თუ საკონსტიტუციო ცვლილებებზე წერტილ-მძიმესთან დაკავშირებით გვეპატიჟება ხელისუფლება, ვადასტურებ, რომ ამას პარლამენტის რედაქტორები გაართმევენ თავს, - ამის შესახებ ”მოძრაობა შენების" თავმჯდომარე დავით უსუფაშვილმა განაცხადა.
პარლამენტის ყოფილი თავმჯდომარე გამოეხმაურა დეპუტატ არჩილ თალაკვაძის განცხადებას, რომელმაც აღნიშნა, არასამთავრობოებს საშუალება ექნებათ საკონსტიტუციო ცვლილებებზე მესამე მოსმენის ფარგლებში გასამართ დისკუსიაში მიიღონ მონაწილეობა.
"მოქმედი რეგლამენტის შესაბამისად მესამე მოსმენით ზუსტდება რედაქციული ხასიათის საკითხები - წერტილი, მძიმე, ტერმინი. თუ ამაზე გვეპატიჟება ხელისუფლება, მე ვაღიარებ, რომ პარლამენტში უმაღლესი კვალიფიკაციის რედაქტორები მუშაობენ და ისინი გაართმევენ ამ საქმეს თავს. თუ პარლამენტი ამბობს იმას, რომ რეგლამენტს აუქმებს და მესამე მოსმენისთვის ხსნის საკითხებზე საუბრის საშუალებას, ეს არის ის ნაბიჯი, რომელზეც შემდგომ შეიძლება პოზიტიური პროცესი აეგოს", - განაცხადა უსუფაშვილმა.
