მინდა მადლობა გადავუხადო ყველას, ვინაიდან ეს იყო ჩემთვის ემოციური დღე, - ამის შესახებ „ქართული ოცნების“ მერობის კანდიდატმა კახი კალაძემ ცოტა ხნის წინ ბრიფინგზე განაცხადა. მისი თქმით, დარწმუნებულია, რომ გამარჯვებას მოიპოვებს, ვინაიდან წინასაარჩევნო პროცესისა და მოსახლეობასთან შეხვედრის დროს ეს შეინიშნებოდა.
ამასთან, კახი კალაძემ ყველას, ვინც საარჩევნო პროცესში ჩართული იყო, მადლობა გადაუხადა. მათ შორის მადლობა გადაუხადა ოპონენტებსაც. ”ემოციური დღე იყო ჩემთვის. პატივი უნდა ვცეთ ცესკო-ს შედეგებს, რომელიც დათვლის ხმებს, თუმცა ვიცით, რომ გავიმარჯვებთ. წინასაარჩევნოდ ხალხთან შეხვედრისას ეს სულისკვეთება იგრძნობოდა. მადლობა ყველა ადამიანს, ვინც მოიხადა მოქალაქეობრივი ვალი. ყველაფერი უნდა გავაკეთოთ იმისთვის, რომ ჩვენი ქალაქი იყოს მოწესრიგებული. ხელს შევუწყობთ ახალგაზრდების ჩართულობას ქალაქის განვითარებაში. ბევრი პრობლემაა, რომელსაც სჭირდება მოწესრიგება. შესაბამისად, ყოველი დღე ამ პრობლემებში გამარჯვება იქნება”, - განაცხადა კახი კალაძემ.
კახი კალაძე საარჩევნო შტაბში შვილებთან ერთად მივიდა.
