გერმანიას საქართველოსთან თანამშრომლობის გაძლიერება სურს, – ამის შესახებ ნათქვამია გერმანიის მთავრობის ოფიციალურ ვებგვერდზე კანცლერ ანგელა მერკელის საქართველოში ვიზიტის შესახებ გამოქვეყნებულ ინფორმაციაში.
ინფორმაციის თანახმად, როგორც სამხრეთ კავკასიური ტურნეს პირველ ქვეყანაში ვიზიტისას ანგელა მერკელმა განაცხადა, მას საქართველოსთან თანამშრომლობის განვითარება სურს.
„ჩვენ საქართველოსთან უფრო მჭიდრო თანამშრომლობის გზაზე ვიმყოფებით ევროკავშირის საშუალებით, რის მაგალითსაც ასოცირებისა და თავისუფალი ვაჭრობის შესახებ შეთანხმება წარმოადგენს“, – განაცხადა გერმანიის კანცლერმა.
გერმანიის მთავრობის განცხადებაში აღნიშნულია, რომ საქართველო ანგელა მერკელის სამხრეთკავკასიური ტურნეს პირველი გაჩერება იყო. ამის შემდეგ ის სომხეთსა და აზერბაიჯანსაც ეწვევა.
„ფედერალური მთავრობა დაინტერესებულია რეგიონის კარგი განვითარებით და მხარს უჭერს ამ ქვეყნებში დემოკრატიასა და კანონის უზენაესობას“, – ნათქვამია გერმანიის მთავრობის განცხადებაში.
გერმანიის მთავრობა აღნიშნავს, რომ აფხაზეთისა და „სამხრეთ ოსეთის“ კონფლიქტების მშვიდობიანი დარეგულირებისკენ მიმართული ძალისხმევას უჭერს მხარს.
კანცლერის განცხადებით, ის საქართველოს ტერიტორიულ მთლიანობას უჭერს მხარს. მისი თქმით, გერმანია ეცდება, საკუთარი წვლილი შეიტანოს კონფლიქტის დარეგულირებაში. როგორც გერმანიის კანცლერმა განაცხადა, არ შეიძლება ასეთი უსამართლობის დავიწყება და საჭიროა ხელშეწყობა, რომ ეს საკითხი იდგეს დღის წესრიგში.
რაც შეეხება ეკონომიკურ თანამშრომლობას, პრემიერ-მინისტრ მამუკა ბახტაძესთან გამართულ პრესკონფერენციაზე ანგელა მერკელმა განაცხადა, რომ გაფორმდა 193 მილიონი ევროს ღირებულების ორი შეთანხმება.
„შემთხვევითი არ არის, რომ მე თან მახლავს ბიზნესმენთა დელეგაცია“, – აღნიშნა კანცლერმა.
