ქართველი სუმოისტის ლევან გორგაძის (ტოჩინოშინი) გამარჯვებასთან დაკავშირებით, იაპონიის საგარეო საქმეთა მინისტრმა ტარო კონომ საქართველოს ვიცე-პრემიერს, საგარეო საქმეთა მინისტრს, მიხეილ ჯანელიძეს მისალოცი წერილი გამოუგზავნა. ამის შესახებ ინფორმაციას საქართველოში იაპონიის საელჩო ავრცელებს.
„გულითა და სულით გილოცავთ 2018 წლის სუმოს ჰაცუ-ბაშოზე (პირველ ტურში) ქართველი სუმოისტის, ტოჩინოშინის გამარჯვებას. მისი წარმატება ძალიან სასიხარულოა და აღსანიშნავია ჩვენი ქვეყნების მეგობრული ურთიერთობის ისტორიაში. ვუსურვებ მას მომავალშიც წარმატებებს და ჩვენს ქვეყნებს ორმხრივი ურთიერთობის კიდევ უფრო გაღრმავებას“, – ნათქვამია მისალოც წერილში.
შეგახსენებთ, რომ ქართველი სპორტსმენი ტოჩინოშინი, იგივე ლევან გორგაძე იმპერატორის თასის მფლობელი გახდა. ამ ჯილდოთი ლევან გორგაძემ საუკეთესო სუმოისტის ტიტული მოიპოვა.