მიმაჩნია, რომ საქართველოს ნამდვილად შესანიშნავი შესაძლებლობები აქვს ტურიზმის და რეკრეაციული მიმართულებით, - ამის შესახებ საქართველოში გაერო-ს მუდმივი წარმომადგენლობის ხელმძღვანელმა ნილს სკოტმა გუდაურში, დიპლომატიური სათხილამური შეჯიბრის “DipSki 2018”-ის შეფასებისას განაცხადა.
ნილს სკოტმა კიდევ ერთხელ გაუსვა ხაზი საქართველოსა და გაერო-ს ურთიერთობების დადებით დინამიკას.
“გაერთიანებული ერების ორგანიზაცია ძალიან მოხარულია, რომ აქ ვართ წარმოდგენილი. როგორც ხედავთ, უმშვენიერი დღეა და არაჩვეულებრივი გარემო. მიმაჩნია, რომ საქართველოს აქვს ნამდვილად შესანიშნავი შესაძლებლობები ტურიზმის და რეკრეაციული მიმართულებით. დღეს ერთმანეთს ეჯიბრებიან საქართველოში აკრედიტებული დიპლომატიური კორპუსის და საგარეო საქმეთა სამინისტროს წარმომადგენლები. ტურნირი უკვე მეორედ ტარდება და წარმოადგენს შესანიშნავ შესაძლებლობას იმისთვის, რათა კიდევ ერთხელ შევიკრიბოთ და ერთად გავატაროთ ეს შესანიშნავი დღე.
საგარეო ურთიერთობები საქართველოსთვის ძალიან მნიშვნელოვანია. საქართველოს და გაერთიანებული ერების ორგანიზაციას შესანიშნავი ურთიერთობები გვაკავშირებს და ჩვენ ყოველთვის წარმატებით ვთანამშრომლობთ”, - განაცხადა ნილს სკოტმა.
