის გაერთიანდნენ, ეს არ არის საარჩევნო გაერთიანება," - აცხადებს ფრაქცია "ნაციონალური მოძრაობის" თავმჯდომარე რომან გოცირიძე "რეზონანსთან" საუბრისას 20 ოპოზიციური პარტიის გაერთიანებაზე.
გრიგოლ ვაშაძე, დავით უსუფაშვილი, ნინო ბურჯანაძე და ოპოზიციის სხვა ლიდერები ამტკიცებენ, რომ ბიძინა ივანიშვილს არჩევნების გაყალბების შესაძლებლობა აღარ მიეცემა.
"დემოკრატიული მოძრაობა-ერთიანი საქართველოს" ერთ-ერთ ლიდერი გუბაზ სანიკიძე "რეზონანსთან" საუბრისას აცხადებს, რომ ეს არა პარტიული, არამედ არჩევნების პროპორციული სისტემის ჩატარების მოთხოვნით გაერთიანებაა და იმედოვნებს, რომ "პატრიოტთა ალიანსი", რომელიც მათთან ჯერ არ გაერთიანებულა, მალე შეუერთდება.
რომან გოცირიძე ამ მხრივ პესიმისტურად არის განწყობილი. ამბობს, რომ "პატრიოტთა ალიანსი" "ქართული ოცნების" სატელიტია.
"გაერთიანებულია ყველა პარტია, გარდა "ქართული ოცნებისა" და მისი სატელიტი "პატრიოტთა ალიანსისა". გაერთიანდა ყველა პარტია, რაც კი არსებობს საქართველოში, რომელსაც აქვს რაიმე საარჩევნო რეიტინგი. მიზანია ხელმოწერების შეგროვება და იმ კონსტიტუციის ამოქმედება, რომელიც, 2024 წლის ნაცვლად, პროპორციულ არჩევნებზე გადასვლას 2020 წლისთვის ითვალისწინებს.
"სამართლებრივი მხარე უკვე გავლილია. პარლამენტში შეიქმნა საინიციატივო ჯგუფი ოცამდე პარტიის მონაწილეობით და დავიწყეთ ხელმოწერების შეგროვება ქვეყნის ყველა რეგიონსა და მთელ თბილისში. პარტიებს გადანაწილებული აქვთ ფუნქციები და ყველა ერთდროულად შევუდექით საქმიანობას," - განაცხადა რომან გოცირიძემ.
სანიკიძემ აღნიშნა, რომ მიზანი 2020 წელს არჩევნების პროპორციული სისტემით ჩატარებაა, რის მისაღწევადაც, გარდა პოლიტიკური ორგანიზაციებისა, არასამთავრობო ორგნიზაციებიც აპირებენ მათთან გაერთიანებას.
"ვერ დავარქმევთ ამას გაერთიანებას; არ ვართ არაფერში ერთად, გარდა იმისა, რომ თამაშის წესზე შევთანხმდეთ და ჩატარდეს წესიერი არჩევნები. არა მარტო ეს პარტიები იქნებიან ამ გაერთიანებაში, დაგვემატებიან არასამთავრობო და საერთაშორისო ორგნიზაციებიც. საერთოდაც, ალბათ მივაღწევთ იმას, რომ ივანიშვილის ხელისუფლება ვაიძულოთ, ნაცვლად 2024 წლისა, არჩევნები პროპორციული სისტემით 2020 წელს ჩატარდეს.
"მილიონი ხმის შეგროვებას ვაპირებთ, რადგან ამას ექნება მორალური ზემოქმედება ხელისუფლებაზე. სად 200 ათასს რომ შეიტან და სად მილიონს? შესაძლებლობა არსებობს, რომ მილიონი ხელმოწერა შევაგროვოთ. შესაძლოა, უფრო მეტიც შევაგროვოთ იმის მიხედვით, თუ როგორ ვიმუშავებთ და როგორ გავაგებინებთ ხალხს, რაზეა საუბარი," - განაცხადა გუბაზ სანიკიძემ.
