სასჯელაღსრულების ცენტრალურმა საავადმყოფომ პირველი პაციენტები მიიღო. კლინიკაში პირველი ქირურგიული ოპერაციები უკვე ჩატარდა. სამედიცინო პერსონალის განცხადებით, პოსტოპერაციულ პერიოდში პაციენტების მდგომარეობა დამაკმაყოფილებელია. სასჯელაღსრულებისა და პრობაციის მინისტრის მოადგილე არჩილ თალაკვაძე მსჯავრდებულების გამოკვლევებსა და მათი ქირურგიული ჩარევებისთვის მომზადების პროცესს პირადად გაეცნო. მინისტრის მოადგილის განცხადებით, სამედიცინო პერსონალი დაკომპლექტებულია მაღალკვალიფიციური სპეციალისტებით, ხოლო ტექნიკა და აღჭურვილობა შემოწმებულია და მზადაა რთული ქირურგიული ოპერაციების ჩასატარებლად.
საავადმყოფოში უკვე გადაიყვანეს პირველი პაციენტები, რომელთაც ფსიქიატრიული დახმარება ესაჭიროებათ. ასევე ადაპტირებულ, გრძელვადიანი მოვლის დაწესებულებაში მოთავსდნენ შეზღუდული შესაძლებლობის მქონე პირები, რომლებსაც მუდმივი მოვლა და სპეციალური პირობები ესაჭიროებათ.
„ეს საავადმყოფო არის სამოქალაქო სტანდარტების შესაბამისი, იგივე პირობებით არის ლიცენზირებული და იქნება ერთ-ერთი იმ სამოცამდე საავადმყოფოს შორის, რომელიც პატიმრების ჯანმრთელობის დაცვას ემსახურება. საავადმყოფოს ფუნქციონირებას ინტენსიურ მონიტორინგს გაუწევს სასჯელაღსრულების სამინისტროს სამედიცინო დეპატარტამენტი. მე პირადად ვგეგმავ, რომ ექთნის ამპლუაში დავეხმარო პერსონალს პირველი თვეების განმავლობაში რომ საავადმყოფომ იმუშავოს ნორმალურ რეჟიმში, იყოს დისციპლინა, წესრიგი და არავინ გადმოვიდეს საავადმყოფოში „საცხოვრებლად“, როგორც ეს ადრე ხდებოდა“ - განაცხადა არჩილ თალაკვაძემ.
სასჯელაღსრულების ცენტრალური საავადმყოფო 2014 წლის 30 ივნისს მინისტრმა სოზარ სუბარმა და მინისტრის მოადგილემ არჩილ თალაკვაძემ გახსნეს. პენიტენციური ჯანდაცვის რეფორმის ფარგლებში შეიცვალა საავადმყოფოს კონცეფცია, სრულად გარემონტდა და აღიჭურვა თამანედროვე სამედიცინო აპარატურით, სამედიცინო პერსონალი დაკომპლექტდა 3-ეტაპიანი შერჩევის შედეგად, ხოლო ექთნებმა გაიარეს პროფესიული მომზადების სპეციალური პროგრამა.
საავადმყოფო 80 საწოლზეა გაშლილი, აქვს დიაგნოსტიკური ბლოკი, ადიქტოლოგიის და ფსიქიატრიული განყოფილებები, მიმღები განყოფილება პაციენტის 24 საათიანი დაყოვნების შესაძლებლობით, რეანიმაციის და ინტენსიური თერაპიის დარბაზები, ასევე ორი დამოუკიდებელი ბლოკი ქირურგიული ჩარევებისთვის.
საავადმყოფოში დამატებით განთავსებულია 57-ადგილიანი ადაპტირებული საცხოვრისი შეზღუდული შესაძლებლობების მქონე პირებისთვის, ხანგრძლივი მოვლის სერვისებით.
საავადმყოფოს განახლებამდე არსებული ვიწრო და მოუხერხებელი საწოლები შეცვალა სხვადასხვა ტიპის სამედიცინო საწოლებმა ორთოპედიული ლეიბებით. მათ შორისაა ელექტრონული, მულტიფუნქციური საწოლებიც, რომელიც პულტის საშუალებით იმართება.
ლაბორატორიული კვლევების სრულყოფის მიზნით გაფართოვდა და აღიჭურვა კლინიკური ლაბორატორია. საავადმყოფოში ფუნქციონირებს ბაქტერიოლოგიური ლაბორატორიაც.
დიაგნოსტიკურ ბლოკს დაემატა რენტგენის, ექოსკოპიის, ელასტოგრაფიის, ენდოსკოპიის და სპირომეტრიის მოწყობილობები. აღსანიშნავია, რომ ელასტოგრაფიისთვის განკუთვნილი აპარატი, რომელიც ღვიძლის კვლევისთვის გამოიყენება, საქართველოში სულ რამდენიმეა და ერთ-ერთი მათგანი სწორედ აღნიშნულ საავადმყოფოშია განთავსებული. ევროკავშირის და ევროსაბჭოს დახმარებით, დაწესებულებას მალე დაემატება კომპიუტერული ტომოგრაფიის აპარატიც.
ინფექციურ განყოფილებაში დამონტაჟდა ჰაერის გამწოვი ბიოფილტრები, რომელიც უზრუნველყოფს ინფექციების გავრცელების შეზღუდვას. მთელ დაწესებულებაში გაიმართა ცენტრალური ვენტილაცია და კლიმატ-კონტროლის სისტემა.
განახლდა სტომატოლოგიური კაბინეტი, სადაც სტომატოლოგიური აპარატურის გარდა, განთავსებულია რენტგენის და სასტერილიზაციო აპარატურა.
სრულად განახლდა ქირურგიული განყოფილება, სადაც არამარტო სტანდარტული ქირურგიული ინტერვენციები, არამედ ლაპარასკოპიული ოპერაციებიც გაკეთდება.
